今日（5/10）彭皓鋒的姐姐彭家麗現身香港出席品牌活動，接受《香港01》訪問時大談弟弟的最新病況，並坦言龐大的醫療費用確實帶來不小的經濟壓力。
讚弟弟態度正面 腫瘤已成功縮小
談及弟弟彭皓鋒目前的身體狀況，彭家麗表示見到弟弟態度積極感到十分欣慰。她表示：「我哋真係要大力大力祝福佢。有咗病其實大家人都會好擔心，但好感恩係佢自己好正面，亦都參與好多活動。其實我最怕係佢匿埋喺屋企唔開心、邊度都唔去，但而家既然佢可以咁正面咁積極，我哋要多多支持佢，無論佢做咩我都咁支持佢㗎」
彭家麗更透露，弟弟嘗試過很多治療與保健方法，現時病情有了令人喜悅的突破：「其實好多方法佢都試過，甚至乎連氣功都有試過。食健康產品佢就真係有食緊一隻，檢查到佢個癌細胞同個腫瘤係縮細咗，所以係好開心，希望繼續有效！不過佢必須要Keep住定期檢查，因為呢啲比較敏感，對個腫瘤嚟講真係唔係講笑嘅事情，所以要好好睇住。」
坦言無買保險 醫療費用負擔沉重
被問到每一次覆診與治療的費用是否非常昂貴、甚至每次高達數萬元時，彭家麗承認香港的醫療開支確實不菲，加上弟弟此前並未購買足夠保障，令經濟壓力大增：「其實都係貴嘅，香港嘅醫療都比較昂貴，同埋據我所知，佢喺保險上面係冇買到呢個保障，所以都幾重負擔。」
圈中好友熱心幫忙 拍戲特意留角色
雖然面對龐大的醫療開支，但幸好彭皓鋒在圈中人緣極佳，獲得不少好友伸出援手介紹醫生與工作機會。彭家麗感激地表示：「好多年都好關心佢，好似黑妹姐（李麗霞）佢哋，佢哋都會話內地有好好嘅醫生介紹。同埋好多拍戲嘅朋友都好錫佢，有啲角色會特登預埋佢演，因為知道佢需要醫療費。我覺得呢個氛圍好好，大家齊心一齊去支持有需要嘅朋友。」
最後彭家麗亦補充，雖然大家給予很多建議，但最重要是弟弟能保持冷靜、慢慢嘗試最適合自己的治療方案，並非常感謝外界一直以來對彭皓鋒的關心與支持。
本文作轉載及備份之用 來源 source: http://www.hk01.com
|
鍾意就快D Share啦！
|
|
|
