普捷天奴係格拉沙家族親自欽點。
英超豪門曼聯近期立立亂，將領隊卡域克炒魷24小時後，正式宣布阿根廷名帥普捷天奴上任。今次換帥志在重振球場上表現，但同時揭開內部權鬥序幕，據英國《每日郵報》爆料，普捷天奴竟然係格拉沙家族「欽點」人選，拉特克利夫同佢嘅無能團隊慘被架空，選帥冇聲出！
曼聯自拉特克利夫入股後，全權掌管足球事務，佢安插嘅足球總監韋確斯、轉會總監韋維爾同行政總裁貝拉達成為揸弗人。曼聯開季成績低迷，卡域克被炒早成定局，韋確斯屬意艾迪侯域接任、韋維爾就想請拿高斯文，貝拉達就企喺韋確斯嗰邊，令艾迪侯域一度成為接任大熱。
不過《每日郵報》踢爆內幕，原本已經放權嘅格拉沙家族，突然欽點要普捷天奴繼任，決策凌駕拉爵管理團隊嘅意見。消息指當年幫助格拉沙收購曼聯嘅美國金融巨頭、Citadel創辦人堅格芬，正正係美國國家隊聘請普捷天奴嘅幕後金主，令曼聯同普捷天奴斟介暢通無阻。
普捷天奴周五(13日)出席美國隊記者會，首次講到即將加盟曼聯，呢位54歲領隊即場爆喊，要用紙巾抹眼淚：「好難講出口，呢個決定(離開美國)令人痛心，係我生涯最難嘅決定，但作為專業人士，我哋都希望實現夢想，我喊係因為我其實都好想留低，但執教曼聯機會唔係成日有，實在難以抗拒。」
曼聯近年成績低迷，韋確斯同貝拉達嘅管理早就令球迷不滿，連利辛度馬天尼斯亦公開炮轟韋確斯「買人不力」，今次換帥嘅重大決策竟然被大股東直接否決，意味權力隨時被架空。不過，格拉沙家族嘅管理過去同樣備受詬病，睇下普捷天奴今次可唔可以幫格拉沙家族爭番啖氣！
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|
