掃呢頁CODE去手機

2015年9月30日 星期三

周柏豪捨命陪母萬四呎攬跳 柏豪,周柏豪,

柏豪大讚媽咪棒,有膽量挑戰自己極限,在一萬四千呎高空跳傘。

周柏豪捨命陪母萬四呎攬跳

向來是廿四孝乖仔的周柏豪不時攜同雙親環遊世界,中秋節遠赴澳洲與媽咪「起雙飛」,飛上一萬四千呎高空「攬跳」降傘,齊齊做一對「攞膽母子兵」。最值得拍手掌的是,周媽媽已年屆58歲,今次本着大無畏精神,主動要求挑戰人體極限,最後成功化身成航空「母」艦完成壯舉。心口掛個勇字的周媽媽事後大嗌Happy,相反畏高的柏豪就嚇到鼻哥窿都冇肉!

在剛過去的中秋節,周柏豪與媽媽以最嚇破膽的方式慶祝人月雙圓,他在香港時間9月27日在澳洲墨爾本舉行「Perfect 8演唱會」第七站,順便帶父母遊澳洲度假。當演唱會圓滿結束後,現年58歲的周媽媽竟主動「挑機」,要求乖仔帶她玩跳降傘,起初柏豪嚇到O嘴,但最後為了完成媽咪心願,決定在一萬四千呎高空「比翼雙飛」!

其實柏豪在去年七月中在澳洲拍攝新碟封套時,曾瞞住父母及經理人公司偷玩跳傘,因他本身有畏高,所以去年一跳純粹挑戰個人極限。不過今次澳洲之旅,本想純粹陪父母輕輕鬆鬆到處遊覽,怎料媽媽主動提出要求玩降傘,才決定「捨命陪老媽子」。

周柏豪去年偷玩跳傘,克服畏高。
  • 周柏豪去年偷玩跳傘,克服畏高。
周媽媽如願飛天。
  • 周媽媽如願飛天。
柏豪與媽咪玩自拍,旁邊是周爸爸。
  • 柏豪與媽咪玩自拍,旁邊是周爸爸。
周媽媽玩跳傘,未玩緊張,玩完好high。
  • 周媽媽玩跳傘,未玩緊張,玩完好high。

體檢過關心臟100分

兩母子完成這次高海拔挑戰後,柏豪大讚阿媽「好勇」,更在社交網站上載媽媽飛天一刻,並留言示愛晒溫情:「我媽真的很棒,主動要求跳降傘,好吧,我就跟你再跳一萬四千呎來吧,媽,你真的很棒,我愛你。」

柏豪接受記者長途電話訪問時,坦言今次再接受跳傘挑戰,令他雙倍驚青:「我當然好驚啦,上次高度係一萬二千呎,但今次係一萬四千呎喎,我擔心我自己。第二,梗係擔心阿媽啦,始終佢年紀大。」

他表示今次難得與媽咪到澳洲,天氣好兼有一班朋友陪跳,又擔心媽媽再重遊澳洲時,已沒有勇氣跳傘,故「批准」媽媽這個勇敢的要求:「阿媽講咗一樣最有說服力嘅係,佢啱啱做完身體檢查,醫生話阿媽心臟100分,咁我都冇藉口唔跳啦。」柏豪又透露媽媽跳傘後心情Hyper,可惜他沒有跳傘牌,未能抱實母親齊齊跳:「阿媽同我一樣,跳之前感覺好緊張,跳完之後發覺,驚咗咁耐嘅嘢,反而做完會好開心、好滿意囉。」

老竇:有10萬就跳

可是周爸爸的膽量不及周媽媽,柏豪笑稱曾出動銀彈攻勢,利誘爸爸跳傘,可惜最終未能成功:「我哋好想我老竇跳,仲講笑話『如果你跳就畀十萬蚊獎金你』,我老竇立即問係咪有十萬蚊呀,有錢佢就跳,但當然我唔會畀十萬蚊啦,哈哈。」另外,據知柏豪的圈外女友Stephanie因有工作在身,故未有跟隨男友見證這個歷史時刻。

文:音樂組

鍾意就快D Share啦!