2013年12月18日 星期三

[FACE 343] 野蠻奶奶 孫太夾新抱做大龍鳳 活希兒勝利遊街




孫太一手促成的大合照,只得佢同活希兒笑得出,活更一手搭實契媽膊頭以示二人關係密切。新抱 Sandee則笑得極之牽強,一上到車更擰歪面唔願望住活希兒。

真面目

野蠻奶奶 孫太夾新抱做大龍鳳 活希兒勝利遊街

31歲中澳混血兒活希兒( Fiona),自從 99年出過一張唱片、推出歌曲〈 Hello Kitty成為朋友〉後從此銷聲匿跡,到澳洲升學。直至上月疑似著住婚紗出席中港照相器材主席孫大倫細仔孫道熙( Ryan)婚禮,惹來「踩場」疑雲,才再度受關注。

現已轉行做律師的 Fiona,被新郎 Ryan在 facebook數爆,而贈送「疑似婚紗」的孫太,係 Fiona契媽兼 Ryan媽媽,有傳因孫太唔鍾意新抱,於是借 Fiona出手玩嘢!

慘成戰靶, Fiona於週一( 16日)冧掂契媽出招,更夾住 Sandee亮相影世紀大合照。搞場大龍鳳拆彈,勝利活希兒即變開籠雀陪記者遊街,鬆曬!

其他影片
  • 著婚紗踩場? Hello Kitty活希兒 say sorry

99年因為一曲〈 Hello Kitty成為朋友〉被鬧陀衰 Kitty從而退出娛樂圈的活希兒,返回澳洲讀法律, 08年回流返港執業,現正在灣仔範紀羅江律師樓做事務律師,主要負責替公司上市。

身為混血兒的活希兒樣貌標致,出道時曾被封為少男女神,可惜一首〈 Hello Kitty成為朋友〉唱到走曬音, MV又膠,被指影衰 Kitty。《蘋果日報》圖片

冧掂契媽出招

由𡃁模升呢做律師,原本生活低調安定,點知上月參加契爺、中港照相器材主席孫大倫細仔孫道熙( Ryan)的婚禮時,被指著白色婚紗踩場,又擅自走去主家席坐低,令新郎新娘嬲爆,聯同成班朋友上 fb圍插活希兒,甚至傳出新郎母親、孫大倫太太與新抱不和,反而同契女好啱嘴形,要聯手玩謝新抱。

相隔 14年再成為負面新聞人物,有指活希兒被律師樓「勸」離職。以為黑開有條路,但原來活希兒已成功冧掂契媽出招,幫自己平反。

16/12最新圖片

記者喺福臨門門口追問踩場一事,孫太即爭住解話:「嗰條唔係婚紗,係淡粉紅色晚裝!」孫太更即時向記者展示存於手機二人於當晚圖片,令記者看清楚活的婚紗是粉紅色而非白色。

就係新娘 Sandee這襲婚紗跟活希兒晚裝相似,隨即引爆活希兒「踩場」新聞。網上圖片

「人怕紅,豬怕肥」

週一( 16日)十二點半,活希兒獨自由律師樓所在瑞安中心步出,快步衝上一部七人車,原來孫太已在車中,兩人直接往富豪飯堂福臨門開餐。一個鐘後,兩人有備而戰離開,主動向在場記者解話,全程由孫太主導,「新抱又錫契女又錫……件粉紅色衫(裙)係我畀 Fiona著,佢(細仔及新抱)啲朋友加鹽加醋又 send去報紙!我新抱嚟緊接我哋……。」

沉寃得雪,活希兒明知有記者,亦刻意提早於會展落車步行返回位於瑞安中心的寫字樓,全程有問必答,「件事發生後佢( Ryan)都有打畀我,都係傾嚇呢排點。(公司叫你離職?)梗係冇啦!(會唔會復出?) Of course not!冇興趣,人怕紅豬怕肥呀!」

手執名牌 Hermès手袋,轉行做律師後,活希兒打扮明顯較以前成熟。週一於灣仔邊行邊接受記者訪問,觸目程度一定勁過當年做明星。

活任職的「範紀羅江律師行」,在行內甚具知名度。

住大坑豪宅

活希兒現居於價值千多萬、與母親及疑似母親另一半,姓 Aickin外籍男子持有的大坑豪宅。本刊翻查田土廳資料,發現活與母親合共只佔 9/100業權,大業主係 Aickin先生。《蘋果日報》圖片

活希兒 08年於澳洲悉尼科技大學法學博士畢業後,再返香港城大修讀法律, 11年加入範紀羅江律師事務所任見習律師,並於今年 9月正式執業。網上圖片

facebook變戰場

要孫太出面搞大龍鳳息事寧人,全因契女活希兒同細仔喺 fb互片,細仔的朋友更專登開了個 fb相簿數爆活希兒,火藥味勁過上海毒霧!

5/11

新郎哥 Ryan率先話活希兒著住婚紗去飲,係「史上最踩場的賓客」,仲話對方冇過去祝賀佢,夫婦以後都唔想見到活希兒!

7/11

活希兒立即反擊,解釋當晚唔係有心搞事,仲話條裙係孫太叫佢著,甚至 po埋孫太示範相。

12/11

疑似新郎哥友人直情於 facebook開相簿狂 po活希兒「婚紗」相及數爆活希兒,活隨即於 fb反擊。

活再留言,叫 Ryan同佢朋友咪再喺 fb同用電話騷擾佢,仲指佢哋係「 fool」(蠢材)!

14/11

開名鬧完 Ryan,活希兒繼續留言:「自己錯就要認,自己啱就收聲!」



鍾意就快D Share啦!
Related Posts Plugin for WordPress, Blogger...