般費係曼聯最強發電機。(Getty Images)
曼聯爭奪下屆歐聯入場券形勢大好！「紅魔鬼」喺周日(16日)英超搶4大戰，尾段發力下主場3比1擊退阿士東維拉，依家拋離第5位嘅利物浦5分，重返歐聯一片光明。隊長般奴費南迪斯今場交「助攻雙響炮」，打破碧咸紀錄，領隊卡域克表明曼聯唔能夠失去呢位中場。
上輪輸波嘅曼聯，今場奧脫福出擊形勢佔優，但上半場把握唔到機會踢成0比0。不過換邊後曼聯開始發力，53分鐘般費開角球搵到「最佳拍檔」卡斯米路，後者頭槌頂遠柱笠入。維拉64分鐘一輪急攻，由老將巴克里喺門前混戰中射入追平。
曼聯尾段再加大進攻力度，71分鐘般費策動反擊交出靚斜傳，馬菲奧斯根夏接應後順勢射入遠柱；曼聯之後再換入「後備殺手」班捷文施斯高，佢果然喺81分鐘入波射成3比1。曼聯贏波後有54分，領先第4嘅維拉3分同第5位嘅利物浦5分。
般費今場交2次助攻後，今季英超助攻數字增至16次，超越碧咸(15次)成為曼聯史上英超單季助攻王，而且有機會挑戰由亨利同奇雲迪布尼保持，單季20次助攻嘅英超紀錄。般費表示：「踢我個位置，最開心就係幫球隊入波，呢個係我一大成就。全靠隊友把握得好，否則我交得幾靚都冇用。」
一直有傳曼聯打算喺今個夏天高價賣走般費，為球隊年輕化鋪路，不過領隊卡域克賽後表明：「關於球隊嘅未來計劃，我好難參與太多，但係我可以話，般費肯定係我哋唔想失去嘅球員，佢對曼聯非常重要，我哋絕對唔想失去佢。」
足球博彩神器，每日重心提供盡在《彩報》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
