68歲藝人梁家輝、36歲的廖子妤大熱封金像影帝影后，首度入圍的廖子妤「一擊即中」封后，而梁家輝則5度稱帝。台上爆喊的廖子妤事後表示雖然吃了鎮靜情緒的藥物打底，但最終難免緊張，更坦言希望打破「3年魔咒」：「唔想冇戲拍。」「最佳電影」由《再見UFO》奪得，《風林火山》共獲得8獎成全晚大贏家，至於獲11項提名的《尋秦記》全軍覆沒，令人大跌眼鏡！
影壇盛事《第44屆香港電影金像獎》昨晚假尖沙咀文化中心舉行，一眾電影圈人傾巢而出，有份提名影帝、影后的古天樂、梁家輝、張繼聰、章子怡、廖子妤、馬麗、許恩怡及陳法拉等登場，現場星光處處。事前有11項提名的電影《尋秦記》來勢洶洶，最終捧蛋收場！電影《醬園弄．懸案》有7項提名，章子怡及導演陳可辛雖然都有現身，但同樣冇獎落袋。
首度入圍即封后的廖子妤聞得得獎後表現驚喜，一臉難以置信，及後步上台領獎，惹來全場歡呼聲不絕。開始致謝詞時她激動得難以啟齒，哽咽後坦言：「我呢排好亂，一路消化緊件事，外界話我係大熱，我就好驚被他人眼睛注意，不過我太鍾意做戲，兩樣嘢相沖，不過人一世物一世！好多謝所有支持我嘅人，我嘅父母，呢個獎獻畀你哋，多謝你哋從來冇懷疑過我嘅決定！」此時台下高呼其男友盧鎮業名字，她才醒覺並公開放閃說：「多謝小野（盧鎮業）日日陪我傾偈。我22歲嚟香港發展，第33屆金像獎攞『最佳新演員』，今年44屆攞『最佳女主角』，希望第55、66屆我都依然可以參與金像獎。」
梁家輝今年憑電影《捕風追影》成功第5度稱帝，亦是他自2013年憑《寒戰》後再次獲此殊榮。一身白色西裝造型的他瀟灑上台，淡定表示：「Very good，今年係金像獎44周年，亦係我入行第44個年頭，有提名已別具意義，攞唔攞到獎對我嚟講都係終身榮耀！多謝金像獎評委、《捕風追影》導演同製作團隊，係你哋出眾設計先增加到我角色嘅狠勁，多謝戲中我幾個養子，令我有當父親嘅感覺。多謝經理人呢幾年忍受我嘅責罵，多謝屋企人，尤其我太太忍咗我44年，好多謝！」隨後他激動哽咽，向台下鞠躬時眼泛淚光，並高舉及輕吻獎座，全場歡呼。
杜德偉奪「最佳男配角」
「最佳男配角」由《風》片的杜德偉擊敗勁敵《水餃皇后》的袁富華奪得，頒獎嘉賓形容他是「被唱歌耽誤的演員」，首次提名即奪獎的他開心表示：「多謝金像獎評委認同我嘅角色，我好耐冇喺香港電影演出，今年係我入行41年，真係意義非凡。要多謝麥浚龍導演對我嘅信任，我本來諗咗好多嘢要講，依家全部唔記得晒！多謝我拍檔梁家輝，我攞咗劇本第一時間去佢屋企，佢用咗一晚同我分享對角色嘅睇法，非常精彩。」及後他於後台受訪，坦言已20年未有拍戲，猶記得2003年曾與前輩吳孟達合作，被對方熱誠啟發，更獲贈書籍《角色的誕生》，令他開竅明白甚麼叫演戲。
周秀娜派心搶鏡王丹妮「賣大包」
每年金像獎的紅地氈均是女星必爭之地，但今年就略為失色，未見突圍。不過周秀娜與譚旻萱依然搶眼，周秀娜以黑色高衩Tube Dress晒肩騷腿，又狂派心心，譚旻萱則身穿單肩銀色露背連身裙，非常吸睛。至於擔任最佳衣着獎評審的王丹妮就「賣大包」，以低胸晚裝亮相，期間其裙襬被鞋子勾着，她彎身整理時意外「倒奶」，談到有份主演的電影《夜王》推出導演三級版，她稱未有時間捧場：「因為之前好忙同有少少唔舒服。（片中你有親熱鏡頭，會唔會畀老公羅孝勇睇？）佢返香港會叫佢睇，我都有備案，老公都係做呢行，佢好支持我。好開心依家出街好多人叫我角色名CoCo姐。」而曾獲最佳女配角的梁雍婷打扮最搏命，密實西裝內有乾坤，僅以黑色交叉帶遮掩，大晒半球，她直言造型出自去年「最佳衣着」得主盧鎮業造型師之手，談到如此性感是否需要衝破心理關口，她說：「冇，紅地氈都係表演嘅一部分。（件褸除得？）之後再分享，希望大家留意我嘅專業。今次我嘅任務係做頒獎嘉賓，到我有入圍先再性感啲」
舒淇膺新晉導演：因為我老
女星舒淇憑首次執導電影《女孩》撼低《風林火山》的麥浚龍，贏得「新晉導演」獎，她領獎時笑言：「好多謝香港電影金像獎，我29年前喺呢度贏得最佳新演員同埋女配角，今次贏新晉導演，係我有30幾年演藝經驗，贏獎係因為我太老喇！多謝我嘅團隊，多謝香港、香港嘅朋友！」
事後她受訪被問到何時再執導？她說：「呢次我寫埋，用咗十幾年時間，再拍可能要20年，不過有好多劇本搵我，睇吓點做。（想唔想下次攞影后？）我入圍好多次，但都冇，志在參與。」至於今次如何慶祝？她笑說：「明天早機，一陣返屋企瞓。（馮德倫有冇嚟？）佢喺後台，要做Idol嘛。（影番張相？）要，唔影相又話我哋感情有問題。」
馮德倫窒陳奕迅爆笑
陳奕迅（Eason）、馮德倫昨晚擔任頒獎嘉賓，老友聚頭，妙語連珠，馮德倫先問Eason為何很久沒在港拍戲，他推說忙巡唱，卻被指：「咁你又有時間打網球？」Eason解釋要Keep Fit，馮德倫卻說：「但我見你Po好多食嘢相。」Eason即大喝一聲，嚇到對方立正，場面搞笑！二人又率領全場一齊做手勢，大講：「支持香港電影！」而他打頭陣表演時，未知是否音響問題，被網民指「唔啱音」。
鄧濤挫李佳芯奪「新人」
演員李佳芯憑電影《金童》入圍「最佳新演員」，獎項最終由電影《女孩不平凡》的鄧濤奪得，她受訪時直言開心又興奮，會約朋友及團隊慶祝。
至於首次出席金像獎的李佳芯，賽前表示不緊張，反而享受在海邊行紅地氈的感覺，又指獲提名已經當贏了：「好難得有提名，多謝監製將我個名加入新人名單，我以前拍過電影負責過鏡角色，當年有一句對白，我今次都有問仲算唔算係新人。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
