麥巴比再成法國救星。(Getty Images)
周日(5日)朝早世盃16強賽事，冠軍熱門法國面對巴拉圭「泊大巴」死守，幾經辛苦下由基利安麥巴比嘅12碼破局，1比0贏波晉級，將會同摩洛哥爭4強席位。麥巴比同美斯嘅入球競賽繼續，麥巴比今屆第7個入波，再次喺射手榜追平美斯，累積世盃第19球亦僅以1球落後美斯，兩大神鋒有排鬥！
今場比賽喺酷熱天氣下進行，場地氣溫高達攝氏37度，巴拉圭由第1分鐘就「泊大巴」全軍退守，而且防守勁多「小技術」，令法國一條星級鋒線束手無策，22分鐘先至由防中古亞迪奧干尼作出第1次射門；較有威脅埋門出現喺31分鐘，奧士文尼迪比利右路傳中，麥巴比門前走到靚位接應，但差半步僅僅頂唔到。
法國完全搵唔到空位突破，只能靠外圍射門破局，但拉比奧特同祖利斯古迪嘅遠程炮都無功而還。面對巴拉圭球員「毛手毛腳」，麥巴比一度踢到扯晒火，被犯規後同對手作出推撞，好在球證網開一面。奧士文尼迪比利喺38分鐘右路爆入禁區起腳，可惜省中對手球員後柱邊出界，法國圍攻半場都冇收穫。
換邊後法國增加壓力，51分鐘一次防守角球後快速反攻，門將邁治蘭大腳平飛球傳畀麥巴比單刀，但被巴拉圭守將回防極快及時閂出底線，麥巴比隨即快開角球，奧士文尼迪比利接應喺底線射中網側。54分鐘古亞迪奧干尼再次遠射命中，但被門將奧蘭度基爾撲出。
法國61分鐘換入迪斯亞杜伊，成為賽事轉捩點，呢位左翼落場後不斷嘗試突破，一次殺入禁區成功博到12碼，麥巴比喺70分鐘操刀射入打破悶局。巴拉圭尾段想反攻，令法國有更多機會，麥巴比喺補時連環射門都被撲出，但法國最終都保住1比0勝局。
免費玩Game、砌最強11人，一鍵share畀FD子打牙骹：
本文作轉載及備份之用 來源 source: http://hk.on.cc
|
鍾意就快D Share啦！
|
|
|
