七十九歲的顏傑強，帶記者參觀柴灣車廠，站在舊巴士前拍照時，三十秒已不耐煩，嫌熱走人，對中巴昔日的光輝，已無眷戀。
大錢題
中巴三姊弟 力守$70億金礦
香港股壇有一隻被遺忘的奇股，名為中華汽車（ 26）。聽來陌生，因為以往香港人習慣叫它做「中巴」，是不少港島人的集體回憶。自九八年失去中巴專營權後，公司亦逐漸被股民淡忘。但最近，再有「眼利」的投資基金，相中中巴潛藏的龐大資產，為「掘金」而扭盡六壬，令這間老牌公司再浮上面。
由中巴後人、顏氏三姊弟打骰的中華汽車（下稱中巴），市值逾二十九億，但公司單是現金儲備已近二十六億，淨資產超過七十億，是名符其實的「金礦」。多年來，不少金融大鱷都對中巴虎視眈眈。○二年，禹銘（ 666，現稱新工投資）提出以每股一仙收購，狙擊中巴，轟動一時。事隔十二年，今日再有基金來勢洶洶，原來幕後老闆正是惠理集團（ 806）創辦人葉維義。小股東可否藉此搭程順風車？本刊找到公司第二大股東、現任副監理的中巴大少顏傑強，公開反擊基金的連串利誘、離間動作，大揭中巴不為人知的秘密，以及三姊弟之間「心和面不和」的微妙關係。
略知中巴故事的金融界人，都知顏氏三姊弟「難搞」，多年來，不乏淘金高手埋身，均碰壁而回。由父親欽點繼任主席的大家姐顏潔齡，是律師，性格強悍，排名第三的二少顏亨利（又名顏傑文）是醫生，內向低調。排行第二、平易近人的大少顏傑強，便成為公司的代言人。中秋前，記者準備了英國茶葉及酥餅，附上卡片，送給顏傑強，邀約訪問。禮物輾轉錯送到顏亨利手上，被原封退回。心灰之際，收到剛從瑞士回港的顏傑強來電，大呼寃枉：「禮物係我細佬退還。我係爵士，從來唔會退返俾人咁無禮貌！」
恩人敲門 大少緊張
以英國貴族自居的顏傑強，擁有子爵爵位，嫌中巴柴灣總部「隔涉、污糟」，九十年代起，便長租銅鑼灣怡東酒店的行政套房，作為私人「辦公室」。來電翌日，便約記者到酒店見面。身穿西裝的顏傑強，精神奕奕，第一時間遞上「回禮」：「我係子爵，梗係要回禮， Cova朱古力來㗎。」紙袋還細心地寫上記者的名字和簽名「 From Lord Ngan」。
甫坐下，顏傑強即忍不住探口風：「嗰間基金同你哋講咗咩呀？」然後再自爆：「佢哋搵過我，我冇見佢哋，但送番兩條呔俾佢㗎，好靚㗎，係 Hermes。」顏傑強表示，禹銘狙擊事件後，一直都有基金、馬主及英國的朋友，跟他商討洽購中巴股份，前後約七、八次，「我都冇興趣，十英鎊（一股）唔賣，二十鎊唔賣，二十鎊即係二百四十蚊，依家中巴市價係六、七十蚊，即係我完全冇興趣賣！」他決斷地說。
不過，顏傑強明顯對今次來敲門的基金 Argyle Street Management Limited（ ASML），分外緊張，更主動提起基金幕後老闆之一葉維義。原來，雙方家族早有淵源。八一年，富商羅鷹石兒子羅旭瑞旗下的百利保，以每股三十五元收購中巴股份，與顏氏大打收購戰，最終因收購股份不足而失敗。顏傑強提到此事時仍心有餘悸：「我哋使咗幾億， almost傾家蕩產，連媽咪自己嗰幾千萬都拎出嚟。當時葉維義父親葉謀遵出手相助，對我哋有恩。」雖然如此，但兩家人甚少來往，「我喺馬場見過葉謀遵，有打招呼。」顏傑強指 ASML是對沖基金，不會「買起」中巴，「佢哋只係想投資，見我哋 undervalued，想買啲貨。」
每股值一百六十元
是次向顏家敲門的 ASML，○二年成立，辦公室位於中環，主要投資於亞洲市場。活躍於金融界的葉維義，曾出任行會成員，現為惠理集團第二大股東兼名譽主席。據知情人士透露， ASML「吼住」中巴多時，曾接觸三姊弟，尤其是顏傑強，「主席顏潔齡唔騷人，二少亦冇回音，基金最後一招，係說服顏傑強，由佢聯同二少，拉家姐落台，公司先有轉機。」
確實，顏傑強一收到基金的「橄欖枝」，待細佬顏亨利從英國「抖暑」回港，即上門報信。「傑文計過，話每股值一百六十蚊（現時中巴股價六十三元），仲話中巴有足夠力量應付任何挑戰。」顏傑強招積地指，基金「唔會做到乜嘢」，因為細佬亦不會賣股，「佢一年收到千幾萬股息，用咗一百萬，仲有九百幾萬唔知點用。」他打趣道：「早兩日探佢，見佢咁寒酸，買咗兩件 Cashmere俾佢，一萬蚊件㗎。」
顏傑強指中巴其他股東，大多持股超過十年，甚至三、四十年，志在每年收幾萬元股息，到股東會吃個茶點，野心不大，不易接受新的人事變動，「如果係 Hutchison（和黃）或李澤楷，一出手有五十億就得，但人哋計過條數唔值呢個價。」上週四，顏傑強突然來電，指親自帶同文件來將軍澳工業邨（本刊寫字樓）找記者。原來是一份手寫聲明，第一句就表明：「目前任何對中巴收購或購買股權事情，注定會失敗。」
大家姐「一言堂」
記者曾多次到中巴柴灣破舊的總部外，等候中巴真正的話事人顏潔齡，甚至跟顏傑強進入中巴寫字樓，均未見家姐蹤影，「我都唔知。我返八放十二，家姐就返下午五點，十點走，所以冇機會見。」問到為何父親當年欽點家姐揸弗，他指自己不喜歡做地產：「 So boring! I am an engineer!如果起間廠整巴士，我會好有興趣。」
中巴當年雖失去巴士專營權，但保留不少車廠地皮，便轉型成發展商。○六年落成的北角港運城，由中巴與太古合作建成，如今仍有多部中巴舊車免費接載市民來往港運城及北角政府大樓。最新項目，是與太古發展黃竹坑地皮。有指太古的合作條件很「辣」，顏傑強承認：「其他大公司唔鍾意同中巴做生意，咁潔齡係律師，傑文係教授，我係 Engineer，冇人識地產，唯有同人合作。（其他公司怕咗家姐？）呢啲唔講咁多啦，總之得太古勉為其難同我哋做。我哋出地，發展上佢哋出一百元，仲要我哋俾四十蚊，（太古）賺到盡。」
顏傑強指公司由「顏律師」及「顏醫生」打理，自己僅參與開會，他笑指：「佢（潔齡）同老公同傑文吵，我就做和事老。我同佢哋好唔同，我好圓滑，呢啲係喺英國學返嚟，英國佬好風趣㗎嘛。」被問到顏潔齡出名獨裁，他攤開手道：「咁佢保守嘛，唔通你一槍打死佢？兵戎相見？社會上好多呢啲你告我我告你，為咩啫。」公司八十周年時，顏傑強曾提出每股派發十元特別息被拒，最近細佬再提增加派息，亦不得要領。他無奈道：「可能家姐係律師，諗住唔使錢，錢就唔會冇晒。不過佢個心都係想中巴好，只係唔識點做。」
英國貴族 出手闊綽
顏氏三姊弟雖一同打理公司，但私下甚少見面，「大家教育、生活習慣完全不同，不過有挑戰，就會坐埋一條船。」顏傑強解釋：「佢哋飲酒、食點心，我從來唔飲酒，淨係食一片火腿、一片蛋。」家姐細佬生活節儉，出入坐日本車。顏傑強愛坐積架，又是馬主。平日出手亦闊綽，出入酒店，職員每為他拉一次車門，便有一百元貼士。問到生性節儉的父親是否怕他「大使」，才將公司交予家姐，顏即緊張道：「我從來冇使公司錢，好早已經自己請司機。嘩，佢哋啲司機揸完巴士再來揸我架車，咪整污糟我架積架！」
顏傑強另有自己的舞台。多年來，他投資英國近十七間公司，包括 Shell、馬莎等，現時仍為一間貨運物流公司的主要股東。「英國嗰邊覺得我貢獻良多，授個 Baron（男爵）俾我！係由 Prince Philip（菲臘親王）授予。」後來，更再進一級，成為「子爵」。近年，他忙於歐洲外交項目，如○九年出任斯洛文尼亞非長駐大使，一三年又調任為盧森堡非長駐大使，亦獲頒授不同勳章。顏傑強以此為榮：「我喺出面做咁多嘢，邊得閒搞中巴。」
顏氏王國或傳外姓人
姊弟關係雖非親厚，但顏傑強在聲明中指，父親經營中巴的理念是「勤儉為主，積少成多」，顏潔齡繼承家業後，公司能累積近三十億現金，他亦引以為榮。事實上，白手興家的顏成坤出名慳家。一九二四年，他與妻子弟弟黃耀南成立中華汽車，初時只在尖沙咀及紅磡一帶服務。十年後，取得港島區巴士專營權，並於一九六二年上市，七十年代是全盛時期。顏成坤日日無休工作，夜來喜歡在公司數銀仔，一件內衣都要穿至破爛才添置。
老闆不捨花錢，八十年代開始，中巴服務經常被投訴，如車廂污糟、有曱甴，以及司機不穿制服、無故飛站等，同時司機亦鬧出多次罷工。九八年，終於失去巴士專營權。提起此事，顏傑強爆出一個不為人知的秘密：「當年政府同中巴傾專營權時，曾經話，只要唔俾顏潔齡做主席，就同你哋續約。」他指此事只得當年參與談判的官員，包括許仕仁、陳方安生、曾蔭權等知道，「最後佢（顏潔齡）嘈到通晒天，就冇咗件事。」
顏成坤於○一年病逝，顏氏姊弟出管中巴至今，仍未有新一代繼承人。第三代中，只得顏亨利育有一女，亦為醫生，長居英國。「我知人係會死，十年前已經講過話要搵外姓人入來，但佢（顏潔齡）唔肯，我都唔知佢想點，可能覺得自己可以 stay longer。」至於自己的財產，他則表現豁達：「我死先嘅，咪俾啲股份細佬，俾啲我個 wife，俾啲東華三院。我都冇第三代！」
神秘大戶現身
中巴的主要股東名單上，除了顏氏三姊弟，還有一個外姓人陳君實。他和太太黃慧貞共同持有中巴一成二股份，市值約三億五千萬，持股量比主席顏潔齡還要多。上週四，記者找到住在天后的陳君實，一頭白髮的他，精神不俗，更邀記者入屋詳談。陳君實祖籍福建惠安，四九年來港打拼，後創立實用貨倉，白手興家。他強調與顏氏並不認識，只是早年見到顏成坤十分勤力，對中巴有信心，因此在三、四十年前開始，陸續買入中巴股份。「當年我住北角新邨，見到顏成坤每日揸住架 3333車牌嘅綠色積架，來視察車廠，即係依家成坤廣場嗰度。佢會同員工傾偈，連星期六、日都返工，我覺得呢個人好勤力、可靠。」陳君實回憶道。
已退休的陳君實，從沒有參與中巴事務，股東會則由女兒代為參加。過往中巴被狙擊，他都置身事外，「冇人接觸過我。」對於最近再有基金對中巴有興趣，他笑指自己「被夾喺中間」，但不打算出售股份，「我鍾意穩定嘅股票，中巴好啱我。我每年收息，穩穩定定已經好滿意，唔想有大變動。」
|
鍾意就快D Share啦！
|
|
|
