無綫長壽處境劇《愛．回家之開心速遞》今晚（7日）迎來大結局，一眾主角如「熊家」、「接龍集團」上下都紛紛晒出合照，未播結局先嚟一波回憶殺，加上尋晚（6日）齊齊整整搞出席收工飯，出席藝人包括林淑敏、許家傑、張景淳、古佩玲、何晉樂及袁文傑等，連闊別多年嘅「Philip仔」梁禹勤都驚喜現身，令觀眾感受溫馨又和諧嘅家庭氣氛。
當中「熊若水」呂慧儀晒出大批同「熊樹根」劉丹合照，「父女」感情似足家人，更大讚劉丹係教授級示範，連佢都覺得自己多咗個爸爸：「阿爸是我在劇中最最最敬重的演員，願意跟我們一起玩，又有耐性教導我們，無論通告幾咁地獄，都會默默努力堅持拍攝，無論拍攝中遇上甚麼問題，在他眼中好像小兒科一樣，有他在就完全不成問題。對演戲的熱誠，對拍攝的堅持，對後輩的提攜，完全是教授級示範，是最值得愛護的寶貝。❤️水水就好啦，有個咁好嘅阿爸，現實中，我都多咗個阿爸。🤭」一口氣晒出近10年嚟嘅合照，回憶殺滿滿。
至於「熊尚善」滕麗名則大力稱讚編劇組功臣，晒出與多位編劇嘅大合照，留言：「呢班就係我哋嘅靈魂～～～偉大嘅「編劇組」 就像神造世人製造了『有仇必報-熊尚善』出來，你們嘅付出，會永永遠遠印在觀眾腦海中 多謝😊」同時幕後呂編亦有晒出同多位藝人同事單獨合照，同樣獲多位劇集迷留言道謝「呂編：非常感謝你的用心創作，特別感謝你寫了很多高質有意思的龔水故事，帶給我們很多追劇的美好快樂時光，祝福你未來可以繼續寫你所想，會有更多好作品」、「多謝你一直帶畀我哋無數精彩，有深度嘅故事！！👍🏻👍🏻祝未來一切順心如意！！🙏🏻🙏🏻」、「呂編！love u!!!!! 多謝你同一班編劇寫咗咁多好故仔😭 唔捨得你」同樣晒出收工飯合照嘅「Andy」崔錦棠：「仲有人生有幾多個10年...能夠共事，差不多10年，實在難能可貴，我會好好記住你哋每張臉！希望不久嘅將來，再次合作！」
「賈名媛」邱芷微就晒出佢於自己最後一集演出嘅花絮相，見佢同「大四喜」劉丹、羅樂林飾、陳榮峻及鍾志光合照，眾人着上Hip Hop衫及運動裝，似乎係拍攝跳舞場面，令人懷念紅極一時嘅「大四喜」長者Rap。邱芷微劇透留言：「今晚賈名媛完成歷史任務☺️❤️ 最後一Take《愛．回家之開心速遞》沒有華麗戰衣上場，但換來『大四喜』相伴😂呢個尾彩，夠驚喜！❤️👍🌟各位，後會有期❤️」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
