2014年11月21日 星期五

[忽然1周 - 1008] 囂張•癲價遭封殺  G.E.M.失眠厭食 G.E.M.,G.E.M,鄧紫棋,MW,




今周 110磅厭食跌磅

上周四( 13日),化了淡妝的 G.E.M.見完營養師後接受訪問,坦言遭封殺令影響情緒。現場所見其身形變得單薄,手腳亦見纖幼,只係塊面仍保留 baby fat。

滾熱辣

囂張•癲價遭封殺  G.E.M.失眠厭食

「小巨肺」鄧紫棋( G.E.M.)年初憑湖南衞視節目《我是歌手 2》爆紅後,旋即化身吸金寶寶,在內地短短半年,已累賺半億人仔。

人紅心更雄,自詡是亞洲天后的 G.E.M.,不單接拍廣告獅子開大口,接商演時更要求多多,結果遭內地廣告商嫌棄。日前在內地爆出的封殺名單中,她出乎意料地竟然榜上有名。內地冇運行, G.E.M.卻繼續自我膨脹,周二( 18日)在港開記招時,更因耍大牌而激嬲傳媒。

原本俾人捧到上天,但不足一年就撻落凡間。據知,受負面新聞影響, G.E.M.近兩星期晚晚失眠兼食唔落嘢,導致體重急跌 8磅。上周一星期內,記者拍得她兩度秘密睇醫生,事後她直認:「我睇緊營養師,希望佢可以幫到我!」







月初 118磅 南京露肥髀

G.E.M.月初在南京舉行《 G.E.M.X.X.X. LIVE世界巡回演唱會》,雖然盛傳她遭國內封殺,但演出未受影響。當晚她身穿一套紅色雪紡歌衫,一雙肥美短腿表露無遺。

憑《我是歌手 2》成功登陸內地後, G.E.M.舉行巡迴吸金之旅,走遍 28個城市舉行 40多場巡演。她每場索價 100萬人仔歌酬,比起一年前,未在內地走紅時只收的 10萬歌酬價,足足漲價 10倍。可是,她明明深受內地歌迷歡迎,近日卻爆出遭內地封殺,除了早已簽好合同獲批文的演出可如期舉行外,今後的商演、代言等活動一律遭禁止。據知,從未表態佔中的 G.E.M.,對忽然被內地封殺,感到極度愕然。為重鋪財路,她事後多次在微博發表愛國愛港言論,可惜其一番苦心,暫時仍未打動內地解封。

秘見營養師

G.E.M.當日上了 5樓的 Ultimate Performance,半小時後離開。最初她表示上去做 gym,其後才自爆是去見營養師。

無聊掃家品

近日 G.E.M.無工開,日日無所事事。上周六( 15日),她獨自到寓所附近狂掃家居用品,戴住口罩,冇人認得出佢。

格價買廁紙

G.E.M.堂堂樂壇小天后,就連買廁紙都親自出馬,仲格晒價睇吓邊隻牌子抵用先買,真係估佢唔到。

下廚增食慾

據知 G.E.M.見完營養師,要吸收多些蛋白質同欠缺的營養,近日她買定食材自己下廚,仲將照片放上微博。

認多是非

上太空擦鞋

早前 G.E.M.被任命為「環宇太空」大使,將於明年飛太空逗留 6分鐘,上月已飛荷蘭進行太空訓練。她表示飛到上太空都會唱中文歌,擺明擦內地鞋。

據知近日留港的 G.E.M.,不單食唔安瞓唔樂,更經常無緣無故爆喊,情緒大起大落。知情者說:「佢聽公司講,啲 job只係接到今年年底,之後就未有着落。老實講,佢今年都搵到夠啦,就算唔做嘢,呢兩年都唔使憂。只係 G.E.M.份人好好勝,開咗個咁靚嘅頭,就唔想衰俾人睇。」由於失眠加厭食,據知以往身形圓碌碌的 G.E.M.,在短短兩周內,體重由 118磅暴跌至 110磅。記者在上周一星期內,發現 G.E.M.先後兩次到中環秘密睇醫生。現場所見,她身形比月初在南京演唱時明顯消瘦,提到遭內地封殺,她坦言:「其實最近每個禮拜都有我啲謠言同是非,我唔理得咁多。(頭先去睇醫生?)睇營養師!(係咪想食得好啲?)希望佢可以幫到我!」

是非不斷

今年初 G.E.M.憑《我是歌手 2》爆紅,但人怕出名豬怕肥,她的一言一行即備受關注,最近更成為是非人物。

王傑寸爆

早前,王傑於深圳為巡迴演唱會宣傳時寸爆 G.E.M.:「正在走一條歪路,一味飆高音。」被問及會否請 G.E.M.做嘉賓時,他笑言個唱請不起對方。

揸車自拍

G.E.M. 9月初成功考到車牌,經常自駕外出。新牌仔於車廂中一手揸軚一手拍照,隨即被網民鬧爆,事後她亦公開道歉。

疑似淫照

馬賽淫照事件後,網上曾流傳一輯疑似 G.E.M.淫照,相中人與 G.E.M.有 9成相似,其經理人隨即發聲明澄清照片中人並非 G.E.M.。

耍大牌要求多

其實 G.E.M.今次遭封殺,「致死」原因是她在內地走紅後,經理人張丹為她斟洽演出時,經常獅子開大口;又試過反口抬高價錢,因此嚇走不少內地廣告商。「有護膚品商五個月前接洽 G.E.M.拍廣告,當時初步談好是 400萬人民幣,爆紅後其經理人就開始反價至千萬,結果激嬲廣告商。」除了突然加價, G.E.M.更當正自己是亞洲天后,要求搞個唱的內地主辦商,要預先安排兩張頭等機票、提供 10間酒店套房及六個黑人保鑣團跟身。

同時,要求多多的 G.E.M.亦規定商演活動的海報,要將她的照片放在中間,張相亦一定要比其他人大,處處無理地斤斤計較!試過不合心意, G.E.M.經理人張丹堅持客戶重新印過另一批,否則拒絕演出。由於她要求的待遇媲美國際巨星,因此不少廣告商講明冇下次,消息一傳十、十傳百,導致 G.E.M.出現有價冇市的情況。

賴公司政策

周二( 18日), G.E.M.出席演唱會記招,身邊的經理人張丹忽然改變以往採訪方法,竟要求平面記者與電子媒體記者一同做訪問,結果激嬲現場傳媒。事後 G.E.M.一味扮唔知情說:「其實我一向唔知公司點安排,只會理自己嘅表現。」看來 G.E.M.真係要好好同公司溝通吓。

《蘋果日報》圖片

網友唔撐

被轟大話精

年中 G.E.M.與當紅的韓國明星金秀賢到上海拍廣告,結果 G.E.M.遭對方冷落。事後竟直言自己唔知金秀賢有幾紅,後來遭網友踢爆她講大話,𤓓到震!

演唱會開癲價

G.E.M.在港開演唱會,最貴門票索價近$2,000,貴過一線巨星近兩倍。

在內地冇運行,在港屬二線歌手的 G.E.M.,依然自覺「升呢」。為凸顯尊貴的身價,明年 1月在港舉行的演唱會門票竟然開天索價,最貴的 VIP票價要$1,880,次一級亦要$898,貴過香港一班天王天后級歌手。一連四場的門票,現正進行內部認購,但據知由於定價太高,內部認購情況麻麻。知情人透露:「其實上次 VIP套票定咗$1,280,比其他一線歌手貴足一倍,內行人已經話好險,依家仲要去到差唔多二千蚊一張,佢哋根本冇理過個市場反應。你睇 Sammi開演唱會,未公開發售已經話要加場,但 G.E.M.呢邊靜英英就知咩事」對於演唱會被指「搶錢」, G.E.M.坦言:「其實$1,880唔係單一個唱門票,而係包括前排靚位同禮物包,歌迷仲可以到後台同我個蠟像影相留念。其實外國演唱會都有咁嘅做法。」照她所講,歌迷願意俾癲價,都只能和她的蠟像合照,認真多謝夾盛惠。

厭食女星如紙板美人

圈中女星大部分都認同瘦就是美,不過暴瘦始終不是好事。近年不少女星因工作壓力大及感情問題而患上情緒病,甚至惡化成厭食症。

周秀娜皮包骨

周秀娜去年初與男友 Avis甩拖後盛傳患上厭食症,體重由本來 100磅跌至人生最低點 88磅,就連澎湃的上圍亦大縮水。

黃聖依面頰凹陷

去年年尾黃聖依在港拍《 3D冰封俠》,被拍到面頰凹陷,暴瘦如紙板人,疑因工作太忙患輕微厭食症。

薛凱琪人瘦頸長

薛凱琪早年因情緒病經常失控,患上抑鬱症的她瘦到無可再瘦,厭食至體重只得 90磅,更曾有自殺念頭。

林欣彤雙料困擾

初出道的林欣彤因壓力爆煲及聲帶出現問題,雙料困擾令情緒低落。向來有 baby fat的她突然暴瘦,經過長時間的休息與治療,才能回復正常生活。



鍾意就快D Share啦!
Related Posts Plugin for WordPress, Blogger...