日前本報獨家爆料無綫最長壽處境劇《愛．回家之開心速遞》將「停拍」的消息，引起全城熱論，網民瘋狂洗版表示大感不捨，就連之前批此劇愈睇愈無聊的劇迷都「反口」表示：「講吓啫，唔使咁認真嘅，話停就停」、「可唔可以唔好咁突然」、「簡直係世界末日！」其實最難捨的都是陪住大家10年、足足拍了2,800多集的劇中演員。
處境劇《愛．回家之開心速遞》即將「告別」已是事實，觀眾最不捨的劇中演員包括被指是劇中「定海神針」的「熊樹根」劉丹、兩大人氣配對「龔水CP」張景淳與呂慧儀、「蓮輝CP」林淑敏與許家傑、「熊尚善」滕麗名、「金城安」周嘉洛、「大龍生」羅樂林、「KC」歐瑞偉、「Terry」李偉健等。由於全城瘋狂喊不捨，有人表示現時開始會由第一集開始重看，不少人亦建議劇集大結局時要來個全員亮相，包括已離巢的「細龍生」鄭世豪及「細龍太」陳思圻、「博士」馬貫東及「Mandy」謝芷倫，至於大家最期待出現的結局場口就是大小姐生仔、尚善與潮偉結婚、風少與素素分手及「龔丸」出世。
劇集《愛．回家》7月將完結，可說是畫上完美句號，縱使有指之後會開拍全新處境劇，但未必全員坐鎮，故劇中演員心情亦相當忐忑、不捨。「處境劇之父」劉丹由《真情》、《愛．回家》第一代拍攝至今，他前晚接受本報訪問時多次強調「唔使驚」，「TVB做嘢都好穩陣，聽日返到去就知道咩事。唔使驚，唔使驚！」而昨日他接受無綫節目訪問時，難免感觸良多：「點講呢，我依家梗係唔捨得不過諗深一層，天下無不散之筵席。」又笑言寄望在新處境劇會有新嘗試，又搞笑呼籲各人「𢱑撈」：「我哋一於一齊報名！」足見眾人對新劇十分期待。
林淑敏多得「大小姐」打響名堂
至於甚受觀眾歡迎的「龔水CP」張景淳與呂慧儀，在劇中還未有BB，網民都希望二人的愛情結晶品「龔丸」會在大結局出現，呂慧儀接受本報訪問時謂：「雖然唔知幾時會停，如果要停就梗係會唔捨得，不過有開始就會有結局，都希望嚟緊有更精彩嘅處境劇睇，可以參與就更好。」問到之後會有甚麼打算？她續說：「如果拍完大結局，我會唞一唞先，畢竟咁多年冇停過，畀啲時間自己回味一下努力拚搏嘅呢幾年。我自己嘅教育中心一路都有做緊，有時間就再進修吓。」而「龔燁」張景淳前晚在社交網提早跟網民說再見，他謂：「都拍咗9年幾，非常唔捨得，喺最後呢段直路，我會落力拍好佢，好多依家剛剛畢業嘅年輕人親口話我聽，呢套佢哋由細睇到大嘅劇，所以一定要做好佢。（拍完會做咩？）咁之後嘅方向都係聽公司安排，佢哋嘅安排比我自己周全好多，我會喺休息階段再增值自己同Train吓Body。」
而最鍾意叫人「Shut Up」及篤人「魂精」的「大小姐」林淑敏受訪時感觸良多，她坦言最難忘是新冠病毒爆發的時候，《愛．回家》全劇組仍然堅持拍攝，每朝提早返公司做檢測，未到Roll機都不除口罩：「個個拍時臉上都有口罩印，諗番起就想笑……但當時覺得係一份社會責任，大家都冇得出街食飯同玩，如果我哋唔堅持，大家就少咗一份娛樂。」她又特別多謝高層曾勵珍大膽起用她演「大小姐」這個角色：「我之前都係籍籍無名嘅路人甲。」而「送水輝」許家傑指整個「旅程」都好難忘：「『送水輝』呢個角色好多成長，由一個送水嘅，跟住變咗做『尋寶圖』嘅職員，再之後開咗『好爸bar』做老闆，甚至乎依家真係所謂嘅宋總監，呢個旅程真係過咗我另一個人生。」他又指之後有甚麼挑戰，甚至是新處境劇需要他時，都會盡120%的力做好。
周嘉洛死黐「媽咪」滕麗名
至於「熊尚善」滕麗名與「金城安」周嘉洛這兩母子亦難捨難離，滕麗名笑言《愛．回家》精神長存：「就算話完，其實對我嚟講唔係完，我諗我個仔係繼續會搵我！咁我覺得阿爸（劉丹）就唔使講，我由《真情》對到佢依家，呢個（《愛．回家》）精神絕對係可以順延落去。」說畢還率領眾人大叫熊家口號：「熊家精神係咩呀？見得人拜得神，唔會失禮人！」至於「金城安」周嘉洛直指熊家關係不會變：「有幾可可以同人拍到10年嘅戲，好似真阿媽、真公公，真姨姨一樣……所以係唔會完嘅，因為我知道大家會Keep in touch。」並順道𢱑撈拍攝新處境劇：「再者新嘅Sitcom睇吓可唔可以又舔到啲。」
至於「高栢菲」湯盈盈受訪時謂：「我今朝先同個女講，媽咪呢個角色就嚟做完嘞！好唔捨得呀！我都好唔捨得我個金髮，唔知之後Keep唔Keep好！」問到新一套會否想參與？她坦言：「想呀！都想繼續拍，其實除咗我哋一班演員，幕後工作人員都日日見，都好唔捨得佢哋。」另外，羅樂林飾演的「大龍生」一角深受觀眾喜愛，由於劇中故事一開始就圍繞劉丹的「熊家」及羅樂林的「龍家」為主，如今劇集停拍，羅樂林受訪時坦言一定有不捨，笑言現時出街都被人截住問套劇何時完，問到之後開拍新處境劇會否想參演時，他直言：「我都就嚟80歲咯！都拍咗60年戲，啲仔女都有叫我退休，好在我身體托賴冇乜嘢，我日日都Keep住做運動，最緊要身體健康。」他又指現時大環境影響，幾乎每日都有同事派散水餅「Say Goodbye」，所以做人都唔好咁執着，開心就得。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
