三個月前，《中國達人秀》製作人途經蘭桂坊即力邀 Kit北上參賽，可惜月初於十強賽止步：「比賽嘅嘢唔使咁認真，輸嘅原因有好多。」
搜尋氣
港產肥妹唱紅強國 張潔瑩：唔好再叫我減肥！
香港樂壇唔係冇人識唱歌，只係識唱都走得七七八八，唔只 G.E.M.同人妻 Kay靠強國真人騷搵到更大舞台，仲有 22歲街頭歌手 Kit張潔瑩，參加第五季《中國達人秀》一鳴驚人被封為港版 Adele、再因此登上報紙頭條成為話題人物。
大坑道勵德邨土生土長、百分百港產肥妹 Kit點解要兜大圈由強國反攻香港：「上街唱歌俾人話我死乞兒、上報紙頭條又留言話我想做偶像減肥係常識，係唔係做歌手就要來來去去都唱嗰啲歌、化嗰啲妝、係嗰啲身形呢？」
上咗頭條，多咗好多人會特登搵我 facebook，同我講聲加油。唱咗好多年歌，其實我除咗自己鍾意，一直唔知意義喺邊、到底有幾多人聽到。今次最開心、最感動係，終於有人聽到我唱歌。
我喺勵德邨出世、長大，仲係 BB時，爹哋生意失敗離家出走，留低媽咪一個人打三份工、用一個月四五千蚊人工湊大我同阿哥。屋企成日 cut水 cut電、俾收數佬鎖閘淋油……媽咪成日話，生活愈辛苦愈要識氹自己開心，唔係佢一早跳咗樓！而我嘅動力、我氹自己嘅方法就係唱歌。
十八歲中學畢業，我喺婚紗攝影公司做 sales，嗰時搵到最多錢，但係最冇時間唱歌。有好長一段日子，有錢但係冇生活、買好多嘢但係入面好空虛。直到我辭職開始同班一直玩開嘅朋友出街唱歌。
我仲記得第一次，喺銅鑼灣，唱咗三個鐘，搵到三十蚊。頭三十分鐘，有阿叔行埋嚟直情指住鬧：「你班死乞兒！」後生仔就指指點點、揞住個口但喺你耳邊講：「有咩咁叻呀？咪又係喺條街度唱？」第一個人擺低第一個十蚊、畀個手指公你嘅感覺，爽！你哋講乜都好，我哋唔係乞兒，因為我哋唔係跪喺度求你畀錢囉。
喺街頭唱，經常會收咭片，《達人秀》係咁搵到我，仲有其他娛樂公司、唱片公司，我冇動過心，因為我知道香港未必適合我。就算佢幾鍾意我把聲，遲早又係叫我減肥，遲早又係叫我改變自己！唔該唔好再叫我減肥，其實你哋係鍾意我啲乜呢？香港音樂市場真係好細，一唱英文歌，鬱啲就聽到人話我扮邊個扮邊個。其實會唔會係香港人聽歌太少，來來去去就係 1234套餐一樣，因為你淨係識 Adele，所以我唱英文歌就話我扮 Adele呢？我根本唔係要做偶像，係想唱歌啫嘛，你欣賞我歌聲我歡迎，但係你批評我嘅身形？ I don't give a shit！
|
鍾意就快D Share啦！
|
|
|
