無綫一年一度的「TVB賽馬日」今日舉行，一眾旗下藝人包括汪明荃（阿姐）、張振朗、龔嘉欣、姚子羚、傅嘉莉、陳曉華、劉穎鏇及丁子朗等等傾巢而出，場面墟冚熱鬧。眾人不停於場內「攞貼士」，希望趁馬年將至小發新年財，而適逢情人節到來，女藝人每人獲贈紅玫瑰一枝，阿姐則率先在場預派新春利是，張振朗及龔嘉欣等接過利是後忙不迭向阿姐拜早年。
陳曉華與劉佩玥孖住受訪。原來這對姐妹花已連續兩年「合體」，跟何廣沛等一齊投注有斬獲，前者更笑說﹕「其實我冇乜賭運，跟住佢哋就有嘞。記得去年劉佩玥同何廣沛嗌得好大聲，嗌到隻馬跑得好快，哈哈﹗」劉佩玥則笑言相信馬年氣勢將會更加好，而明天她則到訪番禺花市拍攝節目，並已準備了「喜慶裝」亮相，實行「旺一旺佢」。
談到情人節節目，陳曉華與朱敏瀚，及劉佩玥與周志文緋聞均傳得火熱，但兩女竟齊聲表示「冇人約」。當記者打趣指周志文「連短訊都冇傳」劉佩玥即大發嬌嗔回道﹕「你哋唔好再問啦，好慘呀，我個心好痛﹗」陳曉華則笑說﹕「我有將『情人節快樂』廣傳出去，已經傳咗畀俾百幾個人，我鍾意畀愛人哋多啲呀。（朱敏瀚冇表示？）冇呀，我冇睇電話。」劉佩玥再轉向陳曉華說﹕「既然大家都咁可憐，我約妳囉﹗」陳曉華即提議﹕「不如去我屋企叫外賣，最多叫塊扒返嚟我負責切心型啦。」相當搞笑。
姚子羚與龔嘉欣大方承認有馬主朋友，子羚更羨慕嘉欣曾有機會拉頭馬。記者笑問子羚其中有否合眼緣的，她搞笑答﹕「馬匹就有好多。（搵番個馬主男友？）有會話畀大家知，今日我試吓搵啦。」當記者追問農曆年會否到緋聞男友徐偉楝家拜年，子羚即表示﹕「佢冇邀請我，亦唔知佢住邊。（關係有變？）友情？咁我哋都會見面及約食飯嘅，佢最近都好忙。（連短訊都冇？）我有收到其他異性傳嚟嘅『情人節快樂』短訊，我會再努力啲嘞。」嘉欣則表示電話未有隨身，未知有否異性提出約會邀請﹕「我哋嘅工作成日變嚟變去，所以冇約實人，睇吓等陣放工點先，你哋（指記者）都想我幸福嘛。」
談到姐妹團「胡說八道」隨胡定欣離巢，僅餘她一個留守無綫，子羚回應﹕「都係嘅，佢哋個個都有唔同發展嘞。（妳有冇諗新發展？）TVB杯問咁嘅問題？大膽﹗唔可以咁樣㗎，做人要飲水思源，咁我出現喺度，即係無綫依然係我經理人。」至於日前與李施嬅慶生，子羚表示胡杏兒因身在內地開工，教未能齊人﹕「餐飯係施嬅請嘅，可以用『價值不菲』嚟形容，佢話自己近期大豐收搵到啲錢，想請我哋食飯，我都好戥佢高興。（傳佢參加《浪姐7》。）冇特別問佢，但如果佢同胡定欣獲邀嘅話，相信都好大機會會答應，其實我都好想參加，不如無綫搞番個類似嘅節目啦。」
至於丁子朗早前與吳若希及戴祖儀於飛機商務艙拍片，事後被狠批炫富，他受訪認衰表示﹕「係我哋冇諗得太仔細，但絕對冇揶揄別人嘅意思。拍片原意只係搞笑，冇諗過影響到咁多人，（唔開心？）冇，又唔係第一次畀人鬧，做得呢行預咗畀人鬧，但真係要反思。（邊個提議拍㗎？）唔講得，一係話我囉，都畀人鬧咗嘞。（影響你日後喺內地發展？）我諗都係睇作品說話啫，之前我有份做嗰套《暗戀者的救贖》點擊都唔錯。」而今次搭飛機到澳洲拍攝旅遊節目，他搞笑指最特別是沒有艷遇：「但我哋長期製造艷遇畀戴祖儀，成日問當哋洋漢係咪單身，單身就介紹畀佢，知道有個已經交換咗社交平台帳號。洋妞就睇我唔上眼，覺得我外形唔係好掂，搞冇我乜晒自信。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
