▲資深電影製作人谷薇麗逝世，胞弟谷德昭發文悼念。
- 資深電影人谷薇麗月初離世，享年73歲
- 谷薇麗曾監製《縱橫四海》等經典港產片
- 她亦投身慈善，擔任香港血癌基金會會長
香港血癌基金會會長、谷德昭胞姊、資深電影人谷薇麗（Linda）月初離世，終年73歲。林谷薇麗丈夫為金源米業集團主席林炯熾，據指她在5月2日突然離世，家屬訃告指於5月14日設靈，翌日移靈聖約瑟堂舉行儀式，之後奉移歌連臣角火化。
Linda在港大主修英文及翻譯，在1976年畢業後加入麗的電視任助理編導，曾參與製作與執導綜藝節目及劇集，比如《貓頭鷹時間》、《鱷魚淚》等，在80年代初應曾共事施南生邀請轉投電影界，加盟新藝城主力處理行政同人力資源工作。
因Linda有豐富影視製作經驗加上英語好，後以製片身份參與電影海外拍攝如《英倫琵琶》等。
之後在1985年，轉職德寶電影主責行政監製，管理拍攝進度同製作預算，參與統籌《皇家師姐》等影片，亦曾監製李小龍兒子李國豪主演電影《龍在江湖》等。當年，由高志森、于仁泰、馮世雄「三人組」在德寶製作的影片都由Linda監製，比如《痴心的我》、《富貴逼人》等，以及為經典港產片《秋天的童話》任統籌。
谷德昭近況︱谷德昭與女友林子萱睇張學友演唱會 再瘦一圈用拐杖行路步伐蹣跚
谷薇麗逝世︱監製《縱橫四海》《辣手神探》等經典
在90年代，Linda與吳宇森、與吳宇森、張家振合組新里程電影有限公司，參與監製《縱橫四海》、《我愛扭紋柴》及《辣手神探》，並出任《浪漫風暴》行政監製，期間又與張家振成立東興電影有限公司，製作《花旗少林》。
Linda監製及製片作品逾20部，為香港電影黃金期創造歷史。在90年代中，她為照顧家庭退出影圈，熱心社會公益的她專注慈善工作協助血癌病友、思覺失調患者及家屬。過去多年，她以血癌基金會會長身份出席籌款活動，陳寶珠亦經常為好友活動任嘉賓，劉德華、鄭伊健、林海峰等亦曾現身支持，導演胞弟谷德昭常為活動擔任司儀。
谷薇麗逝世︱谷德昭悼念二家姐
谷德昭在今日（5月11日）凌晨，於個人社交平台上載數張與姊姊昔日合照發文悼念姐姐，他先簡介姐姐在影壇成就，寫道：
林谷薇麗
LINDA 我二家姐
細個嘅時候好乖，讀書好叻，香港大學畢業。
跟住佢加入咗麗的電視做助理編導，佢好享受佢嘅工作，認識咗好多有趣嘅人，佢哋都成為咗二家姐一生嘅好朋友。後來輾轉喺新藝城、德寶電影公司擔任要職。傳世作品包括有：縱橫四海、我愛扭紋柴、辣手神探、秋天的童話……
然後，谷德昭回憶二家姐昔日生活點滴，稱：
後來佢結咗婚，跟住有咗小朋友。
LINDA除咗好照顧自己嘅家庭，亦都好照顧自己兄弟姊妹，即係我。
LINDA經常親手落廚請食飯，幾位家姐當中，佢包山東水餃最叻，煮嘢食嘅材料都好講究，甚至連酸薑都係自己浸、香葉都係喺自己花園種㗎。
除咗照顧佢愛嘅人，佢亦將佢嘅愛分俾有需要嘅人，佢擔任香港血癌基金主席超過20年，聯同梁憲孫教授、陳寶珠女士、奚仲文先生同埋朱祖兒先生一齊無償出力推廣。香港血癌基金籌得嘅善款幫助咗好多患有血癌嘅病友，令佢哋得到更好、更新嘅藥物治療，亦都令佢哋嘅生活質素得到提高。
谷德昭回想當初自己入電影行，也是受LINDA影響，表示：
我細個嘅時候，因為二家姐已經喺新藝城、德寶做緊嘢，所以佢成日會帶好多未上映嘅電影錄影帶返嚟屋企，佢又唔介意俾我睇，我諗我對電影嘅興趣就係由嗰時開始。
後來我讀完書返香港，二家姐已經係一位非常成功嘅電影監製，憑住佢嘅關係，我順利加入電影圈，前輩們都因為好人緣嘅二家姐而好關照我。最初二家姐有擔心唔知我適唔適合做電影，幾年過去，我繼續有得做，仲做得唔錯，養得起自己，亦帶俾好多好多好多觀眾歡笑，我見到二家姐面上有為我感到驕傲嘅笑容。
最後，他表達無限的懷念之情，稱：
我哋兩個同生肖，性相近，好好傾。年紀越大，我哋越親近，後來我再親熱啲叫佢做老二。老二成日同朋友食飯都帶埋我去，我又跟埋去， LINDA嘅老友鍾珍話：「你咁大個人都算黐家姐喎！」係呀！我係㗎！
我哋每個禮拜都會見兩、三次面，每晚都會通過WhatsApp，傾吓電影、傾吓世界大事、傾吓八卦、傾吓拼多多有咩平嘢賣，老二臨走前嗰晚我哋都有通WhatsApp，佢話個 Omakase好好食！
老二，我記得你曾經講過，如果第日要離開呢個世界，最好就係不知不覺咁喺屋企，瞓覺中離去。天父您突然咁樣召回咗老二，我相信您身邊一定係好等天使用。
老二啊，你離開咗，我失去咗一個二家姐、一個好老師、一個好朋友。我哋好掛住你！我哋一家人都好懷念你帶俾我哋嘅好時光、好回憶。我哋會繼續好好哋互相照顧，亦會將你樂於幫助別人嘅心 Pay It Forward 。
我哋會記得，每次你煮好飯，好緊張又好好笑容咁問我哋：「點啊？得唔得啊？有冇食晒啲嘢啊？」有啊老二，我哋食得好開心，每次都食晒你啲嘢。我屋企雪櫃仲有你俾我嘅木瓜仔，多謝你！
老二，如果有下一世，希望我哋繼續做姐弟，或者下次由我做哥哥，可以照顧你！
Dear sis, I miss you very very very much！
最新影片推介：
🔥全新升級Whatsapp「升學備戰Group」選校攻略｜奪A攻略｜校園動向【馬上入group】🔥
Follow TOPick Whatsapp頻道🔔，唔會錯過熱門話題!https://whatsapp.com/channel/0029Va2riKf4o7qJmRRWrr1g
免費成為TOPick會員，隨時參加有獎遊戲、好物試用、會員專享活動! 立即下載HKET APP︰https://onelink.to/f92q4m
TOPick會員迎新大招募，免費做新會員送精美禮品! 詳情:https://event.hket.com/article/3965561/?r=mcsdediart
|
鍾意就快D Share啦！
|
|
|
