《尋秦記》電影版昨晚舉行慶功宴，宣布《尋秦記》Plus+多元宇宙版將於2月14日情人節正式上畫。今次慶功宴除了有一眾參與電影版拍攝的演員出席，古天樂更誠邀電視版幾位演員出席，一於來個敍舊。而「三弟」劉嘉龍終於出現，成為全場焦點人物。事緣古天樂在籌拍時都一直想找他再演「三弟」一角，但苦無聯絡，原來林峯一直都有︰「我到訪問時先知老闆想搵佢。」
古天樂在宣傳《尋秦記》電影版時，曾表示想齊集劇中所有演員（劇中未死的），齊齊參與電影版，其中一位是「三弟」劉嘉龍，可惜苦無聯絡。今次「三弟」成功現身，問到古天樂最終如何找到對方？「本來冇咗佢聯絡，原來阿峯（林峯）有。」至於往後仲有機會合作，古生都表示可以考慮。
問到林峯點解當日古天樂著意搵「三弟」出山，都冇立即獻出聯絡？林峯一臉冤枉︰「佢都冇同我講話要搵佢，係上次做訪問先知，你想搵佢咩？做咩唔問我？」事實上林峯跟劉嘉龍都有保持聯絡︰「一直都有，因為大家當年都係剛剛入行，年紀差不多，當年都算相熟，所以一直有聯絡。」問到可有請他睇《尋秦記》？「自己買飛啦，我都係自己買之嘛。」
今次慶功專誠找一眾劇中演員出席，林峯都覺得非常有意義：「係仲爭一兩位，例如呂不韋鋒哥（郭鋒），之前有食過飯，但今日佢唔得閒，仲有姚樂怡都唔得閒。」問到飾演趙高的王偉樑，很多網民都想他重現，林峯就表示呢位真係未有聯絡，並立即落閘：「喂，咪住先，我唔係負責尋人喎。」 由於劉嘉龍已經不是從事演藝工作，所以未有接受傳媒訪問，只亮相跟劇中兄弟古天樂及黃文標合照。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
