回歸 TVB，阿佘袋三千萬，可惜過去一年多，未能幫公司搵大錢。
探熱針
TVB跑唔夠數 阿佘攞視后救亡
大台膠劇收視持續下跌，全年稍為叫好只得一套《使徒行者》，本週一晚（十二月十五日）舉行的《萬千星輝頒獎典禮 2014》，《使》劇成為「最佳劇集」外，佘詩曼亦靠「釘姐」一角，包攬視后和「最受歡迎電視女角色」。
零對手、攞視后，阿佘得獎眾望所歸外，亦關乎去年初「殼王」陳國強以三千萬兩年急召她回巢後，但經理人部門卻遲遲未能安排阿佘接 job跑數。回歸價與收入不相稱，谷阿佘做視后，講到尾都係因為個「錢」字。
非佘莫屬
佘詩曼憑《使徒行者》丁小嘉「釘姐」一角，繼○六年《鳳凰四重奏》後，再度成為雙料視后。從汪阿姐手上接過獎項，身穿二十五萬法國訂製晚裝的阿佘眼濕濕說：「人哋話我攞硬，但真係唔容易，要付出好多，有好角色又要好好把握！我今次好好彩，仲有要多謝媽咪，我壓力好大會𤷪𤺧，佢永遠俾燦爛笑容我。」
表面睇，阿佘眾望所歸，但上月中，有客戶傾阿佘出席聖誕、除夕倒數活動時，大台的經理人部門已表明，出騷價會上調，暗示阿佘會再做視后。
「 Management話到明頒獎禮之後嘅聖誕、 count down騷，阿佘個價會唔同咗，實加價。」一名活動搞手透露。
唔到數
近年大台蜀中無大將，新任揸 fit人「殼王」陳國強，去年親自開出三千萬兩年條件，急召阿佘回巢拍劇。由於是史無前例天價，數字足夠簽五、六個一線花旦小生，作為上市公司，要同股東交代，所以阿佘名義上是大陸子公司 TVBC旗下藝人，實質工作管理，全由大台經理人部門負責。
阿佘三千萬袋袋平安，但合約年期已經完了一半有多，除了《使徒行者》和頂替台劇天后林依晨補位拍《愛情來的時候》，其間一直冇接大陸劇搵真銀。據知，公司原定安排阿佘今年底同黃宗澤接拍國產電視劇，但內地持續實施縮緊使用港、台演員政策，最後搵人仔夢碎。至於阿佘手上的廣告合約，大部分是早年簽落，加埋細眉細眼的商演活動收入，過去一年零四個月，收入只僅僅過千萬，與三千萬目標價，還有一段距離。
一向睇「數」做人的高層李寶安，在開大會時曾公開下令經理人部門，要在阿佘合約期滿前，追數填氹。
「阿佘離開無綫嗰兩年，拍咗《嫁入豪門》同《忽必烈傳奇》兩套大陸劇，加上有十個廣告喺手，連埋商演活動，要搵三千萬其實冇難度，但返到 TVB，公司幫唔到佢接大陸劇拍，又𢱑唔到新客拍廣告，收入差成截！」知情人說。
收市價
明年阿佘將會拍大台新劇《呂后傳》，但公司劇無肉食，要安排她接拍電影《十月初五的月光》和《衝上雲霄》電影版，無綫有份投資《衝》片，亦習慣用自己友俾利是當片酬，但今次企硬幫阿佘收足市價一百五十萬，幫手填數。
引佘入洞，卻未能為公司廣開財路，無綫經理人部門絕對難辭其咎，為免再孭鑊，今年初同林峯傾續約，大台亦只敢開價保守，最終留唔低林峯，而同樣滿約在即的胡杏兒，即使獲公司安排轉簽 TVBC，但同樣因為價錢問題，雙方仍在拉鋸中。想靠講心唔講金留低胡杏兒的機會，一個字：低！
走得快、好世界
無綫出名孤寒又小氣，小生花旦寧願北上搏一搏，爭相逃亡。
阮兆祥
上月跟商台合作搞四場棟篤笑，有 200萬進賬的阮兆祥，有錢賺唔預無綫，加上在棟篤笑開口撐港視，即時辣㷫大台，將他飛出《歡樂滿東華》，新劇《性在有情》戲份亦大減，有傳阮兆祥大感無癮，明年約滿即走。
|
鍾意就快D Share啦！
|
|
|
