掃呢頁CODE去手機

2015年9月30日 星期三

我要真孖妹 Vanies x Sumi [FACE - 436 - 數碼科技] MF,



Webber

我要真孖妹 Vanies x Sumi

以前喺網上拍片嘅人相對比較孤獨,通常都係自己一個人一腳踢。自從 YouTube越嚟越多人拍片之後,唔單只 YouTuber之間會多咗 crossover,連新加入嘅 freshman都鍾意夾埋一齊拍片。一班年青人圍威喂就見得多,真實嘅孖生姊妹一齊拍片你又見過未?

今期 Webber邀請到一對出生時間只相差 19分鐘嘅孖生姊妹,姐姐 Sumi同埋妹妹 Vanies,到底佢哋同其他 YouTuber有乜唔同?

(webber's info)

YouTube: SUMI CHEUNG

訂閱人數:約 6,930

ig: sumicheung(Followers:約 2,643)

ig: vaniescheung(Followers:約 2,479)

家姐 Sumi要拍片 細妹 Vanies:「我配合佢㗎咋」

呢條〈孖妹廚房- EP1-2種簡單易整薯仔小食〉就係 Vanies「配合」家姐之作。兩個都好健談,所以睇佢兩個拍片真係一啲都唔悶。

開 YouTube頻道拍片,其實一開始都係家姐 Sumi嘅主意:「開 YouTube有兩個原因,第一係因為我本身好鍾意扮靚,加上嗰陣又讀緊化妝,所以就想拍片分享;另外一個原因就係因為我由細到大都係勁曳,打架、逃學乜都做齊,拍片係想做返啲嘢證明俾人睇。」妹妹 Vanies化妝唔叻,但見到家姐拍片好似幾得意,所以就玩埋一份:「有我嘅片通常都唔關化妝事,都係一啲生活分享、煮嘢食,但發覺原來啲人鍾意睇呢類片多啲。」雖然𠵱家 Vanies都會幫吓 Sumi剪片,但 Sumi就投訴:「阿妹當初冇乜動力拍㗎!」 Vanies即時鬥嘴:「係㗎,我配合吓你㗎咋!」

由細到大都俾人比較

兩姊妹喺 YouTube上嘅路線好鮮明,姐姐 Sumi就係教人化妝扮靚,而妹妹 Vanies就識彈結他煮嘢食,所以唔怕比較。

作為「世界上的另一個我」,原來真係會有好處,妹妹 Vanies:「家姐讀緊大專嗰陣,我有試過幫佢拍卡上堂,真係冇人認得出。」然而,孖妹都有唔好嘅地方, Sumi:「因為我哋細個都好曳,又好似樣,當一個曳嘅時候,另外嗰個就會俾人話,所以細個時班朋友仔嘅父母都唔鍾意我哋,覺得教壞佢啲仔女。」外人成日將兩姐妹視為一體,二人異口同聲話由細到大都超多人將佢哋作比較, Vanies:「其實好多人都會將雙胞胎做比較,通常啲人都會話家姐靚啲,就算𠵱家拍 YouTube都係家姐多 fans啲,但我又覺得冇所謂,因為我好清楚我同家姐路線唔同,我係可愛型。就算我哋之間有咩唔開心,由細都大都已經習慣咩都攞出嚟講。」咁合拍,又咁清楚對方,唔怪得拍片都特別有默契,好少會爭嘢講之餘,仲各有各 style。

閨蜜都冇孖生咁 friend

唔好睇佢兩個由細到大都日對夜對,家陣連拍片都打孖上就會冇秘密, Sumi:「其實我有咩都會第一時間話比阿妹知,但有次我同個男仔分手,我係第一時間話俾我當時好 friend嘅朋友知,而唔係佢。」雖然 Vanies聽到即刻有啲扁嘴,但佢有次貪玩玩到入醫院,都係冇即刻話俾 Sumi知,仲要係 Sumi有心靈感應, feel到 Vanies出事先知,搞到 Sumi嗰時勁擔心同勁嬲。不過咁,呢啲小小嘅秘密都無損二人感情,仲話比起「閨密」,孖生姊妹感情更好。 Vanies:「我覺得閨密會出賣你㗎,相比下孖生姊妹始終親啲,真係會為咗對方死都願意。」 Sumi:「朋友都會覺得我同佢哋距離好遠,可能係因為我已經有咗阿妹,所以潛意識下會抹殺咗同其他朋友 close。」整個訪問可見,兩姊妹不斷你一言我一語,完全沒有空位俾記者妹問問題,看似鬥氣,但實質係極合拍,好似知道哂對方幾時想講乜,幾時冇位反駁咁,令到冇姊妹嘅記者妹又羨慕又妒忌。

因為 Sumi鍾意扮靚嘅關係,就拉埋 Vanies參加 Google搞嘅一個美容比賽,仲一齊入埋複賽。喺呢條〈揭開巨箱中的奧秘# BeautyBoundAsia#UNBOXING Challenge〉入面,見到佢地連講嘢都勁一致,咁合拍,唔知幫唔幫到佢哋贏呢?

Sumi同 Vanies今期就為《 FACE》拍咗一條〈孖妹的 10個 Facts〉,想知孖妹有咩鮮為人知嘅一面,就快啲下載《 FACEPop》 app喇!

撰文:陳可兒

攝影:楊晴

鍾意就快D Share啦!