
視帝陳豪於無綫台慶劇《玫瑰戰爭》中,周旋於楊茜堯及林夏薇之間,但卻親熱戲欠奉,他昨日出席宣傳活動時搞笑形容自己當爸後守身如玉,當年雖曾於電影內露股,但強調只此一次,宣布往後要「封股」!而馬國明在劇中被傅嘉莉咀到歪面,傅嘉莉笑言希望對方老婆湯洛雯不要呷醋!
藝人陳豪、陳展鵬、楊茜堯、林夏薇、姚子羚、陳自瑤、傅嘉莉及鄺潔楹等,昨日現身鑽石山為無綫台慶劇《玫瑰戰爭》宣傳。台前幕後趁機公布好消息,該劇於內地相關劇集及短視頻播放逾26億及4個榜單首位,在港推出首集收視錄得22.6點,成為今年劇集成績之冠。而活動上播出林夏薇、姚子羚及傅嘉莉主唱片尾曲《大娛樂家》MV時,竟出現張振朗、周嘉洛及吳業坤扮演3女獻唱的惡搞片段,令全場失笑。
近日踩入主持界的陳豪做司儀做上癮,昨日亦於活動上客串介紹拍檔出場,他笑指其實拍劇或主持工作都冇所謂,最緊要有工開。談到劇中角色,他表示隨着劇情推進,將揭露「紳士與惡魔化身」,記者追問有否激情戲,他半開玩笑說:「有……不過唔係呢套劇啫!(又講電影《晚9朝5》?)做咗爸爸後,我守身如玉,同埋我好有性格同原則,無論『車輪』同『八月十五』,我只騷一次!」他又坦言不讓仔女追睇《玫》劇:「一定唔得,啲女演員嘅騎樓戲(性感演出)唔係講笑,教壞晒!」林夏薇則表示今次角色是從影以來內心戲最複雜的一次:「佢內心好多拉扯同故事,所以好有挑戰性。內地網民又好心水清,發現我喺陳豪屋企着住件真絲睡衣,估緊我哋兩個嘅關係。今次同陳豪合作,最開心係我媽咪,佢係陳豪嘅粉絲,成日追問我邊個係兇手。(你覺得周嘉洛扮你扮得似唔似?)好似!見佢近排咁用心健身,原來係扮我,咁佢成功嘞!」
陳展鵬讚陳楨怡夠壓場
至於陳展鵬於劇中扮演富二代,與傅嘉莉及陳楨怡上演糾纏不清的三角關係,傅嘉莉更於活動上示範被「大伯父」潘志文無痛掌摑成焦點。事後3人受訪,陳展鵬對劇中「艷福無邊」直言無福消受:「現實生活千祈唔好咁,好攰㗎,冇能力處理,一個就夠嘞。(後生時有冇試過一腳踏兩船?)我話冇,你信唔信吖?咁我話我成日畀人撇,你又信唔信?好慘㗎,不過呢啲報道之前講過,唔好再提嘞,我唔想畀個女留下唔好嘅印象。感情嘅嘢冇得講,緣分囉,冇以前嘅經歷又唔會有依家嘅家庭。」
陳楨怡今次演小三獲讚演得稱職,她開心表示:「多謝展鵬同嘉莉,因為拍之前我有向佢哋取過經,傾咗好多次要呈現啲咩效果。」陳展鵬即大讚她擁九頭身外形,加上表現不錯,成功展現氣場。而傅嘉莉與馬國明則親熱戲連場,其中一場戲更咀到對方「面歪」,她笑言:「好初期已拍呢場戲,我諗馬國明都畀我咀到嚇呆,哈哈!希望馬太湯洛雯唔好呷醋。(呢場係入行以來最主動嘅親熱戲?)算係,我覺得呢件事好似好型。」她更預告下周兩人的戲中戲親密戲碼,同樣精彩。日前播出的第5集便交代陳展鵬誤會傅嘉莉與馬國明偷情,故明目張膽與陳楨怡展開親密關係,搞到傅嘉莉借醉「生擒」馬國明!有網民發現傅嘉莉成功拿捏了醉醺醺、委屈又崩潰的狀態,劇中的她更激動得身體通紅,甚至有人大讚她「連對腳都有戲」,對於正評,她表示:「好感謝觀眾睇得咁仔細,睇到我哋作為演員嘅用心係對我哋好大嘅鼓舞。」她透露事先與馬國明排練了很久,也做了很多心理建設與構思。
楊茜堯撐鄺潔楹:嗰啲人唔識睇!
視后楊茜堯與鄺潔楹於《玫瑰戰爭》中將聯手對付姚子羚,踢爆她當年主導用迷藥讓陳自瑤接客,而鄺潔楹則於露台上演火辣援交戲,相關劇碼引起熱議。談到援交戲,鄺潔楹表示:「戲裏面我係過氣童星冇人捧,咪靠援交搵錢囉,嗰場戲交代我Take咗嘢去做呢啲嘢,好大膽㗎!其實我比較少拍親熱戲,就算依家我嘅螢幕初吻都仲喺度。」
鄺潔楹今次演出一度被網民狂踩,楊茜堯開腔力撐:「錯!嗰啲人唔識睇,唔關事嘅,其實我哋每個人嘅角色喺戲裏面都有發揮功用。佢係要專登做得冇咁好,如果佢太好咪將我哋壓低!」鄺潔楹豁達回應:「我側邊有咁多有經驗嘅前輩,演得冇咁好唔可以話理所當然,係有進步嘅空間嘅。(有信心喺嚟緊嘅演出洗底?)嗰啲Post(演技被彈)係播出一、兩日時發生嘅,我見有人追睇咗內地版本,開始幫我解釋嘞!」
本文作轉載及備份之用 來源 source: http://hk.on.cc
|
鍾意就快D Share啦!
|
|
|



