掃呢頁CODE去手機

2014年3月4日 星期二

曉明送車送樓冧女友 Baby終極願望係收獨立屋 曉明,Angelababy,Baby,黃曉明,




曉明送車送樓冧女友 Baby終極願望係收獨立屋

2014-03-04 14:55:00



黃曉明同Angelababy(楊穎)自2009年開始撻著開始,當時佢兩個談及戀情時,都係採取似是而非態度回應,只係久唔久有佢哋拍拖照片流出,多年來兩人不時拍拖遊遍亞洲、歐洲等地預支蜜月。

直至今年農曆新年,兩人跟曉明父母同遊夏威夷及拉斯維加斯,即時傳出兩人註冊結婚;冇耐再影到Baby陪住曉明,同老爺奶奶齊齊由青島飛往北京;而Baby上周五(2月28日)嘅25歲生日,黃曉明高調人肉速遞230萬林寶堅尼畀女友,仲十指緊扣曬恩愛,隨即就有多張多年嚟拍拖相同咀嘴照喺網上瘋傳。

去年打入「福布斯中國名人榜」第八位,單以2012年錄得近四億收入嘅黃曉明,一直都將女友打扮成Baby公主,佢曾喺一個訪問中話:「我會為女友買服飾,只要她喜歡,我可以不管價錢,統統買下﹗」黃曉明果然係講得出做得到,過去幾年粗略估計,經已為女友豪花4000萬。

今日有雜誌回顧咗Baby公主之路禮物表:2011年生日時,收到男友送贈原價7萬5千元,被炒至13萬嘅限量Hermes手袋;2012年情人節就以千萬首飾作禮物,再喺半個月後,送上鑽戒及包起酒店Ball Room,布置成玫瑰園舉行生日派對。

正如曉明所講,只要女友鍾意就乜都買,當佢知道Baby公主生日願望想買入千萬豪宅,去年就斥資2,730萬,購入貝沙灣千二呎豪宅,作女友安樂窩,同時再送上一部近200萬嘅黑色瑪莎拉蒂跑車代步。

香港有豪宅,Baby公主返到內地工作亦照顧周到,事關曉明送咗部價值300萬人仔嘅GMC豪華車畀女友,點解會咁貴?因為豪華車內置客廳、雪櫃同床鋪等設備。到今年,就係喺大家面前高調送贈嘅230萬黑色林寶堅尼跑車。

收禮收到手軟,Baby喺黃家地位更猶如新抱一樣,過住公主富貴生活嘅Baby,被問到男友有冇催婚?佢話:「呢個要問佢,不過佢事業心都好重。」Baby亦指有結婚計劃時會通知大家,暫時手頭上仲有好多工作。

另外,亦有雜誌話Baby近年狂收「曉明老公」禮物,除咗半年內收2部跑車外,報道指Baby喺前年聖誕節前曾許下五個願望,而最大願望係要一間獨立屋,因為想豪埋屋企人咁話﹗











鍾意就快D Share啦!