藝人袁富華（Ben）憑電影《水餃皇后》角逐本屆香港電影金像獎「最佳男配角」，面對被喻為勁敵的《風林火山》杜德偉、《拼命三郎》的林家熙，尤其杜德偉演繹癲喪大佬一角，明顯比Ben所演的「糖水伯」更易搶Fo。問Ben可會覺得角色上有所輸蝕？他謂：「評審一定有自己嘅角度同指標，每個角色點演繹，都關乎本身角色嘅設定，杜生（杜德偉）需要爆發型，外露咁去演繹，因為導演用呢個方式去說故事，糖水伯就係小品型，角色要將善良去隱藏，要恰到好處去幫導演去講故事，呢啲評審都會去考量，同埋過去都有唔少內斂型嘅角色得到獎，好似《叔．叔》嘅太保，《天水圍旳日與夜》鮑姐（鮑起靜），佢哋嘅角色都唔爆發型。當然入得圍嘅演員都一定好，最好5個都可以攞獎。」
Ben拍過不少電影作品，其中令觀眾留下深刻印象的，當然要數《喜劇之王》的黑幫角色，一句「你唔係外賣仔？！」至今仍令不少網民津津樂道，Ben亦笑言：「我依家每年都會喺演藝度教一科，每次上堂一開聲，啲學生都會嗌呢一句。」當時他們一個是影壇笑匠周星馳，一個是劇團演員袁富華，甚麼原因令兩個不同範疇的人走在一起？他說：「人與人之間嘅緣分係幾奇妙，當年周生（周星馳）住喺中環，我任職嘅劇團亦都係個度，周生好鍾意跑步，當時又搞緊一個故事關於街坊劇團，咁佢就入咗嚟，搵我哋藝術總監古天農傾偈，想做資料搜集，之後睇咗我哋一齣舞台劇《專業社團》，我飾演一個教人打劫嘅老師，係一齣幾荒誕嘅劇嚟，咁佢之後就搵咗我演《喜劇之王》，我本身角色係吳孟達演嘅臥底，但因為我有劇團正職，時間唔允許，所以最後只能夠演黑幫頭目。（臥底戲份會比較多，會唔會覺得可惜？）唔會，每個人嘅際遇都唔同，唔好望返轉頭，依家都幾好，做達哥嘅角色又可能係另有天地，好多嘢都唔知，我會放眼目前做好當刻嘅嘢。」
周星馳拍戲出名認真，絕不會是電影所見的喜感人物，當年同周星馳合作，有無給對方的氣場壓倒？袁富華則表示理解：「我覺得佢係一個藝術家，無時無刻都係度創作緊，喺片場度可能有時會忟咗，但其實我係好理解，因為我喺舞台劇嘅排戲室成日都會見到，因為佢不斷咁去諗，有時未必一下子可以靠說話去傳遞度自己嘅意思，個一刻佢會好忟憎，但唔係發脾氣鬧，呢啲我已經司空見慣，所以我只會集中精神放喺每一個Take度。」
袁富華是圈中首位集齊香港金像獎、台灣金馬獎以及內地金雞獎的「三金男配角」，這5個字對他來說既是動力亦是壓力。每次接演角色，無論戲份多寡，他都會花盡心思去演：「回想返做劇團個陣，一年做4、5個戲，有時角色會係相類似，但我會去發掘角色嘅唔同面向，好似《殘影空間》與《贖夢》同樣是飾演家暴父親，《贖》片導演張家輝都曾經問我：『咦，依家做嘅角色同《殘影空間》差唔多喎！』我當時答佢，你見唔到我搵到個分別，佢作為導演，其實都講咗個分別，家輝畀我嘅方向，係一個因為生活壓力、愛面子，而唔可以將自己情感向外發洩嘅爸爸，惟有喺屋企發洩，同《殘》片嘅家暴爸爸，飲醉酒就係咁打，死不悔改，係有唔同嘅分別，當然家輝都知道，只係想以輕鬆方法去了解我嘅想法。」
袁富華近年電影一部接一部，被喻為「最佳綠葉」，問他對「配角」兩字有何看法？他謂：「首先我唔覺自己係最佳綠葉，我只係覺得人最緊要知自己企係邊度，我唔係一個咁容易撞到個劇本做到主角嘅人，多數都係配角，一部戲需要有唔同角色先可以行出嚟，以《水餃皇后》為例，女主角馬麗係一個好強嘅主角，要對唔同嘅人，有唔同層面嘅演出，點樣可以張連唔同嘅人帶出唔同嘅層次，就要靠每一位配角，去幫佢達成唔同嘅層面，去支持故事嘅發展，喺我嘅位置，我會盡我所能，喺我嘅章節度成就主角，如果個個配角都想搶戲，就會打斷晒條故事線，套戲就唔會好睇。」
場地提供：東南樓藝術酒店
本文作轉載及備份之用 來源 source: http://hk.on.cc
|
鍾意就快D Share啦！
|
|
|
