掃呢頁CODE去手機

2014年12月19日 星期五

[忽然1周 - 1012] 老公湊女拎手袋 洪欣御夫有術 洪欣,MW,




睇張丹峰幫老婆攞手袋個款,就知佢幾 enjoy服侍老婆。洪欣少女 look襯名牌,同嫩夫拉近距離。

娛樂喧

老公湊女拎手袋 洪欣御夫有術

現年 44歲的洪欣, 09年與年輕 11年的內地演員張丹峰結婚,今年二月更誕下幼女張晞彤,而她與莫少聰所生的長子浩鋒更改姓張,足見一家四口樂也融融。

產後的洪欣身形依然纖瘦,早前在 ifc「鳩嗚」時,恍如女皇出巡,皆因廿四孝老公全程在旁服侍周到。張丹峰不但幫手孭女、拎手袋,陪老婆濕平完仲自動自覺攞埋戰利品。老公聽話到咁,洪欣的確御夫有術。







近年在內地發展的洪欣,甚少在香港曝光。雖然她高齡產女,樣貌與身材卻 keep得好,絕對是「美魔女」典範。上周,素顏洪欣「孭」住十個月大的囡囡張晞彤出現中環 ifc「鳩嗚」。洪欣恍如女皇出巡,老公張丹峰則細心照顧。

當天,張丹峰泊好車後到商場會合老婆。兩人先行咖啡機店,張丹峰試飲後,便豪買了部過千元的咖啡機。行出門口時,洪欣隨手便將近 3萬元的 Chanel手袋遞俾老公,之後齊齊走往 city'super買蛋糕。

稱識湊仔公

之後他們到 food court坐低食蛋糕,張丹峰則跪在旁邊「服侍」老婆與囡囡。其間囡囡扭計喊,洪欣有點煩躁,張丹峰立刻施展冧女大法,搞好多小動作,終於逗得囡囡笑番。離開時更由他孭女,果然是個稱職湊仔公。 15歲的大仔(洪欣與莫少聰生的兒子莫鎬廉,現已改名張浩鋒)此時會合他們,兩父子雞啄唔斷,大仔更「肉緊」地狂啜妹妹,場面搞笑。

本刊致電洪欣,對於老公的體貼,她表示是正常家庭生活。

記:記者洪:洪欣

記:老公幫你拎手袋?

洪:重嘢佢就會幫我拎。

記:見佢成日幫手湊女,好熟手。

洪:如果唔使開工,同平常人一樣。我哋相處十年,有時嗌交,有時又會好恩愛。呢啲都係好正常嘅家庭生活。

記:囡囡好得意,個樣似你?

洪:個女比較活潑、好動囉,成日郁來郁去,坐唔定,未識行住。好多人話似我老公,有啲又話似我。

公主扭計,張丹峰不敢怠慢,全程踎喺旁邊𠱁佢,囡囡最後終於笑番。

見到公主嘴邊有蛋糕碎,張立即細心抹掉。

張浩鋒對同母異父的妹妹十分愛錫,見到便狂啜,好熱情。

老公孭住囡囡,洪欣好悠閒嘆咖啡。

大仔黐老公

記:大仔都好黐你哋?

洪:依家無咁黐,佢大個仔嘞,唔係成日跟住。佢依家會選擇,睇我哋去邊,食乜,鍾意先跟。

記:大仔係反叛期?

洪:都係,不過佢都乖。我唔批准嘅嘢,佢唔會做,去邊都問過我。

記:大仔同老公相處點呀?

洪:由細到大,爸爸都縱佢,所以佢同爸爸多啲嘢講,因為媽咪(指自己)好嚴。

記:大仔同囡囡相隔十多年喎!

洪:咁先好,哥哥好錫妹妹,兩個又唔使爭玩具,唔會有衝突。哥哥成日將個妹舞來舞去,當佢玩具一樣。

洪欣仲話有一仔一女已經好滿足,決定封肚,因為湊 BB好困身,佢想同老公有多啲二人世界,咁至可以 keep住恩愛喎。據知以往兩人很抗拒夫妻檔工作,不過,依家為了爭取時間見面,兩人會齊齊拍劇兼上節目。

張丹峰是內地當紅小生,今年憑電視劇《花千骨》人氣急升。

洪欣出席內地一個商演賺七、八萬人仔,近日同老公齊齊參演《辣媽學院》,一集收廿萬,好和味。

再嫁都幸福

「女人最怕嫁錯郎!」此言 out了。不少女藝人再婚,分分鐘幸福過首段婚姻。

朱玲玲

77年奪港姐冠軍,九個月後即下嫁霍震霆並育有三子,兩人直至 97年分居,不過 06年才對外公布。 08年她於新加坡與瑞安集團的羅康瑞結婚,婚後兩人經常一起出席活動,非常恩愛。

謝寧

85年港姐冠軍謝寧, 91年退出娛樂圈,其後嫁給藝人岑建勳,婚後育有兩女。 05年,謝寧宣告與岑建勳離婚。 10年覓得第二春嫁人,與無綫攝影部主管男友王德偉拉埋天窗。再婚的她更積極發展曲奇事業,家庭事業兩得意。

陳伶俐

96年選港姐,翌年與林敏驄公開戀情, 98年懷孕而宣布婚訊,可惜 08年離婚,兩名兒子撫養權則歸她所有。兩年前她再婚,低調嫁新加坡隱形富豪胡嘉烈後人劉頌銘,今年 11月更為兒子舉行百日宴。



鍾意就快D Share啦!