演藝界「常青樹」胡楓（修哥）昨日假紅館舉行演唱會，嘉賓陣容強勁，兩代歌神張學友、陳奕迅及影帝張家輝等助陣，星光熠熠，當中陳奕迅大爆修哥的𢱑撈往事；契仔學友及家輝更將修哥跟羅蘭的緋聞擺上枱，認真斗膽！
現年94歲的胡楓昨日假紅館舉行《修哥九五至尊無限楓騷演唱會》，獲健力士確認為舉辦演唱會最年長的華語藝人，大批圈中好友羅蘭、盧海鵬、陳法蓉、陳曉華、丁子朗、古天樂媽媽及無綫高層樂易玲等捧場，演出嘉賓多達28人，包括兩位契仔張學友與張家輝、陳奕迅（Eason）、楊千嬅、莫文蔚、BIG FOUR、周柏豪、草蜢、陳松伶、汪明荃、羅嘉良及薛家燕等，而修哥4位曾孫也有上台合唱《世上只有》。
家輝拖着契爺合唱《分分鐘需要你》，期間頑皮問：「一陣間你可唔可以喺咁多觀眾面前表白你同羅蘭姐收得好耐嗰段感情？」唱畢後再說：「早前見到流出咗啲秘密相，你哋兩個打車輪喎！」修哥淡定回應：「依家有AI，呢啲算係好畀面你。」家輝搞笑「狙擊」說：「你條脷伸咗過去喎！」修哥幽默說：「AI都有脷㗎！」
其後輪到另一契仔學友登場獻唱《不老的傳說》，他亦以契爺的緋聞開玩笑，由於羅蘭昔日在《歡樂今宵》扮演「701服務公司」的接線生解決疑難，學友說：「有一輪咪傳得修哥同羅蘭姐好行吓，我打親畀修哥都問：『701服務公司有咩可以幫到你？』」又問家輝：「我都接受，你O唔OK？」家輝即答：「OK！」修哥聞言出言教訓：「人講嗰樣你答嗰樣。」3人你一言我一語，令全場爆笑，最後齊齊合唱《還是覺得你最好》，學友大讚修哥如此高齡仍能在紅館開騷，令他非常佩服及欣賞。
Eason突現身送驚喜
演唱會其中一個驚喜莫過於Eason登場，並與舞蹈員跳唱《舊歡如夢》，今次是他相隔20多年再任修哥嘉賓，直言連對方也不知情，其後再唱出於修哥70歲演唱會唱過的《Shall We Talk》。Eason透露修哥的一番話令他記憶猶新：「剛入行冇幾耐時，我喺電視城化妝間見到修哥，好開心走埋去打招呼，佢第一句問：『Eason，你有冇嘢做？』我話：『我做緊嘢喎！』佢話：『唔係，你有冇嘢畀我做？你第時記得有嘢做、啱我嘅，你就搵我。』呢句說話我記到依家，呢個前輩真係好鍾意做嘢，先會放低身段同後輩自薦合作，真係好多謝你，學以致用。」
至於久未在港露面的莫文蔚獻唱《月亮代表我的心》及《呼吸有害》，修哥大讚：「佢唔止唱歌好聽，演戲都好好，文藝片又得，喜劇扮醜女都得。」隨後為本月2日牛一的莫文蔚唱生日歌。另外，修哥感謝楊千嬅忙於巡唱也抽空助陣，千嬅表示當年拍攝電影《新紮師妹2美麗任務》時曾跟對方合作，讚他很照顧後輩。而BIG FOUR成員張衞健笑言，他們95歲時也要請修哥做嘉賓變「BIG FIVE」。
演唱會時長近5小時，修哥全程表現精靈，只是開場不久，他上落樓梯時突然Kick一Kick險仆倒，而黃日華則全程為他斟茶遞水。演出尾聲時，修哥由學友與家輝扶着出場，他坐在椅子上跟一眾嘉賓合唱《朋友》，為演唱會畫上完美句號。
騷前修哥於拜神儀式上受訪，提到演唱會門票被「黃牛」炒高3倍至3,200元，他反問：「你炒呀？（網上。）早啲出聲，等我留番一疊飛我炒吖嘛！哈哈！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
