狂谷事業線
楊思琦首次開腔談感情缺失，並趁母親節訴說這兩年如何做一個堅強的單親媽媽：「試過擔心到攬住個女爆喊，亦試過壓力大到崩潰。」為搵錢養女，性感打扮瞓身演出，她都一一接受。
打頭陣
阿女急病開肚切腸 楊思琦：簽紙嗰刻好無助
女人最怕揀錯郎、押錯注。三年前楊思琦為空心吳帥飛甩拍拖 9年的男友李泳豪，未婚懷孕匿埋美國產女，最後恨錯難返，做唔成土豪太太，被迫走上單親路。
有指當年楊思琦揭穿吳帥真面目後即畫清界線，對方為避債更潛藏大陸。現時女兒楊卓穎（ Krystal）已 2歲多，楊思琦趁母親節，破天荒首談這段影響一生的愛情陷阱，以及單飛媽咪的苦與樂。原來囡囡早前患急病入院，更要開肚切腸，思琦惟有含著淚簽紙，獨力承擔一切，「簽紙嗰刻好無助，當時諗身邊有個伴分擔嚇幾好。」
最近有傳楊思琦慘遭大台嫌棄，要大幅減人工。孭住三層樓要養家的她，冇男人照顧又面對公司打壓，未來的路一點都不平坦，但她依然向前衝。堅強定硬撐？楊思琦有苦自己知。
楊思琦 2011年懷孕後才知吳帥在內地有正印，矇查查變小三，之後男方臭史陸續有來。被呃到透的楊思琦憤然斬纜，決定獨力養育女兒，愛女姓氏更跟母姓。
吳帥出現前，人人都說楊思琦是個知足的港姐冠軍，因為她身邊的男人一直是李泳豪。吳帥消失後，楊思琦承受所有的惡果，但她從來沒有向外呻過一句，只築起一道保護罩，罩住自己及女兒。「吳帥」這二字，從此成為她的禁忌。
醫院攬女狂喊
自 2012年 3月由美國產女返港，過去兩年多，楊思琦一直出盡法寶，盡量令女兒樣貌及所有行蹤保密。每次面對傳媒追訪，她都迴避所有有關吳帥的敏感話題，畢竟單親媽媽不易為。難得今次楊思琦肯敞開心扉，剖白內心世界。
楊思琦女兒 Krystal在去年中大病一場，更嚴重到要緊急開刀。楊思琦起初支吾以對，幾經遊說才肯透露當時女兒處於生死關頭：「係！阿女當時病得好嚴重，最初係牙肉腫曬滲血，食唔到嘢又不停發燒，入院睇醫生，驗出係皰疹二型。食藥後未有好轉，仲試過半夜抽筋，嚇到我死。佢發燒持續咗成個禮拜，最高燒到 105度，嘴仔都紫曬，又屙又嘔，我即時飛車送佢入院。抽咗血，又電腦掃描又照超聲波，但當時醫生都唔知係咩事。」
那時 Krystal身體時好時壞，個多月來不停進出醫院，其中一次留院觀察期間，楊思琦仍有工作在身，收到醫生打來一個緊急電話，才發現女兒病情嚴重。「當時醫生叫我即刻去醫院，因為阿女情況唔多好，要我簽紙做手術。我真係好徬徨、好無助，仲驚到攬住個女狂喊。手術時醫生打開佢肚仔一睇，先知原來有個拳頭咁大嘅膿瘡喺入面，因為個瘡黐住啲腸，最後要膿瘡連埋腸都一齊切走。當時阿女只得歲半人仔，肚皮上就留咗條 3吋長嘅疤痕，睇見個女咁真係好心痛！」
女兒受皮肉之苦，楊思琦自己也不好受：「當時有一刻諗過，如果身邊有個伴可以分擔嚇都幾好……但現實係冇呢個人！」 Krystal手術成功大步檻過，但影響身體吸收能力，此後體形偏瘦，現時楊思琦正為女兒物色能長肉的健康餐單。
押錯注打擊大
未婚先孕的楊思琦形象插水，明知星途會大受影響，但當時仍然一意孤行。據知情者透露：「思琦係個好硬頸嘅人，只要認為啱嘅事就唔會理其他人眼光。明知單親媽媽嘅路好難行，自己仲要係藝人，但佢話點都唔想俾人話係小三，加上佢好鍾意小朋友，堅決唔會做墮胎手術，仲話之後會身兼父職努力搵錢養女。」
近年楊思琦除大台的工作外，還不停到內地登台賺人仔，忙碌過後都是照顧女兒為先。問她對愛情還有憧憬嗎？她表示目前只想做好媽媽這角色：「之前嘅事對我打擊好大，我唔會咁容易再相信男人。依家靠自己係辛苦，但呢個係我嘅選擇。既然選擇唔逃避，咪勇敢面對囉！（撐起成頭家又要供三層樓，經濟壓力好大？）每月支出幾多就唔講喇！經濟方面依家仲應付到，我只係想喺工作上可以再努力，希望能夠俾到囡囡更舒適嘅環境，我認為冇爸爸都可以一樣幸福。」家燕姐和吳綺莉都是圈中出色的單親媽媽，子女都能健康成長，絕對是楊思琦一個好榜樣。
誕女後患情緒病
自女兒出世後，楊思琦每逢出街都表現得十分緊張。為避記者追訪，她曾經罔顧安全，車手上身，更有傳她壓力大到一度患上情緒病。「可能係當時一連串嘅報道加封面，個個都追住要影我個女，都有壓力㗎！但耐咗就慢慢適應，要自我調節心態，我不停同自己講：『你依家係媽媽嚟喇！唔好再做車手。』但係本能上人哋愈追我，我就愈想走，不過依家已經改咗好多。」
早前，本刊目擊楊思琦做柴可夫，與楊母一同送 Krystal由將軍澳寓所到九龍塘返 playgroup，之後思琦母女駕車到附近茶餐廳醫肚。該餐廳侍應十分熟悉楊的口味，不用她開口已知道她想吃甚麼，可見楊思琦時常在該處打躉，等接囡囡放學。
懶理女兒似吳帥
很多人都說 Krystal擁有一雙小眼晴，女生男相加一頭短髮，激似爸爸吳帥。楊思琦表示並不介意別人對囡囡指指點點：「我唔理人哋㗎！總之佢係我個女。佢哋鍾意講乜就乜（其實你同吳帥仲有冇聯絡？囡囡有冇問爸爸喺邊？）冇揾過我，亦冇聯絡。阿女仲細冇問過，但如果將來問到，我會順其自然咁同佢解釋。（如果吳帥想認番個女，會唔會俾佢哋見面？）講呢啲？唔講呢啲嘢喇！」
吳帥是 Krystal生父，這是不能改變的事實，但楊思琦絕不會讓父女見面。據知情者透露：「思琦最怕再同吳帥扯上關係，莫講話認女，根本就唔會俾佢哋見面，直情係要斷絕關係，絕唔會俾個女認一個咁唔負責任嘅爸爸。」
對 35歲的楊思琦來講，女兒 Krystal就是她的一切。為照顧女兒，現階段搵錢重要過搵男人。
揀錯「空心老倌」
楊思琦 01年當選港姐冠軍後，隨即獲大台力捧拍劇，前途本應一片光明。但隨著戀上名氣差一截的李家鼎次子李泳豪，繼而搭上「空心老倌」， 2012年楊更為吳帥誕下女兒，事業形象下滑，最後楊思琦決定女兒跟自己姓，撇清舊愛，重新上路。
02年
24歲的楊思琦在國內拍攝劇集《血戰軒轅》時墮馬受傷，同劇的李泳豪照顧有加，不久即撻著兼同居。
11年 5月
有傳拍拖 9年的「思豪戀」亮紅燈，二人即在清水灣半島慶祝生日打破傳聞。
11年 6月
楊思琦單方面宣布與男友分手數月，李泳豪隨即向傳媒大呻對分手一事毫不知情。
11年 7月
有報道指楊思琦搭上「內地」富商吳帥，更懷有吳的 BB。其後報道踢爆吳帥實為「空心老倌」，要楊思琦包養，往後二人屢傳分手。
11年 12月
有指身懷六甲的楊思琦得悉吳帥早有內地正印，怒不可遏，極速斬纜。其後她被傳媒影到飛抵美國待產，吳帥更親身到美國箍煲，但臭史愈揭愈多，除欠落周街數，又入住板間房，令楊思琦心死。
12年 3月
楊思琦被拍得於美國胞兄的郊區平房坐月，不久再攜女兒回港。隨後她公開女兒跟自己姓楊，變相撇清與吳帥的關係，做個單親媽媽。
產後收入僅夠餬口
楊思琦產女至今兩年多，工作量不多，主要依靠大台包薪的經理人合約支持，最近大台將她踢出經理人部，她惟有靠自己接 job。
單親媽媽唔易做
做女人，無非想搵個好歸宿，組織幸福家庭，可惜圈中唔少女星同楊思琦一樣，泊錯碼頭揹上一身兒女債。
葉蘊儀
95年下嫁富商陳柏浩，翌年誕下兒子陳紹臻，在葉蘊儀懷有第二胎時卻傳出老公有外遇， 00年二人正式離婚。前夫拒付贍養費，葉蘊儀要獨力撫養一對子女。
羅霖
96年下嫁富商劉坤銘，育有三個兒子， 12年婚姻破裂決定離婚，二人為贍養費及撫養費對簿公堂，最後兩個大仔跟爸爸，細仔跟媽媽。為生計，羅霖豁出去接情慾片，搏到盡。
吳綺莉
90年參選亞姐奪冠的吳綺莉， 99年遭踢爆懷有成龍骨肉，最後誕下女兒吳卓林。為了養女， 3年前吳綺莉回流香港復出拍劇及主持電台節目，瓣瓣做。
|
鍾意就快D Share啦！
|
|
|
