近日有傳無綫強制接管旗下藝人的社交帳號，拒交者或面臨被「雪藏」風險，其中視帝張振朗與花旦郭柏妍盛傳成「抗旨」大軍，振朗女友楊偲泳前日在活動中力挺抗旨有理，揚言自己不能接受，狠批有關政策如踩鋼線；至於郭柏妍更拍片自抽「入公司雪櫃」獲網民大讚！
近日有指無綫推出辣招要求旗下藝人交出私人社交帳號給公司統一管理，以防藝人在網上行為引發公關災難及得失內地市場，相關政策引起不少爭議，其中張振朗及郭柏妍被傳「抗旨」而失去工作機會。
張振朗至今一直潛水未就消息作回應，不過，女友楊偲泳前晚出席主演的電影首映禮時就大膽開腔力撐男友，她先是語帶揶揄反問：「乜嘢命令？」、「得嘅咩？」、「係私隱！」之後續說：「以為講笑，照計唔會咁做，自由㗎嘛，唔知其他公司安排，不能夠評論，自己就未遇過，我唔係咁清楚，估應該唔會有呢啲決定。」直言無綫這種做法猶如踩鋼線，問到如果公司要她交出社交平台密碼，她會否答應時，她謂：「梗係唔得我入面好多同Fish（廖子妤）嘅對話，公開咗畀人知道點算呢？唔可以㗎！」又強調一來是私隱，二來社交平台反映個人喜好，是與人溝通的平台，屬於個人空間，甚至男友也不會知道她的密碼，提到有指張振朗被雪藏而失去商演機會，她講笑謂：「可以搵我，有工作機會可以搵我。（男友冇得撈啲工作就搵你？）邊個冇得撈都可以搵我，我會為電影付出。」
至於郭柏妍亦冇正面回覆，但她昨日在社交網上載新片，配文可圈可點，明顯就雪藏傳聞而自抽說：「我進去公司雪櫃了，公司便利店的雪櫃。」片中見她打開便利店的雪櫃揀飲料，網民紛紛留言支持她：「估唔到你咁有個性，更加鍾意了。」然而，未幾便發現她把相關視頻刪掉，未知是否因話題太敏感而被要求刪除。
朱敏瀚：同佢唔係好熟！
另外，近年備受力捧的周嘉洛與朱敏瀚昨日為無綫綜藝節目《試真D》宣傳，對於公司有意「統一管理」藝人社交帳號而引發私隱恐慌，兩人均未敢多言。在劇集《正義女神》飾演法官的周嘉洛回應時搞笑地閉起雙眼說：「有聽過，冇搵過我，等公司回應好啲，公司好似有發到聲明。（如果實行擔心冇私隱？）呢啲真係要睇真啲，都係講番《試真D》。」朱敏瀚指公司未有問他取社交帳號，並拉張振朗落水：「如果有，咁就要問吓張振朗。（話張振朗企硬唔交出被雪藏？）同佢唔係好熟，哈哈！佢有做緊嘢嘅，一定冇畀人雪。」而張寶兒昨日出席無綫活動時對公司的做法未有太大抗拒：「冇人搵過我，但有聽聞過，如果公司有足夠資源，可以分擔成本係好事。（唔擔心接管帳戶冇咗私隱？）都擔心，應該係有限度嘅合作，要好深入去再傾。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
