陳法拉代表《贖夢》出席金像獎 張家輝預告缺席：去第二到做嘢
第44屆香港電影金像獎將於4月19日舉行，陳法拉透露將會出席，而丈夫則未會來港陪同亮相紅地氈：「唔會呀，佢要湊小朋友，我都諗住即日來回！」在旁的張家輝隨即開玩笑指：「咩先生呀？我咪先生囉！」但亦補充指自己未能參加金像獎：「嗰日法拉會代表我哋，我就唔喺香港、謙仔都唔知喺唔喺，因為我去咗第二到做嘢。（無法唱原創歌曲？）唱Live？《吻別》呀？好遺憾出席唔到，我遙控去關注，希望會有好成績！」
張家輝為興趣唱歌 呼籲網民提供歌單考慮出碟
張家輝一直熱衷唱歌，但多年來未有積極發展歌唱事業，對於古天樂、馮德倫相繼激活男歌手身份，張家輝大笑推卻：「我對唱歌冇太大野心，到咗咁嘅年紀都為興趣，我冇乜所謂！你整張歌單嚟（網民畀歌單？）好喎！嚟呀！」似乎有意採納網民歌單意見考慮出碟，更突然唱起賀年歌《歡樂年年》大展歌喉，炒熱春茗氣氛！
張家輝當年為《激戰》操肌 竟因馮德倫流產電影開始？
談到馮德倫，張家輝忽然憶述一段十多年前拍攝《激戰》前健身的往事，首度自爆起源：「我冇同人講過，你哋唔好話畀人知！嗰時點解我會練肌肉，就係馮德倫搵我做魔術師，要喺水裡面拆解啲鎖、飆返出嚟，仲要除衫添！咁我就去健身啦，點知練練下佢話開唔成，跟住《大追捕》我咪繼續練囉！但其實係馮德倫先嘅！」至於會否與馮德倫再次激活該部流產作品，張家輝則笑言：「唔駛除衫咪做囉！」
陳德森揚言開拍《1941》 張家輝親證真有其事：未有劇本慢慢傾
至於新作方面，張家輝與鍾雪瑩合演父女新戲《我阿爹想旅行》早前推出劇照，張家輝透露未知上映日期：「我唔知佢幾時上喎，不過嗰部係好嘢嚟喎！我覺得啫！」陳德森早前揚言開拍新戲《1941》，張家輝作為巨星主演其中一員，受訪時親證真有其事，但仍處於初步了解階段：「係有初步接觸咗，當然想支持下因為佢哋未有劇本，咪慢慢傾囉！」消息指該部電影有意今年下旬開拍，張家輝未有透露更多資訊：「我唔知呀，未收到消息，劇本都未睇到。咁咪磋商下先囉！」
本文作轉載及備份之用 來源 source: http://www.hk01.com
|
鍾意就快D Share啦！
|
|
|
