2015年2月13日 星期五

[忽然1周 - 1020] 大仔秘密面試貴族學校 巨肚陳茵媺月尾提早開刀 茵媺,陳茵媺,MW,




至 fit大肚婆

周三( 11日)下午 3時許,陳豪一家三口連司機和女傭乘坐七人車由大埔寓所出發,到九龍塘 Kingston幼稚園。臨盆在即的陳茵媺雖然個肚籮咁大,但手腳依然纖幼,認真令人羨慕。

打頭陣

大仔秘密面試貴族學校 巨肚陳茵媺月尾提早開刀

陳豪與陳茵媺婚後開行 turbo全力造人,一早已揚言要生夠一隊足球隊,大仔梓燁( Aiden)去年十二月剛滿一歲,細仔亦即將出世。

為了留港照顧妻兒,放棄北上掘金的陳豪,早前與大台簽約,為趕及細仔出世,近日晚晚開通頂為新劇趕工。周三( 11日),本刊發現他秘密陪大肚陳茵媺和囝囝,到九龍塘貴族幼稚園 Kingston(京斯敦),安排 Aiden為學前班面試。

兩公婆為下一代盡心盡力。據知,陳茵媺今胎本來依舊揀順產,預產期在下個月。但生完 Aiden後,她下體曾一直滲血,要入院做手術。今胎為防再有閃失,熟手爸爸陳豪已提早向大台請假,由今個月 22號開始放足兩個月大假,更 book定醫院牀位等月尾開刀,實行兩手準備!







陳茵媺( Aimee)自去年宣布為老公陳豪懷有第二胎後,甚少蒲頭,只間中在微博上載新相。轉眼她已懷孕接近 9個月,雖然今胎不是「雙陳」預期佗女湊個「好」字,但早前陳茵媺興奮地表示:「我今胎佗得好好,但因為自己想繼續照顧大嗰個,所以今次容易攰啲,好彩 BB就快出世,依家已經覺得好興奮!呢胎我亦堅持餵人奶,盡母親責任,想俾佢哋最好嘅,對佢以後健康、抵抗力都好啲,自己亦好享受。」

Aiden仔醒神

下車後,陳豪負責抱囝囝入學校,剛滿 14個月大的囝囝 Aiden五官激似媽咪,這天他打扮 sharp醒,為面試做好準備。

見記者尷尬

陳豪見有記者在場,入學校前不禁四圍望,頗為尷尬。這時陳茵媺則嚷着要抱回囝囝,大住肚都唔怕操勞。

面試個半鐘

他們連同女傭在學校逗留了個半鐘,離開時,由外籍老師送出門口,其他老師亦笑住送別,相信今次面試大有機會成功。

護老婆上車

陳豪對於記者所有提問都笑住揮手拒答,其間亦伸開手護住老婆,十分細心。不過現場所見,陳豪似乎有個大肚腩,似乎要與陳茵媺產後一齊 keep fit。

獲特別待遇

分娩日子逼近,但「雙陳」對大仔 Aiden一樣冇鬆懈。周三( 11日)下午三時許,本刊發現挺着籮咁大個肚的陳茵媺和抱着 1歲 Aiden的陳豪,由司機接載乘坐七人車,由大埔比華利山寓所,到位於九龍塘金巴倫道的 Kingston國際幼稚園。現場所見,穿上西褲的 Aiden明顯悉心打扮,除穿上斯文格仔恤衫和針織上衣外,腳上亦穿上型仔波鞋,十分醒神。相反抱着他的老竇陳豪,除比前發福外,雙眼亦見浮腫,明顯唔夠瞓。至於臨盆在即的陳茵媺,着上黑色上衣加 legging仍難掩 50吋巨肚。據知,陳茵媺早在佗大仔 Adien時,已睇定多間幼稚園資料,除今次的 Kingston外,亦會到其他名牌學校如維多利亞幼稚園和 St.Catherine幼稚園面試。至於今次面試 Kingston,「雙陳」亦得到學校的特別安排。知情人透露:「其他小朋友面試,通常都喺同一、兩日一齊 group in,好少會個別預約時間,可能佢哋(陳豪、陳茵媺)唔想俾其他家長知,學校咪撥一個時間俾佢哋囉!」

據知,校方當日安排陳茵媺陪兒子 Aiden到其中一個課室,由兩位老師進行面試。其中一個老師和陳茵媺交談,內容大致是哪位親人日常照顧小朋友?小朋友喜歡在家中做甚麼?對小朋友的期望等?至於另一位老師,則與 Aiden邊配對砌積木,邊和他傾偈,全程以英語交談,為時接近一小時。直至下午五時,陳茵媺竟不避忌照抱着 30磅的 Aiden離開學校,反觀陳豪則兩手 fing fing。當記者問他們囝囝面試表現如何?是否面試學前班?二人一概以「哈哈哈」回應,最後乘七人車返回大埔寓所。

溫馨濕平

《蘋果日報》圖片

陳豪媽陪坐月

陳豪媽媽本身擁有 40年中醫診症經驗,她對新抱懷孕尤其緊張。據知她已預備好一連串的坐月食療藥方,為陳茵媺補身。

為穩陣揀開刀

雖然陳茵媺揚言依舊揀順產,但據知「雙陳」為此爭論過。事關陳茵媺去年生完 Aiden後,下體一直滲血,最後經診斷證實因為生產時陰道破裂而發炎兼流血,情況嚴重即時入院,幸好做手術後並無大礙。陳豪為穩陣起見,早在半年前已在舊山頂道的嘉諾撒醫院預留二月尾的牀位。知情人表示:「雖然醫生話預產期係三月,不過第二胎通常會早啲出世,加上上次 Aimee嘅情況,阿 Mo梗係唔想博啦,所以就同 Aimee商量今胎開刀,始終大人同小朋友都安全啲!」

現時正趕拍大台劇《鬼同你 OT》的陳豪,為趕及細仔出世,晚晚通頂開工趕埋尾。據知他已向公司請定兩個月大假,到時日日做湊仔公,為老婆分擔湊仔工作。

陳豪變住家男

老婆粗身大細,全家上下大小就要陳豪一腳踢。日前本刊拍得他獨自駕車外出,到寓所附近的五金舖買抽油煙機的喉管,其間發現記者,還以喉管扮望遠鏡。將榮升第二任老竇,心情梗係靚啲!

身形脹頭髮亂

之後他還到銀行㩒錢兼過數。現場所見,陳豪身形較昔日肥腫不少,髮型蓬鬆亦未有理會,睇嚟他為照顧大肚妻,其他事都拋諸腦後。

湊仔公錫身

陳豪現在拍劇明顯比以往單身寡佬時錫身。早前劇組外景拍一場在五層樓高的天台半天吊戲,導演要求陳豪親自上陣,但他堅決拒絕,極其量是在天台邊借位做反應,其餘交替身負責。「以前未結婚生仔,阿 Mo(陳豪)拍戲都好搏命,幾年前拍《心戰》一場綁住鎖鏈潛落水底戲,阿 Mo都冇用替身。依家結咗婚,又有細路諗法一定會唔同,萬一有乜損傷真係唔知點算,始終仔細老婆嫩,大家都好明白同體諒佢!」一名工作人員說。除了拍危險鏡頭錫身,陳豪連拍親熱戲都可免則免。據知他早已向公司監製表態,所有 kiss和牀上戲,一律可免則免,萬一避無可避亦要問准老婆。

挺巨肚駕車

近兩個月,陳茵媺專心養胎鮮有外出,去年 12月尾,本刊拍下她親自駕車離開比華利山寓所,載着外傭外出買餸。

陳茵媺生完囝囝後,可謂禍不單行,除了有指下體出血要入院留醫,同時由於她經常抱 B不離手兼用錯力,弄致左手手腕筋膜炎,醫治近一年,情況才好轉。

發女寒繼續生

陳茵媺三年抱兩,恨女恨到發燒的陳豪,講到明會繼續追女!他早前已經開到口說:「大家想法都一致,要多個女唔係大問題,有個女係開心。至於會唔會請教追女心得?都想,但會俾 Aimee休息吓先追!」其實陳豪如意算盤希望第二胎生女湊成「好」字,好讓陳茵媺封肚再續演藝夢,如今她冧莊佗仔,惟有全速追生。陳豪笑言:「下一個應該係女,最好生夠一隊足球隊,我哋都好鍾意小朋友,依家多個細佬,哥哥做運動有個伴。不過如果再生,間屋就要再大啲喇!」相信生完細仔後,陳茵媺肚皮都好難有得休息,想復出更加唔使諗。

提早請假陪產

正與田蕊妮和胡定欣趕拍新劇《鬼同你 OT》的陳豪,已向公司申請今個月 22日開始放假,實行全天候陪老婆湊仔。

去年 10月最後公開露面

陳茵媺懷第二胎初期,不時出席活動賺定奶粉錢。自去年 10月尾現身一法國品牌時裝展後,她便開始停工。

咖啡店下月開張

除了細仔即將出世,本刊收到消息,陳豪去年籌備位於尖沙嘴的自家品牌咖啡店,亦會在下月開張。現時咖啡店已開始裝修,待細仔滿月後,便會正式開張。知情者說:「其實阿 Mo除咗緊張老婆囝囝外,擺得最多心機就係呢間咖啡店。之前佢喺大馬開嗰間咖啡店,做唔夠一年就執咗,始終力不到不為財,所以阿 Mo喺香港開舖,樣樣都執到正睇得緊!」囝囝出世,咖啡店開張,雙喜臨門,難怪「雙陳」對着記者四萬咁口

深居簡出

臨盆在即,肚大如籮的陳茵媺都閉關居多。以往是「微博狂」的她,被老公陳豪下令要休息多啲後,上月開始已減少了上博,平均 1個月只玩兩、三次。

1月中,在家忙湊 1歲囝囝的 Aimee,搞到凌晨 1點半都未瞓,真係陰功。

2月 4日 Aimee又再蒲頭,剪了新髮型,搣走了師奶味,仲問大家覺得好唔好睇㖭!

2月 5日早上 Aimee又上載一張她有份主演的《叛徒》劇照,話係細佬在越南一架巴士上見到喎!咦!似乎 Aimee好眷戀娛樂圈喎!

入讀先付 10萬

位於九龍塘金巴倫道的京斯敦幼稚園,是城中出名的學府,有不少藝人如吳君如、方中信及郭可盈,都爭住為子女報讀,其學費更唔嘢少。

收費:每位新生需繳交學校發展費$100,000(不設退還)

學費$7,880(每月)

報名費$1,500

入讀難度:因為京斯敦有很多人爭住入,一 form難求,有錢亦冇用,所以不少家長在大肚時已報定名,出埋人情牌才拿到 form。面試時又要求小朋友用全英文進行 15-20分鐘對話,要入讀真是要過五關斬六將。

面試過程:家長可陪同小朋友面試,在 15-20分鐘英語面試中,小朋友須作一個簡短的自我介紹,如叫甚麼名字及幾多歲,再考小朋友一些生活常識,動物及顏色等。另外亦會讓他玩配對拼圖。

吳君如和陳可辛的囡囡陳是知年僅歲半時,已被安排入讀京斯敦的 playgroup,君如更動用兩部車親自送女兒上學放學。

郭可盈和林文龍在女兒林天若兩歲時,便替她報讀京斯敦學前班,為入讀名牌幼稚園鋪定路。

《蘋果日報》圖片

鍾意就快D Share啦!
Related Posts Plugin for WordPress, Blogger...