2014年5月9日 星期五

[忽然1周 980] 亞視人聯歡江美儀 鬧爆高層 江美儀,MW,




江美儀不嬲都係義氣仔女,又夠吉士,今年佢唔驚得罪大台,出錢出力 line up做搞手,仲幫舊同事張啟樂上台鬧高層冼偉智,勁!

媽咪姐

亞視人聯歡江美儀 鬧爆高層

亞視昔日嘅員工同藝人年年都會搞活動見嚇面,佢哋有個會叫「 A記同學會」,年年都搞飯宴。上星期六( 3日)就筵開廿幾三十圍,好多已經唔喺香港嘅藝人都返嚟食飯,好似嫁咗去內地嘅繆非臨、張東琳齊齊出席,連喺新加坡做 OL嘅韓君婷都特登返嚟。今年嘅搞手江美儀,就事先講明唔俾亞視高層出席。媽咪姐知道,佢今次出錢又出力,而鮑姐鮑起靜、羅霖都有份拎錢抽獎。不過,全晚氣氛最熱烈竟然唔係抽獎,而係江美儀鬧人。

話說食食嚇飯,江美儀頂住度氣,忍唔住要上台講幾句:「有條友(媽咪姐後來八到係任職亞視助理副總裁嘅王祖藍舅父冼偉智)打俾我話想嚟。梗係唔得呢條友炒張啟樂㗎!」張即刻走上台和應,佢哋仲 high到喺台度講粗口,全場掌聲四起。媽咪姐覺得講粗口就唔係太好,不過就足見佢哋嘅團結,班高層真係要反省嚇!

鮑姐依家主力拍電影居多,但亞視有活動都逢請必到。

羅霖喺亞視嘅日子唔係好耐,只係玩咗幾年,但江美儀叫幫手,佢又冇托手踭,帶埋工人拎嘢之外,仲拎錢出嚟抽獎㖭。

冼偉智

張啟樂

失蹤人口返來喇!

同係亞姐出身嘅繆非臨、張東琳、韓君婷,都係演藝事業停滯不前,移居外地,袁文傑就北上賺人仔,大家咁耐冇見佢哋,仲認得冇?

繆非臨(左)同張東琳呢對好姊妹,嫁咗去上海多年,仲係好有心,今次特登返嚟食飯,睇嚇佢哋同以前又冇乜點變喎!

返咗新加坡定居嘅韓君婷,為咗呢餐飯返嚟,但睇佢咁瘦,真係要食多啲嘢!

袁文傑以前都話曬高大靚仔,唔見一排留埋鬚,嘩!有啲難認。



鍾意就快D Share啦!
Related Posts Plugin for WordPress, Blogger...