「榴槤公主」人靚果甜，夏日炎炎，是生果檔「生招牌」。
壹號頭條
街市型男索女
台灣一張「波濤胸湧」豬肉檔美女照引來網民瘋傳，其威力迷暈港台宅男，至近期，又有香港立法會議員提議，將豬肉佬名稱正名為「肉類分割技術員」，一時間，街市成為話題，網民爭相在各街市尋寶。
本刊搜查全港，結果發現不少型男索女隱身於全港十八區街市，如「榴槤公主」、「生果霆鋒」、「賣魚千嬅」、「韓風大隻仔」及「點心曲婉婷」，正所謂搵靚仔靚女買菜，餐飯或者都香啲。
過去印象中的街市，都是發臭的坑渠加侷促空氣、骯髒的濕滑地板加粗口橫飛，老一輩常教導兒女要努力讀書，唔係就要淪落做街市小販；然而時移世易，當今九十後大唱反調，不介意在街市做小販。他們多是幫手家族小生意，喜歡做街市原因，正切合九十後對夢想工作追求，包括自由，不受老闆氣，想點就點。
九十後經常被批評為唔捱得、甚至有港孩嬌氣，這班「街市太子爺」，到底能否做好街市這份工，還是只顧 hea住做、靚住做，大家一齊去睇吓……
上水「榴槤公主」
呢期「上水榴槤公主」在討論區爆紅，她被網民偷拍然後 post上網，一張露事業線招呼中坑阿伯的照片在網上瘋傳後，即引來網民瘋狂搜尋。
記者走訪上水石湖墟街市，果然見到這位妙齡少女，穿着小背心在賣生果，跟網上照片一樣。難怪有網民抵死地留言：「一邊食留連（榴槤）一邊幻想打茄輪」，「有肉地我鍾意」、「今晚放工行去裝下佢先」，甚至有人大讚她是「街市之花」。
這位「榴槤公主」，英文名叫 Kayley，她今年廿六歲，兩年前剛由澳洲 working holiday返港時，母親的腰傷舊患復發，加上難請到人當小販， Kayley唯有「下海」幫母親手，但一做卻甚覺開心，於是就兩年了。
不要以為靚女錫身冇鬼用，外形嬌滴滴的 Kayley在檔口要一眼關七，她親自「管數」、「 sell生果」，又不戴手套就咁開榴槤，一副打仔格。「阿媽同伙記都有教我點開，開榴槤其實唔使好大力，順住條坑就好易開到。」
連「過大禮」用的生果籃裝飾，亦由她親手裝飾設計，術語叫「打籃」。此外，她身為「專家」，對如何挑選靚生果也極有心得，不介意傳授予專門來買榴槤的網民。「榴槤敲落去啲聲係比較空洞無咁實嘅，就代表熟咗夠甜食得」
至於薪金多少？她則拒答，只說如果有需要用錢時，向母親拿就可以了，但總收入比以前當美容師時更可觀。以現時美容院美容師也有月薪萬多元左右，估計 Kayley超過二萬月收入，已比其他九十後較好。
她不講自身，卻以其他檔口來引證做街市並非低收入。「其實做街市每日營業額可以好高，不時有熟客開成過千蚊一張單，其他檔老闆做到買咗幾層樓啦。」
不過最低工資條例實施後，請人卻較難，問題也多多。「以前我哋檔口請過一個新移民師奶，做咗五、六年，手腳好唔乾淨，偷我哋錢偷到可以返佢自己鄉下買咗層樓！」從此以後檔口加裝閉路電視，以防再有員工「穿櫃桶底」。不過最安全的做法，莫過於她們母女二人檔，錢銀不過別人手。
非一般港女
Kayley十一歲時父親離她們而去，母親終日以淚洗面，她當時年紀雖小，但已懂安慰母親：「過去嘅事就由佢過去，做人要向前望！」母親在街市工作養大她，她也不覺做街市會遇到任何歧視。
長大後，與其他九十後興趣無異，她熱愛旅行、陽光與海灘，經常上載玩樂照片在 facebook上，當中不乏比堅尼泳裝照，豪邁大方的她直言沒什麼大不了：「喺澳洲嗰陣成日著睡衣落街。」盡情玩直至阿媽身體再捱不了時，就回港幫手。
被問在街市曾否遭客人多手非禮，她表示沒有，但「口花花撩吓幾句實有嘅。」另外，曾有師奶竟然專登帶着兒子來「買生果」，有相睇之嫌， Kayley坦言，不理客人動機，總之有助銷情最實際。對於女兒恃靚成了檔口生招牌， Kayley母親暗自沾沾自喜之餘，亦說有人讚過她們母女同樣靚。
九十後自由人生
街市工作年中無休，但 Kayley又是否真的做足一年三百六十五日呢？她自稱天天做到接近晚上八時收鋪，中間沒有落場時間，午餐只能叫外賣在檔口食，非常忙碌。
但畢竟是九十後加上「太子女」身份， Kayley有其自主權。「如果檔口夠人，我有時朝早都可以唔返。想去旅行？都係同阿媽講定就去得，唔會好似一般公司咁請唔到假。幫屋企做嘢始終算比較自由，而且受屋企人氣，點都好過受街外人氣。」她一口氣道出九十後對理想工作的定義、自由和不受氣。
街市自家小生意，看似沒有長遠福利保障，卻勝在工時夠彈性。上一輩常怕工作不穩定會丟飯碗、失去收入；九十後卻怕工作太穩定反而困身、失去自由。所以他們都渴望自由，甚至不屑在大公司平穩過完一生。
記者問她覺不覺街市內空氣焗及臭，她說不覺是問題，「地下嗰層賣魚同肉，會比較臭；但上一樓賣生果就唔臭嘅，就算榴槤都有果香，返屋企沖個涼就無事。」
「榴槤公主」教揀靚生果
榴槤：聽聲，如果用榴槤刀敲落去「嘭嘭聲」的就靚，如果好似敲落石頭度好實嘅就未熟。
西瓜：如果用手拍落去「啷啷聲」的先靚，如果好實就無咁鬆化無咁爽。
蘋果：用手秤吓，墜手啲重啲就代表爽同多水分。
山竹：按吓「椗」位，如果腍就好食，如果好實就即係已經壞咗。
娘娘有兵幫手
「女神」級人馬出現在街市，少不免招來麻甩佬垂涎，有老中青男士大獻殷勤，甘心做「兵」來幫忙搬嘢收檔。
Kayley的頭號大兵，是年約五十多歲、在荔枝角開設貿易公司的 David，網名「詩人讀潮水」，就是他首先將「榴槤公主」的照片放上網上討論區。 Kayley對 David將自己放上網表示「有啲嬲嬲哋」， David馬上雙眼謎謎地，笑着辯解：「只係希望俾大家知道，原來而家有港女咁捱得同孝順，多啲正能量啫。」
他說之前台灣「豬肉公主」熱潮興起時，他第一時間想起 Kayley，覺得她是「香港代表」，遂瘋狂用手機偷拍及將照片放上網，以供諸同好。身為狂熱粉絲，他更將 Kayley的照片配上讚美詩詞，並將之存在手提電話內，好讓自己隨時拿出來觀賞。
記者直接質問他是否愛上 Kayley時， David即時否認。「嘩唔好啦，細路女。」
賣爛嘢無投訴
除了 David外，亦有其他「兵」借幫手「收檔」之名，乘機親近女神；如曾在上水居住、現已遷往九龍的一名「契哥」。「契哥」從事相機鏡頭買賣生意，現已是老闆級人馬，但仍會義務回上水幫手收檔。
被問及有否覺得有「契哥」及 David藉幫忙之名乘機追求時， Kayley表示「真係無喎」。
靚女也着數多多，即使偶一不小心賣了爛生果，換來不是投訴，反而是安慰。一名阿伯顧客到 Kayley的 facebook留言：「日本 strawberry全壞的，千萬不要賣比（俾）客」， Kayley立即道歉及表示可以賠償，但對方竟溫柔回覆：「不是投訴，驚你比（俾）人駡（罵）啫」。如果賣家係叔伯阿婆，後果可能已經是開片嘈交放上網公審了。
「生果霆鋒」
九龍東的牛池灣街市，有一位男生女相、貌似霆鋒的花美男 Skit助陣。
Skit現年廿三歲，為更靚仔他還戴上「大眼仔」隱形眼鏡、 gel行個頭、腳踏最潮高筒露趾鞋，閒時更有玩 cosplay，即使身處街市生果檔，亦不停玩手機及聽歌，一副「潮童」花美男格，完全同街市環境格格不入。
「生果霆鋒」現時身兼數職，在一家公司從事手機程式推廣員，另一星期內會有兩、三天到老父經營的生果檔幫手；到檔口「幫忙」的時間甚至與他推廣手機程式「跑數」的時間重疊。「我做 sales嗰邊好自由，跑到幾多數咪有幾多收入囉，所以都無固定返工時間，可以隨時嚟街市幫手。」
說是「幫手」，但其實只是負責收錢及入膠袋等手板眼見工夫。當記者叫他講解一下如何揀選靚生果時，「生果霆鋒」頓時面有難色，並誠實表示：「我唔識㗎喎！」 Skit表示街市同行如敵國，數年前隔籬生果檔一個阿伯，因生意爭執，而毆打他父親，自此他開始間中到生果檔助陣。
去街市 hea玩食
雖然一星期都返檔口幾日，但他不認為街市工作是他的職業：「我之前做過寵物助護，又試過喺澳門開寵物店，而家中港澳三邊跑，我喺珠海仲買咗個單位添。」但他認同自己作為一個街市人的身份：「始終阿爸係靠賣生果養大我哋幾兄弟姊妹嘅，我自己都喺街市大。雖然呢份唔係我嘅職業，但我反而覺得『街市』係我成長回憶嘅一部分。」
Skit現已搬離老父在彩虹邨的老家，獨自搬往元朗居住，所以他每次回生果檔幫忙，主要目的其實是探望父親。「我喺檔口幫手嘅話無話出咩糧㗎，拎走嘅生果就係我嗰日嘅人工。」他亦曾在 facebook上載自己回老父生果檔做「生果賊」的趣聞，表示「放假專程搭 40分鐘車去老豆度偷蔬果 Yummy」，一於看檔當玩。
Skit表示在檔口幫忙，最大好處也是自由和輕鬆，極少沾手落果欄搬貨這些「苦力」工作，就算做得不好父親亦不會怪責。「（父母）梗係唔會鬧啦，就算鬧仔女都會駁嘴。你都知而家呢個社會，根本係仔女話晒事。」看來他在檔口助陣，是 hea玩食多過做嘢，切合九十後追求自由，和千萬不要管束心態。
十八歲「賣魚千女華」
牛池灣街市特別多型男索女，在鮮魚檔見另一位可愛小妹妹，還有少少似楊千嬅。
這位小妹妹叫 Emily，剛十八歲，讀完中六及考完 DSE，趁放假便出來魚檔幫父母手。 Emily有四兄弟姊妹，她排行第三，今年才第一年出來幫忙，她的大哥大家姐以前亦有出來幫忙。
街坊表示， Emily非常乖巧孝順，學業成績不錯，年年考第一，她表示自己報考大學的第一志願是歷史系。
沒男友的 Emily，不清楚同學知不知道她趁暑假出來賣魚，被問及有否遭取笑時，她霸氣回應：「會笑你嘅就唔係朋友。」至於如何辟除魚腥臭味，「係有啲臭，但沖個涼就無事。」
Emily父母的魚檔位於街市人流最旺的十字路口，據悉月租需逾萬元，但一家人卻經常「做一星期抖一星期」，新年期間更休息長達兩個月，未知賣魚是否真的如此好搵，做一排休一排都夠一家六口生活開支？
受訪後，不知是否為避記者，魚檔竟然足足一星期沒有開檔，據說是一家人去了旅行。
紅磡街市亦有另一個年約廿多歲的賣魚少女，她身形纖瘦，刮起魚鱗來卻是快狠準，經驗技巧純熟。她亦是出來幫家人手的孝順女，但不苟言笑，似乎對魚檔表現不耐煩。她不像其他檔口的九十後健談，非常堅決拒絕記者的採訪，表示以往亦曾有人欲訪問自己，但她大聲向記者說：「我唔使做女神。」
韓風大隻仔
要數近期香港最紅的街市男神，當數爆肌「肉類分割技術員」。兩星期前，擁六嚿腹肌的大隻男搬貨照片在網上瘋傳，引來各媒體爭相採訪。
廿一歲的阿明，身高約五呎八吋，中五開始玩健身，故練就一身肌肉。阿明現時在元朗街市幫家人打理凍肉鋪，工作時赤膊上陣，展露四十多吋胸肌、單眼皮帶潮興的韓星模樣、真的迷倒一眾買餸師奶。
對於網民封他做肌肉男神，他自言不太習慣，也無想過會成名。面對連日來不同記者來訪，性格內向的他有點不知所措，亦反感網民指他靠屋企。
有女友的他不願告知記者他現時收入有多少，只稱份工好自由，讓他能每早十一點自由自在去做健身，以備戰即將舉行的健美先生比賽。至於會否參選香港先生，他表示不屑：「（香港先生）太娛樂性了，每個人也做得到，不用練也可上台表演，不夠爆。他們可能要求青靚白淨，我就鍾意型，有身形。」
他現在已是街市內名人，甚至有雜誌還醜化他有三粒睾丸，對自己被明星娛樂化，他說未曾預料過，也相當不滿。
點心曲婉婷
上水龍豐廣場地鋪，還有位貌似歌手曲婉婷的少女店員「化行妝」及「 show長腿」賣點心，原來她就是廿二歲的太子女 Elsie。她一開始見到記者拍照，異常緊張，以為記者在記錄他們有否實施膠袋徵稅；但後來知道我們只是在找型男索女「生招牌」，便樂意受訪。
她表示自己已幫手兩年，點心鋪是家族生意，因店內有冷氣，她表示妝不會溶掉，已化慣化熟的她，早上返工前化妝亦好快手，不會耽誤上班。
她已有男友，聲稱男友對她化行妝待客，是沒異議，然而，受訪後她又感後悔，來電話指家人及男友反對她上鏡，可能男友還是介意女友「拋頭露面」。
走訪一眾街市型男索女，大部分人都不覺街市低俗，也不介意自己這份工，甚至覺得這份工自由自在，遠比在寫字樓呆坐更好。對九十後的年輕男女來說，一份工有無前途或並非最大考慮，最緊要是否「靚住做、 hea住做」。
|
鍾意就快D Share啦！
|
|
|
