探熱針
跟「撻沙哥」開菜館 朱慧敏揸數做老闆娘
已離開長氣劇《愛•回家》的朱慧敏，男友 Eddie（彭懷安）在《使徒行者》憑「撻沙哥」黑道大佬角色出晒位，見女友又被公司冷凍，隨時成為失業軍，決定情侶檔到西環開菜館，強攻飲食業。
「撻沙哥」做開茶餐廳，有支盲公竹帶路，朱慧敏由零開始，由樓面裝修到入貨，全部攬上身，更打算開張大吉後，打躉做埋樓面收銀。
夫唱婦隨
《愛•回家》換血，無得留低的朱慧敏，雖然跟無綫尚有年多合約，但唔想在幕前死守等運到，朱慧敏於數月前開始為自己鋪定後路，跟男友「撻沙哥」學做飲食。
放下藝人身段，朱慧敏聽晒男友話，落手落腳乜都做，務求盡快
上手。
「冇得做《愛•回家》，加上見公司裁員縮皮， Queenie（朱慧敏）自己知自己事，就算有得續約，分分鐘要減薪減騷。佢見自己都三張，咪把心一橫，跟男友學做生意囉！ Eddie嚟緊喺西環開菜館，分咗啲股份俾佢，趁得閒， Queenie成日落鋪睇裝修，入貨請人乜都做，將來正式開張， Queenie話落埋去睇鋪，早幾個月，佢已經成日落 Eddie間華星冰室坐鎮做收銀，學管理。」知情者說。
男友教路
上週六（十月四日），朱慧敏跟 Eddie拍拖到西環，將於十一月開張的新菜館「華星客棧」，了解裝修進度；只見她乖乖跟在男友後面，留心聽對方如何指揮督工。
交帶完，兩人再過海去旺角睇餐飲廚具，由湯勺到蒸爐， Eddie逐一向女友教路如何入貨。之後，二人又返去冰室打躉，巡迴西環旺角筲箕灣。
男尊女卑
以往女尊男卑，不過風水輪流轉，組合 EO2成員 Eddie兩年前開冰室做老闆，睇數、樓面落單、廚房出餐落手落腳做，結果搏出錢途，兩年內冰室由一間變四間。
吸金力強過女友，幕前工作亦開始起運，做足十二年古惑仔角色， Eddie近日終於「紮職」，在剛播完的《使徒行者》中飾演黑幫坐館「撻沙哥」，連「契大佬」監製戚其義都讚。男友事業成績爬過頭，恭喜朱慧敏。
繼續做大佬
02年出道的 Eddie，憑住光頭加黑超的殺氣 look，同年在電影《無間道》有份客串做曾志偉（韓琛）手下。可惜電影上畫， Eddie戲份被刪，最後剪剩隻手出鏡，幫曾志偉開車門。
演古惑仔入型入格，多年來在電影及電視劇多被分派行先死先的壞蛋角色，做人「條𡃁」十二年終奸出頭，今年在《使徒行者》由古惑仔升做黑幫坐館。拍攝新劇《以和為貴》繼續做大佬，同主角馬德鐘戲份平起
平坐。
反超前
在娛圈發展，女藝人上位搵錢比男藝人快，尤其是情侶或者夫婦，不時出現女尊男卑落差，但男人襟睇其實更着數，只要時機一到，隨時超前。
張智霖 袁詠儀
Chilam由拍拖到結婚，事業成績一直不及初出道便攞影后的老婆袁詠儀，不過近年太太專心湊仔少做幕前，而防腐 Chilam則愈戰愈勇， Cool魔一角再谷一谷，電影個唱加返內地賺人仔，吸金能力早已遠超另一半。
|
鍾意就快D Share啦！
|
|
|
