陳國坤對黃伊汶一條心，狂追一年，女方才答應拍拖。
探熱針
樂媽幫翻兜 黃伊汶嚇親急嫁陳國坤
拍拖超過五年的黃伊汶陳國坤，已鐵定今個月 25日到峇里舉行婚禮，生米將煮成熟飯，但原來已分手六年的余文樂，一直對準陳太念念不忘，除了去年與 Kary吳雨霏拍拖期間主動求 Emme復合，過去一年，亦四度撩翻撻；今年三月，余文樂甚至出動埋阿媽幫口，但最終仍不敵陳國坤。
上門探狗
有指余文樂對前女友黃伊汶一直念念不忘，即使對方已有個拍拖五年的男友陳國坤（小龍），但為打動前度重修舊好，去年樂仔甚至與拍拖只有半年的吳雨霏斬纜。
「阿樂成日打電話俾 Emme，話自己放唔低，要求俾多次機會佢，但 Emme同小龍感情好穩定，點會睬佢吖？但阿樂都唔放棄，不停 send WhatsApp話自己好空虛，心入面只有佢一個，有次俾 Kary發現，兩個嗌大交，阿樂索性同 Kary攤牌。舊年佢兩個分手，已經有人話 Kary老豆同啲身邊朋友呻，話余文樂同佢個女分手，因為仲係鍾意黃小姐！」知情者說。
分手已經六年，當年亦因為溝女斷正導致二人玩完，但過去一年，余文樂卻痴心情長劍上身，不斷要求與黃伊汶復合。
「以前拍拖，阿樂送過隻 Poodle俾 Emme，所以佢成日搵隻狗仔做藉口走去 Emme匡湖居屋企，但每次 Emme都會自己走咗出街避開，搵家姐應付阿樂！」
最後一招
雖然黃伊汶對余文樂不為所動，但眼見有人咬住唔放，去年八月，小龍出席活動時主動透露已向女友求婚，公開宣示主權，要余文樂知難而退。
「但阿樂一路都唔死心！佢同 Emme有班大家都識嘅朋友，佢成日借朋友把口，放聲氣話真係好掛住 Emme，就算 Emme已經講明有結婚計劃，阿樂都唔肯放手！」
今年三月，余文樂出最後一招：搵樂媽幫口箍煲。
「 Emme以前同阿樂屋企人關係都唔差，樂媽亦好錫佢，當年因為溝女散咗，樂媽都嬲咗個仔一陣，所以佢都硬住頭皮，出面幫個仔箍煲，但咁做反而令 Emme更尷尬！」
買樓落埋名
余文樂死纏爛打，加上男友不下十次提出求婚，令本來不心急結婚的黃伊汶提早作出了斷，拍板答應做陳太。
「小龍個人夠體貼，乜都以女友為先，一一年佢買西貢翠海花園，已經寫埋 Emme個名，呢兩年小龍求婚好多次，只係 Emme事業心重，先拖到而家。」
黃伊汶因為手錶代理生意要周圍飛，陳國坤在內地又一劇接一劇，婚禮籌備亦要交給家人代辦。
「 Emme經常出 trip，小龍更加長期留喺大陸，佢而家仲開緊劇，要拍到差唔多出發去峇里結婚先返香港。」知情者說。
向余文樂阿媽求證她出面幫手箍煲一事，樂媽三度表示：「唔講呢啲嘢嘞！」之後更要求記者：「俾啲空間佢哋！」
餘情未了
03年，同屬環球唱片的余文樂、黃伊汶（ Emme），經常孖住出席活動成功撻着，拍拖多年一直低調，有指余文樂一直沿用的 666車牌，甚至全屋電器，也是女友所贈，投桃報李，余文樂亦送了一隻 Poodle狗狗氹女友。不過，拍拖期間屢傳余文樂夜蒲溝女，雖然 Emme對男友投信任票，但 08年在日本旅行時攬女偷食，卻被 Emme好友撞到正， Emme忍無可忍，主動提出分手，當時，余文樂上女友寓所拍門求復合，死纏爛打；多年來仍不死心的他，去年即使與 Kary公開拍拖，但半年情快來快去，有指導火線是余文樂對前度念念不忘，試圖翻兜被 Kary識破。
放唔低
擁有時唔珍惜，冇咗又覺得可惜！人性！對一段感情，要做到拿得起放得低，談何容易。
|
鍾意就快D Share啦！
|
|
|
