無綫劇集《新聞女王》第一、二季贏盡口碑，昨日在節目巡禮上正式官宣開拍第三季，總監製鍾澍佳被問到劇中「靈魂人物」佘詩曼是否已答應演出時，他指對方要先看劇本，高海寧則表示不用看劇本已報名參演！至於今年劇王、劇后羅子溢及張曦雯為台慶視帝、視后獎拉票，子溢坦言會投老婆楊茜堯一票，更大讚她在《玫瑰戰爭》的演技無與倫比！
無綫昨日在西九戲曲中心舉行《TVB邁向60年節目巡禮2027》，安排近百位旗下小生花旦盛裝亮相，現場除了向廣告客戶推介來年8套重點劇集外，亦介紹多個綜藝節目及迷你劇場。高海寧（高Ling）與3位視帝陳豪、譚俊彥及袁偉豪相當受客戶歡迎，被圍着邀合照，跟行政主席許濤影大合照時，陳豪、高Ling、馬國明、蕭正楠及張曦雯（Kelly）企正中間位，備受公司重視。
3劇在手做「劇王」
昨日有8套重點劇集列入推介名單，包括《驅魔速遞》、《超時空男臣II》、《模仿人生》、《枱底》、《警是個大佬》、《模範律師團》、《新聞女王III》及短劇《金枝慾孽之宮牆折柳》，其中《模仿人生》及《模範律師團》早於5月的巡禮時已出現在名單之上，而較為神秘及吸引度高的是《新聞女王III》，目前尚未公布演員名單。無綫副總裁（戲劇合拍）鍾澍佳在現場受訪時，透露劇集仍在籌備當中，尚未寫好劇本，第三季會是《新聞女王》系列的最後一季，之後不會再開拍。問到「Man姐」佘詩曼是否已答應加盟演出？他表示：「又唔可以話答應，但佢一定有興趣，佢都係話你拎個劇本嚟睇吓先。」問到何時開拍由高Ling擔正的「許詩晴外傳」？他說：「等吓先我人得一個，命得一條，好難同時度3、4個故事，佢等得嘅！」又指高Ling有份演出《新聞女王III》，同時會加入新的反派角色，在旁的高Ling開心表示珍惜團隊的合作機會，笑說：「我唔使睇劇本已經報名拍！」
來年佔劇最多的男藝員是羅子溢，分別主演《模仿人生》、《枱底》及《警是個大佬》，躍登「劇王」寶座，至於張曦雯、戴祖儀及倪嘉雯各自擔演兩劇，平分秋色成「劇后」。子溢積極推介12月推出的《警》劇：「我覺得套劇唔錯嘅，自己都特登返公司睇咗幾集。套劇係搞笑幽默，大家睇完《璀璨之城》、《玫瑰戰爭》，都係恩怨情仇嘅劇集，咁普天同慶嘅12月就輕輕鬆鬆。」說到《警》劇由他與林盛斌齊齊擔任男主角，他笑說：「冇錯，佢話一定要爭視帝。（會讓畀佢？）我已經學識咗一樣嘢，努力拉票，其他就交畀觀眾。我年年都出力，今年都會出力。」他當場跟在旁的Kelly說：「你識做」Kelly即表示：「我年年都投你！」記者問到「男友」吳卓羲又如何？她笑說：「唔只一票㗎嘛！有3票，Chilam（張智霖）、卓羲加埋咪3票囉！（以為你3票投晒畀吳卓羲？）唔得㗎！」子溢即笑說：「我第一個話唔得！」談到子溢的太太楊茜堯擔演的台慶劇近日播映，他表示有收看，更識做地以「無與倫比」來形容，Kelly反過來追問他投選誰人做視后，他不用多想即說：「第一票梗係投畀老婆跟住投畀你啦，再跟住梗係投畀敏奕（《警是個大佬》女主角）！（睇好老婆再攞視后？）講真，喺技術層面上佢真係好犀利，佢有一場7分鐘一Shot落，真係7分鐘裏面全部情緒做晒，我都問佢開關掣喺邊度，啲眼淚隨時都有，叫佢教教我。」他又笑言做夫妻日對夜對，對着演技如此精湛的老婆，他的水準亦有提高。
而何廣沛及戴祖儀亦各自有兩劇在手，他們更齊齊力Sell現時正在拍攝中的《超時空男臣II》，廣沛先向祖儀笠高帽：「最緊要祖儀係公司力捧嘛！」祖儀回敬：「嘩！感恩地通常大家行運嘅都會企埋一齊，所以各位依家都行運。」另外問到閨密吳若希被指手震、身體不適要入院治療，祖儀一頭霧水：「吓？唔知喎！佢係一個報喜不報憂嘅人，我呢一刻先知佢有暈，不過佢好瘦，有時血糖低都會有呢個情況，等我一陣關心吓佢先。」
俞可程何沛珈 同聲同氣護Oscar
無綫戀綜《女神配對計劃2》的何沛珈、陳若思、郭珮文、阮嘉敏、俞可程、梁超怡及陳星妤盛裝亮相，提到節目被指由「女神配對」變「爭仔」，阮嘉敏表示：「之後有好多位都好感動，咁啱呢兩集激烈啲。（大家感情好似唔係咁好？）唔係呀，平時收工會約埋打邊爐、食飯。」對於節目惹來不少負評，何沛珈指觀眾投入是好事，希望之後將注意力放在她們的戀事上，俞可程則否認節目有劇本：「呢個我好肯定同大家講冇。」談到她決定放棄Oscar，造就對方與何沛珈成功配對，而Oscar被網民炮轟是渣男，她與何沛珈齊聲否認是情敵，並為男方護航。
另外，節目中的水上遊戲環節被網民指似足「MMA」（綜合格鬥），陳星妤與陳若思對戰時更相當兇狠，問陳若思可有嬲對方？她說：「嬲節目組點解安排玩呢啲遊戲，同埋我好善忘，尋日做過乜都唔記得。」兩人更應記者要求握手及攬錫，以行動粉碎不和傳聞。
劉穎鏇備戰台慶患腳傷
女神劉穎鏇（Tiffany）與張振朗一同受訪，談到近日在「903 All Star籃球賽」表現出色，獲封「真．籃球女神」，Tiffany感激大家支持，並指很少全女班打波，所以當天經常開懷大笑，希望將來可以拍攝運動題材的劇集，張振朗即搞笑指要預他一份。對於不少網民拿Tiffany與同場打波的譚旻萱作比較，覺得Tiffany完勝，她笑說：「各有唔同好處。」兩人與周嘉洛、朱敏瀚（朱仔）近日為台慶表演排練，張振朗指Tiffany練到左腳有瘀傷，Tiffany指小傷在所難免，並指朱仔亦有瘀傷。提到朱仔早前綵排時因道具老化發生意外，事後有否更換道具？他們指近日練拳腳，待拍攝時才需要道具，暫時一切順利。
周嘉洛陳曉華互笠高帽
藝人周嘉洛與陳曉華（Hera）推介新劇《驅魔速遞》，嘉洛笑指對該劇充滿期待，但暫時不想透露太多，Hera則指拍攝留下深刻印象：「雖然辛苦，但開心嘅。（得一套未播劇喺手？）今年推出咗4套劇，播得多產量少，淨係拍咗一部，唔緊要啦，貴精不貴多，重質不重量！」嘉洛大讚她身手不凡：「佢嘅動作令我大開眼界，着住高踭鞋都打得咁犀利喎！」Hera亦大笠高帽：「嘉洛今次好多感情戲，頭先預告片都見到一滴眼淚，佢開工時好認真！」而談到將開拍《新聞女王III》，她表示：「未收到通知，今日都係第一次睇到宣傳，呢段時間我喺度裝備自己，減肥之餘亦努力增肌。」
本文作轉載及備份之用 來源 source: http://hk.on.cc
|
鍾意就快D Share啦！
|
|
|
