2014年2月12日 星期三

[FACE 351 大專校園] 智叔高徒 浸大電影少女朗誦到喊 智叔高徒,MF,




何嘉嘉( Karena)

浸大電影學院電影電視系高級文憑 Yr.2

Karena對戲劇情有獨鍾,「中三開始參演舞台劇就愛上演戲,記得有次堂上做情感練習,要即時代入個角色,係講男主角二揀一而放棄咗我,嗰場戲我喊到真係暈咗!」

U花 U草

智叔高徒 浸大電影少女朗誦到喊

梁逸峰同學憑特別的朗誦技巧一鳴驚人,網上瘋傳慘遭網民欺淩,但亦無減他做老師的決心,宣揚朗誦文化。

現時 20歲的何嘉嘉( Karena)同樣是朗誦高手,在學界及全港朗誦比賽多次獲獎。現就讀浸大電影學院電影電視系高級文憑 Yr.2的 Karena,更係廖啟智(智叔)授教傳藝的學生高徒,她說:「其實朗誦、辯論、演講都要投入角色,同演戲一樣,要七情上面,𠵱家我最想喺演戲方面發展,做個有實力嘅女演員!」

朗誦有特別技巧?

好多人以為朗誦係背篇文出嚟,作狀畀啲表情、 chok嚇把聲就得,其實朗誦好需要情感嘅投入,事前要做好多準備工夫,要了解首文本嘅來源、作者嘅心態,我試過朗誦一篇戰國時代講家園興亡嘅詞朗誦到喊。雖然我唔係戰國人,但我真係投入咗個世界度,就算台下有人笑都影響唔到我,識朗誦嘅人會明!(咁你即場表演朗誦畀我哋《 FACE》讀者欣賞嚇啦!)唔啦,𠵱家梁同學咁 hit,我唔想做另一個佢,況且我冇準備,唔會貿貿然朗誦,咁會失禮老師同自己。

前輩點教路?

我覺得做戲會有多啲空間發揮,所以都冇玩朗誦一年,專注喺戲劇方面。我讀嗰科,老師之一嘅廖啟智都大讚我有花心思、有設計、有花時間排練,但要避免演得太著跡,好開心前輩提點我,所以我好積極去研究,除咗會成日睇戲、睇書,我仲會成日留意 fb「劇場精舞門」(政府宣傳片或獨立微電影招募演員的 fb專址)個 page,主動搵角色去試鏡,嘗試多啲唔同類型嘅角色同演出機會。由於我拍嘅片多數係做乖乖女,所以我最想挑戰奸角,可以多啲發揮空間!

廖啟智教戲

雖然 Karena讀高級文憑,不過老師有料,「除咗廖 sir,仲有歐錦棠老師同好多老前輩有份教我哋,次次上堂都學到好多!」

港台演未婚媽

年紀輕輕, Karena(紅圈)已有不少登上熒幕的機會,「即使喺《一念之間 2》(港台單元劇)嘅戲分唔多,但我都會好珍惜每個演出嘅機會,表現自己。」

微電影女角

為爭取更多演出機會, Karena會參演大大小小的學生作品,「好多時網上都有演員招聘,幫啲學生拍嚇畢業作品,雖然人工唔多,志在攞多啲經驗!」

朗誦大贏家

Karena熱愛朗誦,經常參與全港大型比賽,「最開心係有次參加全港青年學藝比賽,中國古典詩詞組朗誦,有 600幾個對手,我竟然好彩贏到季軍!」

做女團出碟都拒絕?

身高 5呎 5吋的 Karena雖然靚女,不過堅拒做空殼花瓶,「我𠵱家 GPA 3.4,我要搏盡升上 degree,再考演藝,做個有修養嘅演員!」

我成日都提醒自己,我嘅終極目標係做演員,所以我好介意走錯𡃁模條路,試過有公司話想簽我,捧我做組合歌手出唱片,但我眼見好多組合都係得個樣、靠包裝,唱歌又走音,我唔想走寃枉路,所以我拒絕咗對方!(此組合仍未出道!)我演戲經驗仲好幼嫩,畢業之後會繼續讀演藝或者入藝員訓練班,我試過去試鏡,個導演問可唔可以露背,我拒絕咗,最後得番做個小角色!我唔會為咗做主角而刻意暴露,我好欣賞《狂舞派》女主角顏卓靈(浸大 Degree喎!),佢好努力邊讀書邊兼顧到拍戲,同埋佢態度好好,好清楚自己嘅方向,我會以佢為目標繼續努力!

U花 U草:

只要是各大專界的靚仔靚女,《 FACE》就會介紹給大家認識。



鍾意就快D Share啦!
Related Posts Plugin for WordPress, Blogger...