藝人劉丹、呂慧儀、周嘉洛、莊思明（Lisa）及楊明等今日（18日）現身將軍澳電視城，出席處境劇《愛．回家之開心速遞》宣傳，齊齊大玩遊戲，期間楊明更抱起未婚妻莊思明玩遊戲，不過楊明卻爆出一句「好重呀！」，讓原先的溫馨畫面變成爆笑場面。
Lisa與楊明將於8月2日於吉隆坡舉辦婚禮，談到婚禮籌備狀況，Lisa坦言「忙到頭都暈」，因自己身在香港，很多事情也要遙控操作，感謝一班當地朋友的幫忙，她説：「好多嘢要靠電話溝通，叫佢（楊明）幫手佢又拖延症，嗌一次唔做兩次唔做三次都唔做嗰啲！」面對未婚妻公開「詐型」的楊明即搞笑解釋：「好多嘢我安排咗，但要等佢同意，其實我又唔係拖延嘅，遲少少做啫，哈哈！」Lisa即説：「你日頭叫佢做佢可以到夜晚都未做嘅，要『𡁻』佢一鑊先肯做，我成日覺得你唔快啲處理呢步，下一步咪實行唔到，佢永遠就拖嚟拖去，咪嘥幾日時間。」問到楊明會否改善拖延症？他笑謂：「改咗啦，原本2日，依家即日做，不過係夜晚啫。」Lisa對此表示「是旦啦」。
Lisa表示服裝上有朋友代勞，只需做Fitting便可，反而場地方面因之前只看過照片，要抽時間飛到當地現場視察才可決定布置安排。楊明表示原本打算筵開20席，但現時已增至25席，會視乎嘉賓回覆作實再作調整，並表示完成當地婚禮後，會在香港再辦派對宴請好友，希望盡量於今年內舉行，笑言可考慮於公司飯堂舉辦。Lisa指很多幕後同事叫她可辦「流水式」派對，方便不同工作時間的同事也可出席，她笑言要辦足一天派對未知體力上能否應付，又笑指宣布婚訊後，朋友比她興奮百倍，因大家也見證住他們由相識到相愛再到結婚。談到兄弟姊妹團，她指未婚夫想要，但自己覺得大家對當地環境不熟悉，屆時自己可能要兼顧更多事情，笑言為免激嬲自己，還是簡單為主。提到楊明指未婚妻「好重」，他即望向Lisa説：「你都係時侯要減肥！」問會否為穿婚紗而減肥？她表示一向有做運動保持身形，透露婚紗以優雅為主並不性感。
對於今次是《愛．回家之開心速遞》最後一次齊齊過端午節，劉丹坦言大感不捨，指大家見他們仍有講有笑，但其實內心也不是味兒，他説：「話晒大家一齊相處幾乎10年，雖然成日都安慰自己天下無不散之筵席，但散席都係想再見。」他期待結局能交代熊家繼續開開心心，問到會否參與新一輯處境劇《愛．回家之三代同糖》？他表示看公司安排，自己當然會想參與。
呂慧儀亦坦言不捨，她説：「之前日日見，最密集嗰陣係日又見夜又見，仲要見足24/7喎！中間又有出埠，處境嘅一家人咁耐係好難得，話冇唔捨得就假嘅。」她又爆自己仔仔與同學都表示失落：「我個仔2歲至12歲個階段，同學仔呢一代都係睇《開心速遞》成長，佢班同學仔個個識我，好似隔籬鄰舍一樣，仲問我可唔可以唔好停拍？我話公司安排冇辦法，但會有新一齣劇，佢哋嗌No，好似就快世界末日，我都要花啲時間開解我個仔。」她指兒子今年小學畢業，剛巧《愛．回家之開心速遞》完結，終於不用再煩惱請假問題，可以陪仔仔放暑假來個親子樂。談到有指她將移居內地，她坦言正在考慮中：「如果搵到合適嘅學校絕對會，阿仔冇意見，開心就得，搵到鍾意學嘅嘢、環境靚，同最緊要有朋友。」
另提到劉丹兒子劉愷威早前被指拖住新女友現身紅館睇騷，劉丹笑指對報道得啖笑，問到仔仔目前感情狀況？他説：「冇拍拖，大家有冇好介紹呀？（叫佢唔好咁高要求？）感覺佢好似唔急住，總之定啲、好啱好啱先。（佢唔急定你唔急？）佢唔急，我急過佢，哈哈！」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
