佘詩曼（阿佘）及陳煒昨晚在惠州宣傳新劇，出席活動前，阿佘在網上分享跟MIRROR成員竹戰的合照，本來贏錢的她叫ERROR成員肥仔代打，結果輸清光！至於陳煒劇中上演床戰，更親自欽點昔日「戰友」古天祥上陣！
視后佘詩曼及陳煒主演的無綫新劇《正義女神》最近在內地網上平台率先播映，反應熱烈，昨晚她們率領劇中演員周嘉洛、戴祖儀、馬貫東及蔣祖曼赴惠州宣傳，眾人在商場內的玻璃天橋上亮相，雖然陳煒穿白色裙上陣，但事先知道現場環境，所以做足安全措施防走光。
阿佘獲網民稱讚演技精湛，有望5度封后，她謙稱：「唔係我一個嘅功勞，台前幕後、監製、劇本，所有人都有功勞。」劇中其中一幕她跟陳煒舌劍唇槍，她坦言第一次跟女對手演這種戲份，陳煒則自爆：「劇本唔係寫到咁，係臨場發揮，大家會疊聲，更加真實。」談到主演的《新聞女王2》帶挈廣告及周邊等不少商機，今次《正》劇亦一樣，繼續成為「吸金劇」招商，阿佘大呼開心：「感謝網民同觀眾支持，希望今次都做到更好，我能力範圍做到已經做晒。」
陳煒大爆劇中跟古天祥有親熱戲，更由自己「欽點」對方：「鍾澍佳（總監製）問我想搵邊個做對手，我揀咗古天祥，因為我同佢識咗好多年。以前喺亞視有個情人節宣傳，就係由我同佢一齊拍，仲要有床戲，大家一次生兩次熟，所以就搵咗佢。（床戲有冇問准老公？）有問過。（老公睇完有乜意見？）佢話點解段戲咁短！」
周嘉洛變奸有報應
阿佘出席活動前，在社交網上載跟MIRROR成員Edan、Jeremy、Jer及ERROR成員肥仔等打麻雀的合照，她透露因工作關係要早走，叫肥仔幫手打，結果輸清光，她笑說：「畀肥仔激死，我辛辛苦苦贏番嚟嘅錢，畀佢一鋪清袋！（點解個組合咁得意？）已經係幾年嘅事，每逢新年就會聚頭，只係大家唔知。（最後邊個贏？）當然肥仔，我咁多年來有贏過幾十蚊，但因為今日要工作，所以尋晚冇得上訴。」
至於蔣祖曼與周嘉洛劇中演姊弟，嘉洛在宣傳片中飾演奸角，經常喝罵蔣祖曼，問他會否擔心角色不討好會被觀眾鬧？他坦言已有心理準備，亦覺得劇集有討論度更為重要，又自嘲鬧「家姐」有報應，拍完後腰骨痛了整整兩周！
戴祖儀與馬貫東一同受訪，演檢控官的戴祖儀大學時曾修讀法律，問她今次是否算學以致用？她笑說：「放低咗一段時間，但思路仲喺度，好努力咁溫劇本。（畀自己幾多分？）我簡直係專業」馬貫東則指今次拍攝有很多對白，最長的一段足足有6頁紙，對他而言是很大的挑戰，祖儀附和指長對白難度十足：「仲要一輪嘴咁講晒出嚟，好彩我天生記性好，不過試過有場戲由朝拍到晚，最後要用氣音去拍，我講極都講唔到，因為一講就噴鼻涕，要Cut機再嚟過。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
