新一代清純女神郭柏妍豁出去接演「綠茶小三」角色，贏盡外界讚賞，劇中姣爆已婚男的她，現實中卻不愛主動，多年來從沒向身邊男同事「抄牌」，堪稱「異性絕緣體」！為事業不斷嘗新的她，早前投資6位數搞時裝生意做老闆。
獲無綫力捧的郭柏妍（Rosita）不負眾望，在剛播畢的大熱劇集《夫妻的博弈》中，憑「綠茶小三」角色贏盡掌聲，騷味盡出之餘，她更提高8度音域去「媚惑」張頴康，不少網民入戲得怒罵她「好衰」！Rosita對此說：「話我衰總好過話我冇進步吖！」角色極致厚面皮，與現實中的她差天共地，她更驚覺從沒向男同事「抄牌」：「我同吳偉豪合作過兩次，劇中仲有感情線，有日公司安排我哋拍宣傳片，我想問佢幾點到場，先發現根本冇佢電話，臨急惟有打畀戴祖儀求救！」她與「人夫」張頴康有多場親熱戲，大讚對方是正人君子：「同一情況，我都係冇佢電話㗎！試過打畀佢太太麥雅緻幫手傳話。」笑言Contact List中的女同事不少，男同事則寥寥無幾。
她形容自己「很多時候活在自己世界」，偶爾有「綠茶婊」出現也要旁人提醒，幸好「傻人有傻福」，對方大多未能傷害她：「今次拍劇，都有啲後悔以前冇留意啲綠茶姐姐同妹妹嘅舉動，坦白講，初頭真係要慢慢調整，試過畀高海寧同康哥話我唔夠衰，依家睇番片段，好容易就分得出前、中、後期嘅拍攝，哈哈！」她希望進一步挑戰身體有缺陷的角色，例如坐輪椅、手語人士或視障人士，不介意多付出心力，只為換取外界的肯定。
掟6位數做生意
Rosita曾自揭是未拍過拖的「A0」而被封「A0女神」，問是否仍保着「金漆招牌」，她笑說：「以前會好緊張幾多歲要做啲乜，依家知道其實好多嘢都控制唔到，與其有感情生活，大家就會Focus喺嗰度，不如關注我嘅事業好啲。（有咩擇偶條件？）以前諗得好童話式，既要高大，最好又有啲錢，即係好似劇內馬國明咁。（依家首要條件呢？）孝順，因為應該心地好同對人唔差。」
27歲的她目前處於衝刺期，更投資6位數打造時裝品牌做老闆，她說：「起初以為好簡單，其實好複雜，差唔多要一腳踢。（收支平衡？）托賴」她曾在旅遊期間買到一件靚衫，後來弄污了，當上老闆後曾找布料想復刻，可惜未如理想，雖然略有遺憾，但卻發掘出箇中樂趣。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
