2014年12月18日 星期四

[壹週刊 - 1293] TVB跑唔夠數 阿佘攞視后救亡 TVB,佘詩曼,阿佘,M1,




回歸 TVB,阿佘袋三千萬,可惜過去一年多,未能幫公司搵大錢。

探熱針

TVB跑唔夠數 阿佘攞視后救亡

大台膠劇收視持續下跌,全年稍為叫好只得一套《使徒行者》,本週一晚(十二月十五日)舉行的《萬千星輝頒獎典禮 2014》,《使》劇成為「最佳劇集」外,佘詩曼亦靠「釘姐」一角,包攬視后和「最受歡迎電視女角色」。

零對手、攞視后,阿佘得獎眾望所歸外,亦關乎去年初「殼王」陳國強以三千萬兩年急召她回巢後,但經理人部門卻遲遲未能安排阿佘接 job跑數。回歸價與收入不相稱,谷阿佘做視后,講到尾都係因為個「錢」字。

過往無綫人接拍公司有份投資的電影,利是當片酬,但阿佘孖古仔拍《衝上雲霄》卻收足 150萬。(《蘋果日報》圖片)

阿佘國內劇酬廿萬人仔起跳,去年拍《嫁入豪門》,八百萬袋袋平安。

非佘莫屬

佘詩曼憑《使徒行者》丁小嘉「釘姐」一角,繼○六年《鳳凰四重奏》後,再度成為雙料視后。從汪阿姐手上接過獎項,身穿二十五萬法國訂製晚裝的阿佘眼濕濕說:「人哋話我攞硬,但真係唔容易,要付出好多,有好角色又要好好把握!我今次好好彩,仲有要多謝媽咪,我壓力好大會𤷪𤺧,佢永遠俾燦爛笑容我。」

表面睇,阿佘眾望所歸,但上月中,有客戶傾阿佘出席聖誕、除夕倒數活動時,大台的經理人部門已表明,出騷價會上調,暗示阿佘會再做視后。

「 Management話到明頒獎禮之後嘅聖誕、 count down騷,阿佘個價會唔同咗,實加價。」一名活動搞手透露。

凌晨三時,做完訪問的雙料視后,走到電視城門外同粉絲開香檳慶祝,然後直接返回九龍塘住所,未有外出慶祝。

唔到數

近年大台蜀中無大將,新任揸 fit人「殼王」陳國強,去年親自開出三千萬兩年條件,急召阿佘回巢拍劇。由於是史無前例天價,數字足夠簽五、六個一線花旦小生,作為上市公司,要同股東交代,所以阿佘名義上是大陸子公司 TVBC旗下藝人,實質工作管理,全由大台經理人部門負責。

阿佘三千萬袋袋平安,但合約年期已經完了一半有多,除了《使徒行者》和頂替台劇天后林依晨補位拍《愛情來的時候》,其間一直冇接大陸劇搵真銀。據知,公司原定安排阿佘今年底同黃宗澤接拍國產電視劇,但內地持續實施縮緊使用港、台演員政策,最後搵人仔夢碎。至於阿佘手上的廣告合約,大部分是早年簽落,加埋細眉細眼的商演活動收入,過去一年零四個月,收入只僅僅過千萬,與三千萬目標價,還有一段距離。

一向睇「數」做人的高層李寶安,在開大會時曾公開下令經理人部門,要在阿佘合約期滿前,追數填氹。

「阿佘離開無綫嗰兩年,拍咗《嫁入豪門》同《忽必烈傳奇》兩套大陸劇,加上有十個廣告喺手,連埋商演活動,要搵三千萬其實冇難度,但返到 TVB,公司幫唔到佢接大陸劇拍,又𢱑唔到新客拍廣告,收入差成截!」知情人說。

同樣無得輸的郭晉安,憑《忠奸人》再度封視帝,並與頒獎嘉賓 Chilam齊齊玩自拍。

非親生仔女的張繼聰和何超儀爆冷奪得「飛躍進步男藝員」和「最佳女配角」。

收市價

明年阿佘將會拍大台新劇《呂后傳》,但公司劇無肉食,要安排她接拍電影《十月初五的月光》和《衝上雲霄》電影版,無綫有份投資《衝》片,亦習慣用自己友俾利是當片酬,但今次企硬幫阿佘收足市價一百五十萬,幫手填數。

引佘入洞,卻未能為公司廣開財路,無綫經理人部門絕對難辭其咎,為免再孭鑊,今年初同林峯傾續約,大台亦只敢開價保守,最終留唔低林峯,而同樣滿約在即的胡杏兒,即使獲公司安排轉簽 TVBC,但同樣因為價錢問題,雙方仍在拉鋸中。想靠講心唔講金留低胡杏兒的機會,一個字:低!

拍電影有時限,加上新劇有排都未開工,阿佘近日不時抽空同周家蔚等飯局敍舊。

大台人工奀,工時長,花旦、小生雞飛狗走,入主無綫的殼王去年開出三千萬親自欽點阿佘回巢。(《蘋果日報》圖片)

大台未能從阿佘身上賺大錢,負責掌管經理人部門的樂易玲難辭其咎。(《忽然 1周》圖片)

同大台未傾掂續約的胡杏兒,孖住緋聞男友李思捷上台頒獎。

經歷阿佘天價回巢,公司追唔切數後,大台不敢再以銀彈留人,林峯最終轉投英皇。

走得快、好世界

無綫出名孤寒又小氣,小生花旦寧願北上搏一搏,爭相逃亡。

吳卓羲

上月, TVB在大馬舉行頒獎禮,「親生仔」吳卓羲居然連豬肉獎都分唔到,加上近年陳展鵬彈出,吳卓羲由主角變大配角,尚有半年合約的他已心灰意冷,並向外放風已有中港公司斟過檔。

胡杏兒

明年約滿的胡杏兒,揚言想工作同生活取得平衡,放晒聲氣會離開,無綫於是先發制人,將她孭飛的《醋娘子》押後推出,令胡杏兒無機會入圍角逐今年視后。

阮兆祥

上月跟商台合作搞四場棟篤笑,有 200萬進賬的阮兆祥,有錢賺唔預無綫,加上在棟篤笑開口撐港視,即時辣㷫大台,將他飛出《歡樂滿東華》,新劇《性在有情》戲份亦大減,有傳阮兆祥大感無癮,明年約滿即走。

王祖藍

憑扮嘢搞笑成功上位的王祖藍,近年密密北上做綜藝節目,於《奔跑吧,兄弟!》及《百變大咖秀》大受歡迎,勁賺 400萬人仔,收入勝無綫十倍,明年約滿的他有意飛起大台,疊埋心水北上掘金。



鍾意就快D Share啦!
Related Posts Plugin for WordPress, Blogger...