2015年8月8日 星期六

方健儀讚記性好 盧海鵬唔聽騙案電話 方健儀,盧海鵬,



盧海鵬、方健儀同埋湯怡等等,今日(8月8日)喺尖沙嘴拍港台劇《證義搜查線3》,故事係由真實個案改編,方健儀同湯怡喺戲中飾演調查員,鵬哥就做玩具鋪前輩,鋪頭就快結業嗰時,董事游說佢用不法手段賺一筆。

方健儀大讚鵬哥好好記性,當年方健儀喺《讀者文摘》獲得最具公信力新聞報導員,就係鵬哥頒獎,鵬哥仲記得,認真好記性。問佢同湯怡有冇請教鵬哥經驗,鵬哥即笑話:「粗口吖?」鬼死咁風騷。方健儀笑謂都冇所謂,多方面學習。呢排電話騙案咁多,鵬哥會唔會小心啲?佢話自己唔聽嗰啲電話嘅,唔使人講都知。

方健儀做證監調查員,多唔多資料記?佢話都以前涉獵過法例,對白冇想像中咁多。導演就讚方健儀讀對白好流暢,好似真實調查員,方健儀就話:「我做過ICAC,有執法機構背景有優勢。」又話以前睇電視就睇得多,拍劇就係第一次,感覺新鮮又好唔同。問到佢有冇興趣做演員?佢就話都OK,不過要睇下有冇導演咁大膽搵佢做啦。

至於湯怡就話今次喺對白上落咗功夫,夜晚讀劇本,讀到發開口夢都講,連媽咪都問佢講乜,不過今次咁多前輩喺度,都有少少壓力。
鵬哥頒過獎俾方健儀
鍾意就快D Share啦!
Related Posts Plugin for WordPress, Blogger...