2014年5月28日 星期三

[FACE 366] 撩拍廣告 怕冇錢收 李麗珍李若彤唱衰前夫 李若彤,李麗珍,MF,




48歲李麗珍戲裏戲外都 keep得唔錯,做做嚇訪問仲突然對本刊記者嗲爆話:「哎吔,唔好影咁多啦,我今日咁醜,喊咗兩日呀!」珍妹話因「小詩」老公鄭丹瑞在劇中俾車撞死,令佢好傷心瞓唔著喎!咁都得?

封面

撩拍廣告 怕冇錢收 李麗珍李若彤唱衰前夫

大台中女劇本週大結局,雖然收視平均只得 25點,卻帶挈劇中一班中女翻身,其中「朱莉」李麗珍同「小詩」李若彤亦受唔少𡃁迷追捧,美魔女李麗珍仲吸咗班新少男客路。

女神復活,當然多人打主意。李麗珍早前自爆離婚 14年的音樂人前夫許願,最近突然主動聯絡撩拍美容廣告,不過珍妹有 job都唔敢接,怕冇錢收一於拒拍;點知許願唔死心,轉搵李若彤落疊,但好姊妹齊心企硬唔接,更向傳媒爆料唱衰前夫。 48歲李麗珍對本刊說:「我哋(與李若彤)同一陣線嘛!」

至於𡃁版「朱莉」王敏奕亦受家事困擾, 22歲女要養起全家,有冇請教嚇珍姐姐先?



其他影片:>>珍妹怕咗前夫






一套中女劇令全城勾起 80年代集體回憶,懷緬過去之餘亦忽然關注劇中幾個上一代女神, 47歲李若彤自揭曾患抑鬱症, 43歲張慧儀又要獨力湊病兒,見報率極高。

李麗珍同李若彤相識多年,「小龍女」為咗好姊妹,有 job都唔接,夠曬義氣,之前啲不和傳聞好假囉!

「都唔知收唔收到錢!」

中女劇口碑好但收視麻麻,三個美魔女都要密密宣傳谷盡結局篇收視。

至於性感女神李麗珍當然唔執輸,上週宣傳劇集時,突然向傳媒自爆同前夫轇轕,「許生搵我傾個美容廣告,我真係驚到發噩夢,隨便敷衍佢就算,都唔知收唔收到錢!咁多年佢一直冇俾贍養費,告過佢一次,個女就嚟 18歲,冇得追佢唔負責任就算,幾多錢冇得計,希望佢手下留情唔好再煩我!」

句句插到應,珍妹週日( 25日)繼續向本刊炮轟前夫,「我同佢好耐冇聯絡,今次搵我拍廣告應該係商業決定我冇接拍,本身自己有 agent,傳來傳去,我唔想搞到太複雜,所以佢最後搵咗李若彤。(李若彤有冇接?)冇冇冇!我哋同一陣線嘛!」

囡囡黐許願

有錢都唔賺,全因珍妹同前夫關係極惡劣。兩人 96年結婚, 97年生了女兒許倚榕,可惜 00年離婚兼反面收場,女兒撫養權歸珍妹。

除了珍妹所講,多年來未收過一毫子贍養費外,兩人亦曾因錢銀轇轕隔空對罵。 02年許願涉放料指珍妹爭佢 3萬卡數,嬲爆珍妹於是發火反擊,搵律師追討對方千萬,有傳早年許願炒燶股票同生意失敗,要珍妹賣樓套現代夫還債,但許願否認曾向前妻借錢,事件最後不了了之。

一夜夫妻最終反面收場,不過女兒始終姓許,點都鍾意黐實爸爸,連珍妹都承認倚榕唔太接受自己有其他男伴,包括潘源良,「反叛期係比較難,𠵱家 17歲已經好少少,前幾年係唔接受㗎!」為個女著想,珍妹點都要同前夫多多溝通喇!

許願同珍妹結婚 1年就生了囡囡倚榕,當年一家三口非常幸福。《忽然 1周》圖片

珍妹月前被影到同囡囡行街買衫,兩人似姊妹多過似母女!

愈大愈似珍妹的倚榕,雖然跟媽媽住,但同爸爸許願感情好好,兩人在 fb都經常有交流。

17歲曬長腿

現年 17歲的許倚榕( Annise),一直由李麗珍及外婆照顧,直至去年往加拿大升學才獨立。倚榕不時在 facebook上載生活照大騷長腿,愈大愈靚的她冇攬仔夜蒲相,好乖女!

經歷過離婚,同 Jacky Ma的淫亂 3P醜聞,珍妹現時同潘源良半同居,感情穩定。《忽然 1周》圖片

講錢失感情

現時在北京長駐的許願,早前在 fb上載與快將 51歲的 80年代女神柏安妮合照,據知許願近年黐住內地土豪搵食,算有嘢撈。

網上圖片

網上圖片

《蘋果日報》圖片

林憶蓮

87年與許願合作兼拍拖,期間憶蓮由華納轉投華星,有傳許願私自將約 1,200萬轉會費用作投資火鍋店及開新製作公司,憶蓮知道後立即提出分手。

《蘋果日報》圖片

陳豪

曾是陳豪經理人的許願,因拖欠對方近百萬薪金,而被陳豪採取法律行動追討,更提早 1年( 2003)解約,結束 7年合作關係,陳豪現已貴為一線中生。

《蘋果日報》圖片

陳小春

有傳許願拖欠小春 7位數薪金,雖然小春冇追究,不過 00年唔肯同許願續約,轉投中國星,更暗示曾被拖糧好肉痛。



鍾意就快D Share啦!
Related Posts Plugin for WordPress, Blogger...