由MIRROR官方歌迷會主辦《Hi MIRO! Garden Party 2026》首輪活動，一連五日、共6場於麥花臣場館舉行。尋日（26日）率先現身嘅有Alton，Alton型格踩單車進場，唱出《道路使用者的有型守則》，將現場氣氛推向高潮。其後與MIRO（MIRROR官方粉絲名）大玩砌車遊戲，勝出者就收到由Alton從世界各地親自挑選嘅小禮物。隨後，Alton獻唱《非物質文化遺產》，並邀請四位MIRO上台寫生。當中亦有Alton分享心底話環節，直言只要粉絲出現，就係對佢最大鼓勵，期間更一度哽咽，感謝粉絲的陪伴與支持。最後粉絲逐一上台領取絨毛花，見面會落幕。
雖然官方釋出資料及相片都見到Alton見面會樂也融融，但網上就出現大批不滿嘅聲音，更出現脫粉潮！Alton僅為MIRROR中打頭陣做第一場，就已經被粉絲鬧爆，當中於台上整個城堡將佢同粉絲隔開及遠距離派花環節，已成為眾矢之的。
有去到現場嘅粉絲指，未知係咪為咗配合大會日前公布嘅「不得要求與MIRROR成員進行任何額外互動」條例，Alton派花時以四層以荷蘭風車屋仔造型紙板相隔粉絲，現場同時有6位工作人員保護Alton嘅同時，亦有粉絲於拍片時被工作人員刻意阻擋鏡頭，當粉絲攞咗花就立刻被趕走等，令部分Fans感覺被公司處處防備，將Fans當「危險人物」，引發不滿及失望留言湧現，唔少人形容活動似侮辱粉絲、掠水，不尊重粉絲，將粉絲當成洪水猛獸，似深怕會攻擊偶像。
另外，今次現場布置以Q版荷蘭風格為主題，於屋海之中穿插過橋過河，加上送花環節等，反被粉絲嘲笑似足送殯：「前兩年都好哋哋，依家搞到個感覺勁差，MKD係咪真係咁唔鍾意我哋繼續追Mirror？」、「好似送殯，擺低支花，瞻仰遺容⋯⋯ 之後走。點解間公司做到咁肉酸」、「下年會唔會好似探監咁，要隔住玻璃，用電話溝通」、「可能要整定水炮車Standby」。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
