藝人方力申依家有女萬事足，家庭美滿，同時佢都要搵多啲奶粉錢養家，尋日（26日）佢趁生日正日，宣布將於5月16日假紅磡香港體育館開騷，望以人生最佳時間登陸紅館，令一眾Fans期待。見佢公開演唱會Poster中，染上一頭金髮嘅佢神采飛揚，以一身螢光粉紅西裝晒出靚仔三七面，手上亦有同色高帽，並配襯彩藍色背景。點知Poster公開不夠一日，就有眼利網友發現該海報同資深歌手尹光於2023年嘅紅館宣傳海報極為相似，以同色系西裝配以彩藍色背景，雖然二人動作唔同，但成個concept相似度非常高，有網友即問係咪搵咗同一個Design團隊，更惹嚟抄襲疑雲。
亦有網友對方力申個唱嘉賓好有興趣，留言問可唔可以同當年合作過嘅李彩華及陳曉東，最想聽三人合唱《兩男一女》。
今日（27日），小方再次晒出新相，見佢去到紅館外面打卡，留言稱：「對於一位香港的流行歌手來說，紅館絕對是夢想成真的地方。在一年多裏，我的偶像們如四大天王都在這裡演出，而我也將在這個舞台上實現我的夢想……經過25年的努力，我終於有機會登上紅館舞台，渴望以歌手的身份展示自己。我會以最佳狀態來提升自己，向大家展示我的表演。」未表演先興奮。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
