約羅(右)拉跌約拿芬大衞，領紅牌出場。(Getty Images)
周三(14日)凌晨歐聯，曼聯作客以0比2不敵馬德里體育會，領隊卡域克「自殺式」排陣，搵剛傷愈嘅拉舒福特、卡路士巴利巴擔任正選，收起鋒線主力馬菲奧斯根夏。最離譜係用「防線炸彈」約羅代替哈利馬古尼，結果開賽54秒就失波，下半場約羅食紅牌，令紅魔鬼無力翻身，吞兩蛋而回，各項賽事連續5場不勝，卡域克帥位愈來愈危。
曼聯左後衞勞基梳爾、中場明奈因傷未能隨隊出征，卡域克今仗用艾登希雲客串左閘，但最令人費解係收起防線最穩定嘅中堅哈利馬古尼，用20歲將約羅擔正，迅速付出代價，開賽未夠1分鐘，就被馬體會柏保路巴里奧斯射破大門。
其後莊尼卡度素曾經遠射入網，但VAR檢視後指另1位馬體會球員馬高斯洛蘭迪犯手球在先，判入波無效，曼聯上半場只落後1球都算好彩。
換邊之後，卡域克都知道自己排錯陣，66分鐘換走拉舒福特、卡路士巴利巴，但踢到74分鐘「防線炸彈」約羅終於「爆炸」，拉跌單刀嘅約拿芬大衞，球證睇完VAR後，直接出示紅牌將趕出場。曼聯踢少1人形勢更加惡劣，僅過5分鐘就被馬體會翼鋒盧卡文射成2比0，各項賽事近5場只有2和3負。
賽後領隊卡域克承認輪換策略失敗：「作客馬體會非常難踢，我犯咗一個錯誤，以往踢波我知道點樣恢復體能，作為領隊為應付唔同賽事，需要調整陣容，希望取得積極成果，但事與願違，開賽54秒失波，的確非常無奈。」根據大利傳媒報道，曼聯正在接觸前拿玻里教練干地，似乎已開始為換帥做準備。
最強博彩盤路過關神器《串績王》：http://win.on.cc/football/
本文作轉載及備份之用 來源 source: http://hk.on.cc
|
鍾意就快D Share啦！
|
|
|