掃呢頁CODE去手機

2014年10月9日 星期四

[壹週刊 1283] 王維基衝擊  TVB擺王祖藍做鐵馬 王維基,王祖藍,祖藍,TVB,M1,




探熱針

王維基衝擊  TVB擺王祖藍做鐵馬

不斷被打壓的王維基終於埋到岸!港視將正式以 OTT( Over-The-Top)形式免費播放電視節目,開台日踩正無綫台慶 11月 19日,挑機贈興;至於首播劇集將會在《警界線》及李心潔主演的《選戰》二擇一,硬撼大台台慶劇《老表你好 hea》。王維基打到埋身,無綫高層落旨,唔輸得!

民選開台劇

過去五年,為免費電視牌搞到大頭痕的王維基,終於可以擇定吉日開台,港視與無綫正面交鋒大日子,竟與大台台慶十一月十九日撞到正!

「揀埋對手台慶日做首播,好明顯王維基係想出番啖氣,就同你硬碰!余詠珊本來諗住用王祖藍套《老表你好 hea》做台慶劇,收視爆硬,而家要同對家拗手瓜,加上未知港視究竟用邊套劇撼《老表》,大台班老細話明唔輸得,余詠珊都唔敢慳皮,會勁谷《老表》宣傳。」知情者說。

據知,劇集有一定存量的港視考慮以廖啟智與林嘉華孭飛的《警界線》或李心潔的《選戰》作為開台劇,一切待本月底進行公投作決定。

「港視開台劇會係一人一票選出,本來《警界線》機會高一啲,但近期因為佔中事件,李心潔套《選戰》係講選特首,更加貼近社會民情,較易有話題性,總之月底公投俾大家揀。」

《選戰》

港視於本月底搞公投,由民意選擇《選戰》或《警界線》為開台劇, TVB則會以王祖藍主演的搞笑劇《老表你好 hea》迎戰,港視大戰 TVB,拭目以待。

《警界線》

《老表你好 hea》

做埋網購

王維基以 OTT( Over-The-Top)形式免費播放電視節目外,港視還有手機 app,可收看節目及網購。

「市民透過上網免費睇到港視節目外,亦可以經小米盒子睇到。而家手機 app咁方便,手機睇劇亦唔少得,另外港視仲同多間商鋪、大型超級市場合作搞網購,開發更多商機。」知情者說。

王維基擇了十一月十九日無綫台慶當天為開台日,擺明挑機,電視台大戰一觸即發。

去年台慶夜,受到免費電視發牌風波影響,有網民發起熄機賀台慶外,更有人到電視城外抗議。

港視終於開台,為生活轉行賣雞的李雨陽表示:「好呀!起碼唔係得一個選擇,希望可以百花齊放啦。」

好耐冇拍電視劇的陳苑蔚,表示港視開台實在峰迴路轉:「如果公司搵我拍劇,我即刻減磅支持,幾多磅都做。」

港視拍了十多套劇集,其中一套是由劉美君、張可頤合演的《來生不做香港人》。



鍾意就快D Share啦!