網頁

請重新LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2014年4月30日 星期三

[FACE 362] 機艙獨家 私罩甜睡 生人勿近 金秀賢含叉賣萌 金秀賢,MF,




封面

機艙獨家 私罩甜睡 生人勿近 金秀賢含叉賣萌

食住《來自星星的你》條水未停過掘金的金秀賢,自上月開始巡迴見面會,幾乎行勻全亞洲,上週二( 22日)晚終於來到香港見粉絲。

三日兩夜行程中,金秀賢因為南韓沉船事件而取消巡鋪,但仍要出席記者會、粉絲見面會及私人晚宴,到上週四( 24日)轉飛印尼準備出席 fan meeting時已體力透支。本刊直擊男神往印尼時在機艙爭取時間瞓覺兼睇片減壓,仲狂吞飛機餐醫肚,激罕含叉賣萌樣直送。男神全程有大隻保鑣護航,死忠粉絲即使豪擲萬六蚊坐同機商務位,都唔使旨意埋到男神身。



其他影片: >>男神萌樣直送










受南韓沉船事故影響,韓國本土娛樂宣傳活動全面叫停。國難當前,加上患感冒,金秀賢訪港三日兩夜亦刻意低調,除了出席記招及私人晚宴並無外出,連佢最愛的羽毛球同碌 Lane都冇玩,爭取時間休息。上週四( 24日)離港當日,金秀賢校啱時間出發去機場,據知機場保安為免引起混亂,刻意通知金秀賢最後一刻先到達,更安排特別通道讓男神秒速入閘,無需排隊過關。

戴住眼罩嘅金秀賢,瞓到好冧,不過佢冇瞓到擘大口兼流口水,男神即係男神!

金秀賢離港時多次向粉絲躹躬感謝,佢頂帽上寫的法文「 Je Suis Canon」即係「我好正」咁解。又幾有自信喎!

秘道走人

抵達印尼後,工作人員即安排金秀賢由秘道離開。

上機即瞓

由香港轉飛印尼雅加達的金秀賢,一上機即戴上私夥眼罩狂瞓,瞓到天昏地暗連飛機餐都唔願食。甜睡約 1小時,男神施施然起身開餐。餓了成個下晝,金秀賢由頭盤開始擦,嘆完沙律嘆鱸魚,再食埋杯雪糕都未飽,連隻叉都要啜乾淨先滿足。

填飽肚後,金秀賢拿出平板電腦睇片,戴埋 headphone進入忘我境界。記者嘗試上前想接觸金秀賢,但多番被大隻保鑣禮貌擋開,男神竟然全程視若無睹,非常淡定當記者隱形,亦與整個亞洲之行貼身保護他的保鑣冇兩句。經過約 4小時航程,金秀賢落機後休息一晚,即出席當地粉絲見面會。男神已經回復心情,在 fan meeting上玩遊戲玩到四萬咁口。

平板煲片

金秀賢掛住睇片,又咬手指又托腮,連身旁的保鑣同記者講嘢都冇理會。

咬手

睇到側頭

睇到側曬頭,唔知係咩片搞到男神咁投入呢?

有米粉絲圍男神

有多名死忠女粉絲跟住金秀賢由香港飛往印尼雅加達,更擲萬金坐國泰商務客位。雖然坐正男神前面,但粉絲極守規矩,全程都冇偷拍或要求合照。直至落機一刻先敢拎出手機偷影,可惜被經理人制止。

每次出巡,金秀賢身邊最少有大隻保鑣同經理人貼身保護,想埋身簡直零可能。

見有女粉絲舉機影相,經理人即出手擋鏡頭。

國泰 CX719商務艙

球星待遇

對住印尼粉絲笑容滿面,相反男神來港時絕少開懷大笑,而且規矩多多,大陣仗程度比碧咸等球星訪港更甚。傳聞今次訪港收 1千萬酬金的金秀賢,一早向主辦單位講明唔會做佈景板同大堆嘉賓合照。

上週三( 23日)的見面會上,除了抽中的幾名粉絲及傳媒外,只得主辦單位 Sasa的老闆郭少明一家有幸合照,但不能用私夥手機或相機影男神,一定要用金秀賢的「官方」相機,更誇張係影完相唔係即刻有相睇,金秀賢的經理人公司 KeyEast會於 1個月後才會「發相」給郭生郭太;而為滿足金秀賢想看香港夜景心願,郭生郭太亦特別於 Ritz Carlton酒店 102樓的天龍軒設私人晚宴,讓男神睇住維港歎中菜。

至於金秀賢入住的尖沙咀 The Mira,則將男神入住的 5樓全層封鎖,要有特別匙卡才可進出該層,難怪連酒店老闆娘李徐子淇都話要借套制服扮執房先埋到男神身。

23/4 香港

出席護膚品 BEYOND Angel Snow發布會,金秀賢因海難事故冇曬笑容,但仍然保持禮貌。短短 10分鐘 FM中多次躹躬答謝粉絲。雖然金秀賢露面時間短,更取消整沙律環節,但 Sasa老闆郭生郭太也相當體諒。

連踩多場,又患感冒,金秀賢喺見面會上忍唔住咳咗幾聲,辛苦曬!

校服粉絲撐

著住校服,就讀 F.3的 Hilary,考完試同媽咪專程趕去見面會親近偶像,「估唔到(加埋得) 15分鐘咁快完!不過都唔會失望嘅。」

27/4 新加坡

愈做愈密,金秀賢去到新加坡站已冇曬電,神情開始呆滯,不過髮型就變番「教授頭」,齊蔭又靚仔過吹起曬喎!(網上圖片)

25/4

印尼的見面會一樣係「長龍灣」,見到印尼粉絲好熱情,感性嘅金秀賢忍唔住又爆喊!

網上圖片

捐錢慰問

其實一向親民的金秀賢,今次全程以愁樣出席記者會及取消去銅鑼灣 Sasa Supreme的巡鋪活動,全因他於沉船事故發生後,仍到外地吸金,備受南韓人批評。由於男神一早答應了多個海外宣傳不能話推就推,但為證明心繫國民,金秀賢惟有低調出國,兼捐出 3億韓圜(約 224萬港元)慰問海難家屬。

憑《星星》熱執近億港元,暫時未接任何片約,主要作巡迴商演的金秀賢原本有更多活動吸金,當中唔少更係同好拍檔全智賢一齊出席,例如三星本來打算為「雙賢」再搞巡迴見面會,可惜因為海難被迫擱置。

錢係搵唔曬,賺少幾千萬點都好過被同胞圍插翻唔到身。

教授水著

金秀賢早前接受江蘇衞視節目《帶你看星星》訪問,除了分享成名前經歷,及與全智賢合作的感受外,仲提到自己同經理人公司 KeyEast老闆兼前輩裴勇俊比賽過碌 Lane。節目更將金秀賢第一套電視劇《泡菜乳酪微笑》中的泳褲 look重現!另外亦有訪問裴勇俊做老闆的心得,估唔到第一代韓流男神勁謙虛,「我同金秀賢比賽碌 Lane輸咗,我諗如果同佢打羽毛球,都係輸俾佢居多喇!」

'07《泡菜乳酪微笑》

送 金秀賢簽名海報+文件夾× 10

金秀賢嚟得快走得快,《 FACE》當然要送出男神紀念品俾大家解毒

紀念品包括由金秀賢代言的「 BEYOND」簽名海報同文件夾各 10件。名額共 10個,快啲登入本刊及 FACE K-Pop Facebook fanpage, Like成為我哋兩個專頁會員並分享連結( share),答啱問題即有機會嬴紀念品!

文件夾

海報

嘟入 Facebook即成 Like為我哋專頁會員,答啱問題贏獎品!

FACE Magazine

FACE K-pop



鍾意就快D Share啦!


Related Posts Plugin for WordPress, Blogger...