無綫一年一度「TVB賽馬日」昨日舉行，旗下藝人傾巢而出，適逢情人節，話題自然離不開甜蜜約會，想不到傳有另一半的「雙妹嘜」陳曉華與劉佩玥竟慨嘆冇人約，更搞笑即興相約到陳曉華家鋸心形牛扒。同場的陳煒性感放閃，稱大清早已收到老公送的花。
藝人汪明荃、張振朗、陳煒、龔嘉欣、姚子羚、傅嘉莉、陳曉華、劉穎璇與丁子朗等昨日現身「TVB賽馬日」，眾人在場內攞貼士，希望提早發新年財。適逢情人節，現場女藝人獲贈紅玫瑰，汪明荃則率先派利是，龔嘉欣與張振朗等接過後向對方拜個早年。
陳曉華與劉佩玥這對姊妹花已連續兩年合體，偕何廣沛等齊齊投注有斬獲，陳曉華笑說：「我冇乜賭運，跟住佢哋就有喇！」又指劉佩玥與何廣沛去年嗌得好大聲，笑言嗌到隻馬跑得好快。談到情人節，她與朱敏瀚、劉佩玥與周志文成雙成對，但兩女竟齊聲表示「冇人約」，記者笑指周志文「連短訊都冇傳」，劉佩玥即大發嬌嗔說：「你哋唔好再問好慘呀！我個心好痛！」陳曉華則笑說：「我有將『情人節快樂』短訊廣傳出去，我鍾意畀愛人哋多啲。（朱敏瀚冇表示？）冇呀！我冇睇電話。」劉佩玥搞笑提議：「大家都咁可憐，我約你囉！」陳曉華即說：「不如去我屋企叫外賣，最多叫塊扒返嚟，我負責切心形喇！」
姚子羚物色馬主男友
姚子羚與龔嘉欣大方承認有馬主朋友，問子羚當中有否合眼緣的人，她搞笑說：「馬匹就有好多。（搵番個馬主男友？）今日試吓搵」問會否到緋聞男友徐偉棟家拜年，她說：「佢冇邀請我。（關係有變？）我哋都會約食飯嘅，佢最近好忙。（連短訊都冇？）有收到其他異性傳嘅『情人節快樂』短訊，我會再努力啲喇！」嘉欣則表示電話未有隨身，未知有否異性邀約：「我哋嘅工作成日變嚟變去，所以冇約實人，睇吓等陣放工點先。」
隨着胡定欣離巢，「胡說八道會」僅餘子羚一人留守無綫，問有冇考慮新發展？她笑說：「TVB盃問咁嘅問題？大膽！唔可以咁樣㗎！做人要飲水思源。」談到日前與李施嬅慶生，她說：「餐飯係施嬅請嘅，可以用『價值不菲』形容，佢話大豐收搵到啲錢，想請我哋食飯，我都好戥佢高興。（傳佢參加《浪姐7》？）冇特別問佢，但如果佢同胡定欣獲邀嘅話，相信好大機會答應，其實我都好想參加，不如無綫搞番個類似嘅節目。」
同場的陳煒心口開窿非常性感，她風騷大讚老公識做：「今朝9點幾有人撳鐘送花。（嘈醒你？）唔會，我一早起身化妝。」並透露新年會跟老公及另一對朋友外遊，下月再進組拍劇。至於丁子朗早前與吳若希、戴祖儀在飛機商務艙拍片，被批炫富，他認衰說：「係我哋冇諗得太仔細，絕對冇揶揄人嘅意思。（唔開心？）冇，又唔係第一次畀人鬧，但真係要反思。（邊個提議拍？）唔講得，一係話我囉！都畀人鬧咗喇！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
