無綫高層樂易玲明日生日，今晚於尖沙咀設下派對與親朋同歡，藝人黃宗澤、張振朗、朱敏瀚、陳曉華、蔡潔、朱千雪、劉穎鏇及丁子朗等傾巢而出賀壽。朱敏瀚與前度陳曉華同場不相見，兩人異口同聲表示不尷尬，而黃宗澤到場即「打爛醋呈」，打趣指張曦雯與自己爭仔，爆笑全場。
藝人朱敏瀚與陳曉華昨晚前後腳到場，前者搵張振朗同行做擋箭牌，後者則與譚俊彥及梁凱晴一同現身，楚河漢界清清楚楚。當被問到是否知道朱敏瀚在場，陳曉華答﹕「唔知，我啱啱收工咋。（入去同佢打招呼？）會同所有人打招呼。（分手後首次見面？）佢係好耐冇見嘅人。（尷尬？）唔會，我係開心仔嚟嘛。」朱敏瀚亦表示未見陳曉華，當問到是否分手後首次見面，他思索很久才答﹕「應該係年中節目巡禮嗰次喎。入場我會同任何人打招呼，亦唔會覺得尷尬。」據悉，節目巡禮舉行時兩人倘未公布分手，如今即踢爆自己其實已分手了好一段時間。記者轉問張振朗會否介紹異性給朱敏瀚認識，他答﹕「佢依家工作要緊，做吓嘢先啦，兼顧唔到其他嘢住，況且佢有我同周嘉洛喺身邊嘛。」
黃宗澤到場即發揮搞笑本巴﹕「今日係天后（樂易玲）誕，等天后開庫先人人有工開。（聽聞你幫邵氏做賀歲片監制？）傾過吓，我負責搵吓贊助咁啦。（想同林峯及吳卓羲同體演出？）想，但請佢哋唔起呀。（知唔知吳卓羲同張曦雯傳緋聞？）搶我條仔？要我審核先得，要我批準喎。（吳卓羲好開心？）佢日日都開心㗎啦，唐貓隻隻都咁上下樣，大家唔好亂講。」
懷有5個月身孕的朱千雪被問到陀B情況，她笑說﹕「唔知重咗幾多喎，還可以啦，最緊要健康。首胎我好似公主咁，依家雖然有老公同屋企人就住，但個大仔好痴身，佢差唔多兩歲，唔知自己就嚟做哥哥，我要照顧佢呀。（生完封肚？）順其自然啦，屋企有兩個小朋友都好熱鬧嘞。」她又表示胎兒性別待稍後再公布。昨日正日生日的丁子朗反過來「戥人高興」，樂易玲甫見他即送上迷李蛋榚送祝福，丁丁笑謂﹕「生日願望係多啲工作，我後日就為新劇《驅魔速遞》試造型，今次會同陳曉華及周嘉洛合作，戲中我有『性感演出』，有衫等於冇衫著，所以要努力啲減磅。」
壽星女樂易玲受訪表示﹕「通知咗啲同事叫佢哋工餘時間嚟開心吓，唔知最終有幾多人到場。（生日願望？）健康、開心、工作順利，同埋啲藝人搵到錢囉。好托賴依家唔係好多戲開，但都有工作俾到啲佢哋，好似出席籃球比賽咁，有出場費都唔錯。」又指8月底將開拍賀歲片，目前在寫劇本﹕「主演都係邵氏旗下藝人，搵咗黃宗澤做監製，套戲會喺馬來西亞拍攝。（嚟緊開番多啲劇？）會呀，下半年應該會開5部。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
