上週三（ 21日），大台化妝師張家萬設靈，陳志雲離開時恰巧遇上崔建邦，二人見面互當透明，之後陳志雲說：「肯定佢唔係敵人！」做敵人都要講份量嘅！《蘋果日報》圖片
真面目
師徒反目 絕交 2年 反骨崔建邦出賣陳志雲
人情紙咁薄，尤其娛樂圈更加計清計楚，就算之前扶過幫過，冇利用價值都可以當你透明。
最新例子有不死擦鞋仔崔建邦，最近在大台化妝師張家萬的喪禮上當恩師陳志雲透明。反骨仔原來唔只當恩師冇到，在陳志雲遭廉記調查後， 3年間多次落井下石兼出賣，大台司儀反骨程度幾達神級，陳總下次要帶眼識人冇幾多個王喜㗎咋！
最近在大台中女劇，崔建邦扮「即食即飛」負心男入形入格，變臉一向係佢強項。佢由做港台節目助理開始，已跟陳志雲搵食，入大台後愈撈愈好，被捧為當年「迷雲黨」頭號黨員，但首領一失勢，崔建邦亦露真面目。據知情人士透露：「 Stephen（陳志雲）被廉署起訴後，有次佢個髮型師 Michael Lau有新髮型屋開張，想搵陳總同崔建邦撐場，崔建邦竟然叫佢老闆唔好請 Stephen去，話咁會冇記者到喎！」雖然 Michael最終請曬兩個，但是非輾轉亦傳到陳總耳邊。
唐詩詠補飛
其實當時崔建邦亦唔見撈得掂，他先後於 10年及 11年因醉駕而被大台貶做 PA工作冇得撈幕前，他所蝸居的西貢村屋，是陳總叫賽車手兼好友潘德俊（ Paul Poon），以月租$3,000超平價租出。當 Paul Poon知道「髮型屋事件」後，睇唔過眼崔的絕情，即時「收樓」，崔連村屋都冇得住。後來陳總無罪重返大台，反骨仔亦知死急急氹番陳志雲。
其後志雲轉投商台，崔建邦竟再次出賣恩師。「 Stephen最初想搵崔建邦開咪做商台《起來大龍鳳》主持，崔建邦親口應承咗，點知臨時又叫個助手覆佢話唔做得，搞到 Stephen真係好嬲，雖然崔建邦之後有 send短訊俾陳總，唐詩詠亦多次做和事佬想修補大家關係，不過 Stephen睇穿佢為人，所以 2年嚟都冇同佢聯絡！」難怪上星期三（ 21日）陳志雲公開話：「如果話兩年冇一齊食過飯就唔係朋友，咁咪唔係朋友囉！」
|
鍾意就快D Share啦！
|
|
|
