男團MIRROR兩大人氣王姜濤與盧瀚霆前晚同台演出，兩派粉絲應援由場外鬥到場內，各自落力為偶像搶焦。當提到盧瀚霆夥拍日本女神木村光希拍攝英語劇，姜濤即大表羨慕，並形容自己英文水皮，希望有機會參與類似的拍攝，好讓英語水平得以提升！
男神姜濤與盧瀚霆（Anson Lo）前晚聯袂許廷鏗、陳柏宇及COLLAR成員Candy與Ivy So等，雲集啟德綜藝館參與一個廣東歌慈善演唱會。場館內姜濤與AL粉絲人聲鼎沸，幾乎遍布每個角落，雙方應援燈不時亮着形成一片燈海，開場前雙方粉絲更分別於場館外影大合照。AL登場獻唱自己歌曲《Megahit》及《你都有今日》，席間形容廣東歌陪着自己長大，度過開心與不開心的瞬間。而壓軸出場的姜濤則特別選唱已故歌手陳百強名曲《等》，他坦言出道前對廣東歌了解不深，如今覺得身為歌手責任很大，要將廣東歌承傳下去。
完騷後兄弟倆齊齊受訪，AL有份拍攝的英語劇《The Season》推出在即，劇中他更與木村光希關係曖昧，他透露：「我戲份唔多，客串演番自己，但喺戲內嘅我有好多名人朋友，係一個好有經驗嘅歌手。我同光希就有場戲親密少少，大家有啲好感，但又唔係太多，所以排戲時都傾咗攞個Balance。（戲外你哋傾啲乜？）食嘢，因為開工我冇點食嘢，好想了解光希食啲咩，原來佢咩都食。」他又指今次最難忘是拍攝一場歌舞場面： 「嗰場戲好得意，好似有少少百老匯Feel加少少音樂劇元素咁。」
唱偶像陳百強歌曲
問到倘若再有類似演出機會的話，最想與哪位國際級演員合作？AL笑謂：「我呢啲小薯，有得拍邊個都想合作。」身旁姜濤即提議剛有新劇推出的韓星Jisoo，又提到隊友Stanley，搞到AL答：「Stanley唔係外國喎，佢係香港大前輩，ViuTV影帝，仲係電影界超級新星！」令全場爆笑。姜濤則坦言對AL有機會拍英語劇大表羨慕，且自揭弱點謂：「講英文呢啲我不嬲都好差，真係好想練好啲。」
談到前晚特意選唱《等》，姜濤直言與媽媽都是陳百強粉絲，《等》更是自己心水歌單。提到去年王晶曾批評他「人肥歌雞舞賤」，日前再形容陳百強音域窄，可謂到處辣着火頭，姜濤O嘴表示：「有咁嘅事？我冇了解過喎。（你咁細個都鍾意陳百強？）我都唔細啦，27喇！細個都聽屋企人播佢嘅歌，耳熟能詳。」剛完成英國巡唱的他，自爆未有時間為MIRROR團歌錄音，要待稍後完成多倫多站演出後才能走進錄音室，不過未知是否經常遊飛機河關係，他竟然連何時起程也要經理人提醒。至於有網民發現他頭頂髮線分界明顯，疑似用髮片增加髮量，擔心他有脫髮問題，姜濤大方回應：「我成日夾髮，都要留意吓，食乜可以保養？注意吓啦，應該冇事啩！」
另外，提到隊友Jeremy、Jer及Edan早前相約佘詩曼竹戰，AL笑說：「我渣，未去到嗰個Level可以同大家打牌。（你輸畀佢哋？）我渣，但會贏錢，佢哋唔會同我玩，成日覺得我打得慢，同埋我唔識造牌，又聽唔明佢哋嗰啲打牌術語，等我鍛煉吓先啦。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
