2014年11月14日 星期五

[忽然1周 - 1007] 嫌《十》電影版劇本差 張智霖首日開工玩罷拍 張智霖,MW,




Chilam對劇本要求甚高,據知他要求葉念琛執好先肯拍。記者就此事問葉時,他就自稱劇本吸引,但薛家燕卻踢爆佢兩個有不同意見。

娛樂喧

嫌《十》電影版劇本差 張智霖首日開工玩罷拍

張智霖( Chilam)去年憑 Cool魔一角翻 hit,除乘勢出碟開騷搵錢,更擸五千萬「賣身」俾蕭定一。

為求物盡其用,蕭定一搵葉念琛再次翻拍 14年前《十月初五的月光》電影版,希望重新締造經典。當年憑「初哥哥」一角紅過一排的 Chilam,當然唔介意埋班。

不過 Chilam今時唔同往日,每次機會不容有失,乜都要執到正。上周六( 8日)電影第一日開工,據知 Chilam在片場猛彈劇本寫得唔夠細膩,更限葉念琛兩星期內執好劇本。

當年屢破收視紀錄的電視劇《十月初五的月光》,今年落實開拍電影版,原班演員夾好檔期回歸,並搵來擅長拍都市愛情片的葉念琛身兼導演和編劇。一切準備就緒,上周六( 8日)首日開工,拍一場卡拉 OK慶祝生日的戲份。

入房傾劇本

一班演員相隔 14年再合作,當然寄望甚大。開拍前, Chilam特登影大合照放上微博話開工大吉,但結果他和導演葉念琛傾唔掂數而罷拍。

由於一班演員在合作上早有默契,這場戲理應好快搞掂,不過埋位時卻發生一場風波,搞到現場氣氛甚僵。「嗰場戲包咗一間卡拉 OK嚟拍,拍到中途, Chilam覺得啲對白唔係好順,自己個角色性格同電視版硬係爭咁啲,於是佢就拉埋導演同阿佘入房傾咗接近半個鐘。」一名現場人士透露。

正當全劇組以為他們傾完可以繼續拍攝,但 Chilam拍唔夠三個 take便嚟料。「佢要葉念琛執好個劇本先,仲限佢兩個禮拜交貨。佢話只要好劇本,就唔介意等。」順 Chilam意,套戲就要押後兩星期再拍。

家燕姐:導演壓力大

首日開工便爆火,有份在現場的薛家燕,就透露 Chilam和阿佘當日的確對劇本各持不同意見。她說:「第一日開鏡,大家都好謹慎,每一個演員都慢慢重溫番自己角色嘅情緒。隔咗 14年,大家都希望做到最好啫!第一個鏡頭係講佢哋( Chilam及阿佘)兩個見番,大家要唱隻歌,佢哋要表現大家仲有感情喺度!導演想咁做, Chilam就有第二個睇法,阿佘又有唔同睇法,導演尊重佢哋,最後三個都拍晒!導演壓力大,因為呢個係經典。」同場的郭峰就避重就輕說:「哎!只係導演覺得咁拍, Chilam又想咁試下,大家研究下啫,好正常噃!嗰日大家都拍得好開心。」

家燕姐指 Chilam和阿佘緊張角色才俾意見。記者亦就此事問過葉念琛,他說:「個劇本我好俾心機寫,之前都拍過 Chilam同阿佘,都唔係第一次合作,大家默契都好好。佢哋做過呢部戲嘅角色,大家嘅討論同意見都比以前多好多。雖然劇本係我寫,但演員都可以一齊參與囉!我唔覺得係好大嘅問題,總之佢哋冇唔滿意我劇本。大家都知我唔係第一日拍戲,都知我寫嘅劇本係吸引。」

Chilam暫緩娜姐新戲

今年 3月, Chilam、周秀娜和葉念琛開記招宣布開拍《千億惡魔愛上我》,不過電影因為 Chilam檔期問題,至今依然開拍無期。記者就此事問過娜姐,她說:「拍戲嘅嘢成日轉,做得呢行都體諒。」

《 CNS》圖片

葉念琛和 Chilam及阿佘,分別拍過《天生愛情狂》和《人約離婚後》,雖然卡士不俗,更咀戲連場,但兩部戲票房千萬都冇。

Chilam和阿佘當年傳過緋聞,當年有報道指袁詠儀要特登監場。 09年,阿佘和靚靚拍戲,同場冇交流,據知靚靚今次亦有睇過劇本。

圖片

破收視紀錄

《十月初五的月光》 2000年播映,當時好評如潮,首周最高收視有 37點,破晒紀錄。 Chilam、阿佘和馬浚偉戲中糾纏不清的三角戀,成為熱話,結局篇更有 46點收視創新紀錄。

Chilam和阿佘亦因此劇成為熒幕情侶,二人打後拍了《跑馬地的月光》和《月滿抱西環》兩部電影,以及電視劇《西關大少》,更孖住出席不少活動,賺到笑。

hold住娜姐檔期

正如葉念琛所謂,他與 Chilam的確並非第一次合作,但奈何上次票房失利,令 Chilam對葉念琛的要求比之前更高。知情人士說:「前年佢哋合作嗰套《天生愛情狂》, Chilam搏晒命拍多場咀戲,但雷聲大雨點小,套戲上嗰陣掀唔起話題,埋單只收 600萬。所以 Chilam拍《十月初五》之前同導演開咗好多次會。」

入行 23年的 Chilam,事業大上大落,去年憑 Cool魔一角再度爆紅,當然希望強勢可以持續,揀 job十分小心。「其實佢今年 6月原本同周秀娜飛去歐洲拍葉念琛套《千億惡魔愛上我》,不過撞咗演唱會,於是押後到 8月,但轉個頭就接咗《衝上雲霄》電影版同《十月初五》呢兩套戲,搞到套戲取消,娜姐啲期亂晒!」知情人士說。連續兩套戲都有阻滯,葉念琛今次真係多得 Chilam唔少。



鍾意就快D Share啦!
Related Posts Plugin for WordPress, Blogger...