探熱針
秘娶空姐 3年 朱健鈞黐發哥回歸
當年被無綫捧為「少年五虎」之一的朱健鈞，曾經高踞信和賣相龍虎榜五甲，與四大天王銷量睇齊，更紅到去馬來西亞，一下子在娛樂圈銷聲匿跡的他，原來三年前已同空姐女友結婚，並有個一歲半仔。
由熒幕偶像變成住家男，近年經好友鍾漢良搭路，朱健鈞轉攻內地，還有機會拍杜琪峯新作《華麗上班族》，黐住發哥 Eason湯唯回歸。
兄弟搭路
在娛樂圈冇晒聲氣的朱健鈞，三年前跟空姐女友 Elvina結婚，兒子今年歲半大，當年的少年譚詠麟，已變成一個四張湊仔公。
「朱仔份人好低調，無乜野心！○七年由無綫去咗亞視，佢只係做咗一年，就冇再續約。平時好少同圈中人來往，因為朱仔唔鍾意蒲亦唔識得應酬，結婚之後仲黐家，兩公婆追求簡單生活，好夾！」知情者說。
《少年五虎》至今，已經超過二十年，朱健鈞跟同劇拍檔鍾漢良好老死，雙方一直保持聯繫，在內地爆紅的鍾漢良，更加為好兄弟搭路，返內地拍劇。
「當年佢哋一個扮阿倫一個扮阿 B，做咗廿年好兄弟，鍾漢良見自己喺內地企穩咗，於是幫朱仔搵機會，一一年兩個一齊喺內地拍咗套《一觸即發》，喺香港無聲無氣，但而家朱仔喺內地 keep住有 job！」
湊仔公
拍劇結緣，九四年同胡楓合作處境劇《開心華之里》，朱健鈞和對方上契，做了胡楓契仔。
「朱仔同 Elvina結婚，修哥一家都有出席婚宴，兩年前修哥八十大壽，喺紅館開紀念騷，朱仔全家去捧場，仲上台唱歌！」
上週五（十二月十二日），朱健鈞湊住餅印一樣的歲半囝囝，到海港城玩具反斗城買玩具，只見他抱住兒子在店內走來走去，拋完波波再騎木馬，廿四孝老豆陪玩，搞到不停要攞紙巾抹汗。
除了轉攻內地，朱健鈞更有機會接拍杜琪峯新片《華麗上班族》，與發哥 Eason湯唯合作。
「最初傾呢部戲，朱仔係覺得角色好吸引，佢估唔到原來可以同咁多紅星合作，可以話係意外收穫。」知情者說。
|
鍾意就快D Share啦！
|
|
|
