藝人方力申昨晚（7日）到金鐘出席晚宴。他受訪時回應早前登台期間被指向台下一名觀眾「舉中指」事件，解釋當時只是舉出疑似手勢，他説：「唔似台下個手勢咁清楚，但因為打咗格仔，所以大家先會嘩然！」他表示當時正為內地的一個酒吧騷演出，坦言世上一定會有人喜歡自己，同樣亦一定有人不喜歡自己：「或者有人飲得開心、情緒高漲咁，我唱緊歌嘅時候，我睇到下面有個人做呢個手勢不特止，佢係影住自己隻中指對住我，你覺得咁好玩，我都話畀你知，其實我都見到嘅。」雖然被人使出不雅手勢，但他坦言並不介意亦不會嬲，自己於台上也有講出對方舉中指，故台下觀眾都明白他為何會做出這樣的反應，認為大家身處這類場所，心情會變得放鬆，自己在台上也是抱輕鬆心情。他坦言不清楚對方是否有惡意，自己也只是回敬一個疑似手勢，亦澄清台下並無任何人舉起前度鄧麗欣的照片：「因為現場個個都用手機拍住，冇諗過我會上報紙，都好多人問候我，問候我咩事，因為打咗格仔越睇越似。（當刻做咩手勢？）總之唔係淨係舉一隻手指，係舉幾隻手指嚟回敬，唔係淨係嗰隻，我都冇咁大膽，費事下面啲觀眾以為我指住佢。」
方力申表示將於11月參加港澳慈善游，屆到時會由大嶼山游到澳門，現在正忙於練習，笑言除雀斑多了之餘，連疣也長了出來，問他會否擔心再度「游到嘔」？他笑謂：「梗係驚年紀大咗，對上一次係7年前，今次游嘅距離冇咁遠，但游出公海好多未知數，上次維港起碼可以坐快艇兜個圈認路，但今次冇。（太太葉萱同女女會到場打氣？）唔會，太太會暈船浪唔坐得船，會喺終點黑沙等我。」
提到愛女，方力申甜絲絲表示「見極都唔厭」，但坦言因工作關係，有時整天也沒機會見面讓他很掛念，又指女兒似乎開始懂得理解別人講話：「叫爺爺或者爸爸佢識望過去，又識點頭擰頭，Kiss都識得聽，我今朝見佢講Kiss Kiss爸爸，佢擰頭，我真係心傷！之後我話玩波波，佢又識點頭！證明佢知道點頭係Yes，擰頭係No。（覺得安慰定佢叻？）覺得好傷心！」他笑指女兒愛搣他的腳毛，最叻跟他做「Bye bye」手勢，他續説：「依家扶住會企得好好，希望到11月學識行。（平時咁忙驚唔驚錯過啲重要時刻？）錯過咗好多好在有片睇。（想阿女叫爸爸定媽媽先？）叫媽媽先，我冇乜所謂嘅，最緊要係錫佢嗰陣唔好拒絕我。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
