藝人陳曉華、吳偉豪、周嘉洛與戴祖儀日前於紅磡某商場為新劇《驅魔速遞》開工，場口主要講述眾人每次預備出發前往事發現場前，會先走過類似結界的長走廊。
陳曉華表示今次主要拍攝驅魔成員出動的場面，談到劇情圍繞靈異事情，問拍攝期間有否遇過奇怪事？她説：「有次深夜喺度見到個3、4歲，着綠色衫嘅光頭小朋友經過覺得好奇怪，但我問佢哋佢哋話睇唔到，擔心咗勁耐，諗係咪自己睇錯？過咗一段時間見到佢再喺度行，但發現原來佢媽咪都喺度。（最初唔驚？）佢行過啫，如果佢衝埋嚟就會有啲驚。」她坦言自己很少看到奇怪事，反而感到不對勁時會頭痛：「入酒店房即刻勁頭痛，痛到連開篋嘅機會都冇，換咗房就冇事。（出埠做嘢有冇法寶傍身？）會袋耳機，我怕聲多啲，會令我諗好多嘢，其實有時係畀自己嚇親。」
提到她今次劇中有大量打鬥場口，陳曉華透露大部分已完成只剩一兩場打戲，笑言今次拍攝有意外收穫，因大量動作戲讓她「打到瘦晒」：「武指都話第一日見我肥嘟嘟、幾可愛，打到依家瘦晒，我睇返啲片又係喎，第一日拍打戲塊面脹卜卜。」她笑言很滿意現時身形，指拍打戲除訓練到自己動作之餘，亦變相讓她做了高強度運動：「可以訓練我心肺功能，一拍就唔知原來拍咗十幾個鐘。（唔擔心打花靚樣？）冇諗過喎，應該唔會嘅，打咗咪急救囉，哈哈！」
吳偉豪則表示雖然自己角色也有打戲，但笑言通常是被人打，又指受惠於拍檔周嘉洛要出埠拍外景，讓大家在緊湊的拍攝時間中有機會休息。談到拍靈異題材易遇怪事，他表示自己也相信有另一個世界，但笑言「最可怕自己」：「唔會特別諗，啲人話你愈諗愈留意就愈易見到。」他表示完成《驅》劇拍攝後便要開始練歌，為下月跟爸爸吳大強於內地舉行的演唱會作準備，屆時自己會唱4、5首歌，亦會跟爸爸合唱。
談到故事圍繞靈界事，周嘉洛表示自己「時運高」人生未遇過靈異事件，他説：「無感，自己都信嘅，覺得係一啲頻率嘅嘢，大家唔同頻率未必感覺到，但即使佢哋喺度，我都係抱住互相尊重嘅心，你唔搞我我唔搞你就OK。」他表示也聽過不少身邊人的靈異經歷：「自己有時諗遇番次都好喎，想感受吓。」
提到《驅》劇近月連日趕工，但他早前仍要飛到韓國為另一個全新綜藝節目《Grand住去首爾》拍攝外景，周嘉洛坦言對製作組感到抱歉：「講起都好對唔住嗰邊嘅節目組，本身呢度（《驅》劇）連續開緊大夜班，習慣咗日出而息、日入而作，去到嗰邊要調返轉，一時未適應，去9日頭嗰4日都係迷住，每次轉鏡位都係瞓緊，同客戶合照時，每當轉人時即瞓30秒！」他笑言在預支生命，自覺老得很快，尤其記憶力嚴重衰退：「成日NG，惟有不斷再努力試。」
戴祖儀就感謝周嘉洛帶挈，讓大家可以有機會休息幾天，她笑謂：「佢太忙、大紅人！大家都爭住佢啲期，佢畀人爭走我哋可以瞓返多啲覺。」她笑稱自己也好好把握了時機，趁這空檔跟朋友來個3日快閃之旅：「夜晚收工同女仔朋友搭凌晨機飛去玩，第3日嘅凌晨飛返嚟直接開工！（唔使瞓？）呢套劇訓練到我睡眠唔係必要，快樂更緊要，我係典型Work hard play hard ！」穿上病人服的她，解釋劇中因吳偉豪照顧不力，讓自己受傷需要接受治療，笑指雖然劇中眾人角色也會打，但有強弱之分，首次拍真正拳腳打戲的她笑言覺得很好玩，有機會希望可以再拍，又大讚吳偉豪拍打戲動作很靚，不過自己也不輸蝕，獲武指讚有天分。
本文作轉載及備份之用 來源 source: http://hk.on.cc
|
鍾意就快D Share啦！
|
|
|
